Ebbaruha ya Yakobbo 2:1-26
2 Ab’oruganda bagenzi bange, nimwikiririza omu Mukama waitu Yesu Kristo ow’ekitiinisa, kandi ha murundi nugwo gumu nimusoroora?
2 Kakuba omuntu ow’ajwaire empeta ez’ezaabbu hamu n’ebijwaro ebirungi aija omu rusorrokano rwanyu baitu n’omunaku na uwe akaija akataahamu ajwaire engoye eziiragwire,
3 mufaaho ogu ow’ajwaire engoye enungi kandi mumugambira muti: “Ikarra omu kiikaro kinu ekirungi” kandi omunaku mumugambira muti: “Ikara oyemeriire” rundi muti: “Ikarra hali hansi y’akatebe k’ebigere byange”?
4 Obu mukora muti, muba mutarukutwara abamu nk’abarukukira abandi, muba mutafookere abacwi b’emisango abarukukora encwamu embi?
5 Bagenzi bange abagonzebwa, muhuliirize. Ruhanga atakome abarukurorwa nk’abanaku omu nsi, nukwo babe baguuda omu kwikiriza kandi abagwetwa b’Obukama obu yaraganiize abo abarukumugonza?
6 Baitu inywe nimugaya omunaku. Abaguuda tinubo bababonabonesa kandi bakabatwara omu mbuga z’ebiragiro?
7 Tinubo bajuma ibara erirungi, inywe eri mwayeserwe?
8 Hati, obu muhondera ekiragiro eky’omukama* ekirukusigikirra ha kyahandiikirwe kinu: “Osemeriire kugonza mutaahi waawe, nkooku oyegonza wenka,” nimuba nimukora kurungi.
9 Baitu obu mugumizaamu nimusoroora, muba nimukora ekibi, kandi ekiragiro kibasingisa omusango* ngu muli basiisi.
10 Omuntu weena obu ayorobera ebiragiro byona, baitu akalemwa kuhondera kimu hali byo, byona aba alemerwe kubyorobera.
11 Habwokuba ogu ayagambire ati: “Otalisiihana,” akongera yagamba ati: “Otaliita.” Hati, obu oraaba otarukusiihana baitu noita, oba ofookere mucwi w’ebiragiro.
12 Mwikale nimubaza kandi nimwetwaza nk’abo abarukugenda kucwerwa omusango kusigikirra ha biragiro eby’abantu ab’obugabe.
13 Habwokuba ogu atooleka embabazi, talyolekwa embabazi* obu aliba naacwerwa omusango. Embabazi nizikira kucwerwa omusango.
14 Bagenzi bange, nikigasa ki omuntu obu agamba ngu aine okwikiriza, baitu atarukukwoleka omu bikorwa? Mali okwikiriza oku nikusobora kumujuna?
15 Kandi obu harukuba haroho ow’oruganda rundi munyaanya itwe, ataine bijwaro* kandi ataine ebyokulya ebirukumara kiro eki,
16 baitu omu hali inywe akagamba ati: “Genda omu businge; otagate kandi olye kurungi,” baitu mutamuhaire ebyetaago bye eby’omubiri, eki nikigasa ki?
17 Omu mulingo nugwo gumu, okwikiriza okutaine bikorwa kuba kufiire.
18 Baitu nabwo, omuntu naija kugamba ati: “Oine okwikiriza kandi nyowe nyine ebikorwa. Nyoleka okwikiriza kwawe okutaine bikorwa, kandi na nyowe ndaakwoleka okwikiriza kwange kuraba omu bikorwa byange.”
19 Nimwikiriza ngu haroho Ruhanga omu, tinukwo? Nimukora kurungi. Baitu na badaimooni na bo eki nibakiikiriza kandi nibatukumira.
20 Baitu iwe omuntu atarukwetegereza tofaayo kumanya ngu okwikiriza okutaine bikorwa tikwine mugaso?
21 Ibburahimu isenkuruitwe ateetwe ow’okuhikirra habw’ebikorwa bye, hanyuma y’okuhayo omwana we Isaka ha kyoto?
22 Noorora ngu okwikiriza kwe kukagendera hamu n’ebikorwa bye kandi habw’ebikorwa bye, okwikiriza kwe kukahikirra,
23 kandi ekyahandiikirwe kikahikirra ekirukugamba kiti: “Ibburahimu akaikiririza omuli Yahwe* kandi yabarwa nk’ow’okuhikirra,” kandi yayetwa munywani wa Yahwe.*
24 Nimurora ngu omuntu ayetwa ow’okuhikirra habw’ebikorwa hatali habw’okwikiriza kwonka.
25 Omu mulingo nugwo gumu, Rahabbu malaaya ateetwe ow’okuhikirra habw’ebikorwa bye, hanyuma y’okukunira abatumwa kandi yabagambira kuraba omuhanda ogundi?
26 Mali, nkooku omubiri ogutaine omwoyo* guba gufiire, n’okwikiriza okutaine bikorwa nakwo kuba kufiire.
Obugambo Obuli Hansi
^ Rundi, “eky’obukama.”
^ Rundi, “kibahana.”
^ Rundi, “taliganyirwa.”
^ Nkooku kiri, “ali busa.”
^ Rora, Ebyong. A5.
^ Rora, Ebyong. A5.
^ Rundi, “orwoya.” Rora, Kusoborra Ebigambo; “Omwoyo.”
