Ebbaruha ya Yakobbo 3:1-18
3 Ab’oruganda bagenzi bange, baingi omuli inywe timusemeriire kufooka beegesa, habw’okukimanya ngu nitwija kucwerwa omusango ogurukukiraho.*
2 Habwokuba itwena tusobya* emirundi nyingi. Kakuba omuntu atasobya* omu bigambo, aba muntu ow’ahikiriire, ow’arukusobora kulema omubiri gwe gwona.
3 Obu tuta ebyoma omu minwa y’embaraasi kuzireetera kutworobera, tulema emibiri yazo yoona.
4 Murole n’emeeri, noobu kiraaba ngu nkooto muno kandi zitwarwa omuyaga ogw’amaani, zigoywa engahi entaito muno nizitwarwa hoona nambere arukugoya arukugonza kugenda.
5 N’orulimi narwo, kiri kicweka eky’omubiri ekitaito baitu rwenyumiza muno. Rora omulingo akarro kake kasobora kwokya ekibira ekikooto!
6 N’orulimi narwo murro. Omu bicweka eby’omubiri gwaitu, orulimi nirukiikirra ensi ey’okutahikirra, habwokuba rusiisa omubiri gwona kandi nirusobora kuhwerekereza obwomeezi bw’omuntu, kandi ruhwerekereza nka Gehena.*
7 Habwokuba ebisoro ebya buli mulingo eby’omu kisaka, ebinyonyi, ebisoro ebyekurra, hamu n’ebihangirwe eby’omu nyanja, bisobora kulemwa kandi biremerwe abantu.
8 Baitu busaho muntu weena asobora kulema orulimi. Tikirukusoboka kurulema, rubi, kandi rwijwire obutwa oburukwita.
9 Turukozesa kukugiza Yahwe* Isiitwe, kandi turukozesa kukyena abantu abaahangirwe “omu kisisani kya Ruhanga.”
10 Omu kanwa nuko kamu, harugamu emigisa n’okukyena.
Ab’oruganda bagenzi bange, tikihikire ebintu kubaho omu omulingo gunu.
11 Ensoro ey’amaizi emu neesobora kurugwamu amaizi amarungi* n’agarukusarra ha murundi nugwo gumu?
12 Ab’oruganda bagenzi bange, omuti omutiini nigusobora kwana emizaituuni, rundi omuzabbibbu kwana emitiini? N’amaizi ag’ekisura tigasobora kurugwamu amaizi amarungi.
13 Nooha omuli inywe anyakwine amagezi n’okwetegereza? Leka akyoleke kuraba omu ngeso ze enungi ngu, buli kimu eki arukukora, akikora omu buculeezi oburuga omu magezi.
14 Baitu obu muraaba mwine ihali lingi* n’okukungana* omu mitima yanyu, muteenyumiza kandi mukabaza ebirukuhakaniza amananu.
15 Ganu tigali nugo amagezi agaruga haiguru; baitu g’omu nsi, g’ebisoro, kandi ga badaimooni.
16 Habwokuba nambere haba ihali n’okukungana,* habaho akajagarro n’ebintu ebibi ebya buli mulingo.
17 Baitu amagezi agaruga haiguru eky’okubanza nigeera, g’obusinge, tigagumangaine, gaba geeteekaniize kuba mahulizi, gaijwire embabazi n’ebyana ebirungi, tigasoroora kandi tigaba g’obugobya.
18 Ekindi, ekyana eky’okuhikirra kibyarwa omu nyikara ez’obusinge hali abo abarukuleetaho obusinge.
Obugambo Obuli Hansi
^ Rundi, “ogurukukirayo kulemeera.”
^ Rundi, “tutabaijuka.”
^ Rundi, “atatabaijuka.”
^ Rora, Kusoborra Ebigambo.
^ Rora, Ebyong. A5.
^ Nkooku kiri, “agarukunura.”
^ Nkooku kiri, “erirukusarra.”
^ Rundi nikisobora kuhindurwa, “n’okwegondeza inywenka.”
^ Rundi nikisobora kuhindurwa, “n’okwegondeza inywenka.”
