1-2. Hikuya hi Mintirho 8:27-31, 35-38, i mpsini swinga yendla swaku Muetiyopiya a tsakamisiwa?

WASWI lava kutsakamisiwa akuva uva mudjondzisiwa wa Kreste? Vanyingi va tsakamisiwa hi leswi va rhandzaka Yehovha ni hi leswi vaswi tlangelaka leswi angava yendlela swona. Vona xikombiso xa wanuna mun’wana lweyi a atirhela hosi ya xisati ya Etiyopiya.

² Wanuna lweyi wa Muetiyopiya a tekele kutsakamisiwa loko a djondze Matsalwa ivi a twisisa swaku a afanele a tsakamisiwa. (Lerha Mintirho 8:27-31, 35-38.) I yini xingamu pfuna kuva a tsakamisiwa? A ali rhandza hintamu Rito la Xikwembu lakakuva hambiloko ali n’qolweni a afamba hi kulerha a buku la Esaya. Ankama Filipi anga vulavula na yena, wanuna lweyi aswi tlangele hintamu leswi Yesu angamu yendlela swona. Kambe hi mhaka muni a ayile aYerusalema? Hi mhaka se aamu rhandza Yehovha. Hiswi tivisa kuyini? Hileswi a avuya hi ka kugandzela Yehovha aYerusalema. Wanuna lweyi, ingaku a atshike wukhongeli la yena leli anga psaleliwa ka lona, aya titlhanganisa ni tiko la vanhu lava ava tinyiketele ka Xikwembu xa ntiyiso. Impela, kurhandza Yehovha kumu pfunile akuva a yendla nchumu xin’wana xa lisima, kunga kutsakamisiwa akuva ava mudjondzisiwa wa Kreste. — Mat. 28:19.

3. I mpsini leswi swingaha yendlaka van’wana va chava kutsakamisiwa? (Vona kwadru lelinge: “ I Mpsini Leswinga Mbilwini ya Wena?”)

³ Kurhandza Yehovha swingaku yendla u navela kutsakamisiwa. Kambe lirhandzu linga tlhela li kusivela kuva u tsakamisiwa. Swinga yendlekisa kuyini leswo? Pimisa hi swikombiso nyana leswi. Ahinge uma rhandza hintamu maxaka ya wena ni vanghanu va wena. Leswo swingahaku yendla u chava kutsakamisiwa hi kupimisa swaku vata gama vaku nyenya. (Mat.  10:37) Kumbe swingahaku karhatela kutshika kuyendla swilo leswi uswi tivaka swaku Xikwembu xaswi nyenya, hi mhaka leswi uswi rhandzaka. (Pis. 97:10) Kumbe swingaha yendla u kuli na u hamba mafexta lawa ma fambisanaka ni wukhongeli la mavunhwa naswona loko uma khumbuka, wa tsaka hi leswi aswi yendleka ka wona. Leswo swingaha yendla swiku karhatela kutshika kuyendla swilo leswi Yehovha aswi nyenyaka. (1 Kor. 10:20, 21) Se ungaha tivutisa leswi: “Nita rhandza mani kutlula mani?”

4. Hi xihi xivangelo xa lisima kutlula hinkwaswu lexingataku yendla u lava kutsakamisiwa?

⁴ Kuni minchumu ya yingingi ya yinene ya ku yingaku tsakisa u tlhela uyi rhandza. Hi xikombiso, na ungase sungula kudjondza Bibele ni Timboni ta Yehovha, swingaha yendleka se awuli hlonipha hintamu Bibele. Naswona swinga yendleka se awumu rhandza Yesu. Nakambe leswi se u tivanaka ni Timboni ta Yehovha, waswi rhandza kutshama na tona. Kambe kurhandza swilo leswo swa swinene ahi swona ntsena swingataku yendla u lava kutinyiketela ka Yehovha ni kutlhela u tsakamisiwa. A xa lisima kutlula hinkwaswu lexingataku yendla uswi lava kutsakamisiwa i kuva u rhandza Yehovha Xikwembu. Loko umu rhandza hintamu Yehovha kutlula hinkwaswu, awungata pfumelela nchumu xiku tshikisa kumu tirhela. Kurhandza Yehovha switaku yendla u lava kutsakamisiwa swi tlhela swiku pfuna kutshama na u tshembekile loko se u tsakamisiwile.

5. Hi swihi swivutiso leswi hingata bula ha swona?

⁵ Yesu a vule swaku hi fanele hi rhandza Yehovha hi mbilu ya hina hinkwayu, hi wutomi la hina hinkwalu, hi mimpimisu ya hina hinkwayu ni hi ntamu wa hina hinkwawu. (Marka 12:30) Hingaswi kotisa kuyini kumu rhandza hi ntamu Yehovha hi tlhela himu hlonipha? Hi fanele hi yanakanyisisa hileswi Yehovha angahi rhandzisa xiswona. Leswo swita yendla swaku na hina himu rhandza. (1 Yoh. 4:19) Loko hi rhandza Yehovha kutlula hinkwaswu swita yendla swaku hi tlhela hi titwisa kuyini naswona hita yendla yini? *

6. Hikuya hi Varhoma 1:20, unga yendla yini akuva u djondza hi Yehovha?

⁶ Djondza hi Yehovha ka leswi angaswi yendla. (Lerha Varhoma 1:20; Nhla. 4:11) Yanakanyisisa hi swiharhi ni minsinya leyi Yehovha angayi yendla. Swilo leswo swi kombisa wutlharhi la Yena. Tlhela u yanakanyisisa hi leswi mirhi wa munhu unga tshamisa xiswona. Wa hlamalisa. (Pis. 139:14) Pimisa hi matimba ya dlambu leli Yehovha angali tumbuluxa, na wu khumbuka swaku kuni tinyeleti ta tinyingi letinga ni matimba kutlula dlambu. * (Esa. 40:26) Loko u pimisa hi leswi Yehovha angaswi tumbuluxa, u taya umu rhandza hintamu. I swa lisima kutiva swaku Yehovha ani wutlhari ni matimba. Kambe akuva umu rhandza hintamu u tlhela u tiyisa wunghanu la wena na yena, kulaveka umu tiva kahle.

7. U fanele u kholwa ka yini akuva u rhandza Yehovha hintamu?

⁷ U fanele u kholwa swaku Yehovha waku rhandza hikakunene. Swaku karhatela kupfumela swaku Muvumbi wa tilu ni misava waswi tiva swaku u kona ni swaku ani mhaka na  wena? Loko swiku karhatela, khumbuka swaku Xikwembu “axile kule ni mun’wana ni mun’wana wa hina.” (Mint. 17:26-28) Yehovha “a kambisisa timbilu hinkwatu,” naswona aku tshembisa swaku “loko umu lava, ata yendla swaku umu kuma”. (1 Tikro. 28:9) Kuvula ntiyiso, leswiku yendlaka u djondza Bibele swoswi, hi leswaku Yehovha aku ‘kokele ka Yena’. (Yer. 31:3) Loko uya u twisisa leswi Yehovha angaku yendlela swona, u taya umu rhandza hintamu.

8. Hingali tlangelisa kuyini lirhandzu la Yehovha?

⁸ Xin’wana xa leswi ungaswi yendlaka akuva u kombisa swaku na wena wamu rhandza Yehovha, i kuvulavula na yena hi xikhongelo. Loko u byela Yehovha leswiku karhataka u tlhela umu tlangela hi leswi aku yendlelaka swona, lirhandzu la wena hi yena lita kula. Naswona wunghanu la wena na Yehovha litaya li kula loko u vona swaku waswi hlamula swikhongelo swa wena. (Pis. 116:1) Utaswi vona swaku waswi twisisa leswi uti twisaka xiswona. Kambe akuva wunghanu la wena na Yehovha li tiya, kulaveka u twisisa mapimisela ya yena. Nakambe kulaveka u tiva leswi a lavaka leswaku uswi yendla. Akuna ndlela yin’wana ya kutiva leswo handle ka kudjondza Rito la yena kunga Bibele.

9. Ungaswi kombisa kuyini swaku wali nyika lisima Bibele?

⁹ Djondza kunyika lisima Rito la Xikwembu kunga Bibele. Kova Bibele ntsena lingani ntiyiso hi Yehovha ni leswi a lavaka kuku yendlela swona. Unga kombisa swaku wali tlangela Bibele hi kuli lerha siku ni siku, kulunghiselela djondzo ya wena ni hi hanya hi kulandza leswi uswi djondzaka. (Pis. 119:97, 99; Yoh. 17:17) U tivekele nkama wa kulerha Bibele siku ni siku? Wa lerha Bibele siku ni siku hi kulandzela nkama lowu ungati vekela wona?

10. Hi xihi xin’we xa swilo leswi yendlaka Bibele liva buku la kuhlawuleka?

¹⁰ Xin’we xa leswi yendlaka Bibele liva buku laku hlawuleka, hi mhaka li vulavulaka hi leswi Yesu angaswi yendla. Akuna buku lin’wana lelingaku byelaka ntiyiso wa leswi Yesu angaku yendlela swona loko kungali Bibele.  Loko u djondza hileswi Yesu angaswi yendla ni leswi angaswi vula, utaya u navela kuva munganu wa yena.

11. I yini xingaku pfunaka kudjondza kurhandza Yehovha?

¹¹ Loko u djondza kurhandza Yesu, utaya umu rhandza hintamu Yehovha. Hi mhaka muni? Hi mhaka Yesu a tekelele wumunhu la Papayi wa yena hi kuhelela. (Yoh. 14:9) Kutani loko uya umu tiva kahle Yesu, utaya umu tiva kahle Yehovha ni kumu rhandza. Pimisa hi ntwelawusiwana lowu Yesu angava na wona hi vanhu lava ava tekeliwa hansi hileswi avali swisiwana, ava vabya kumbe lava ava voneka vangali va nchumu. Tlhela u pimisa hi leswi Yesu angaswi djondzisa ni leswi wutomi la wena linga yampsisa xiswona loko uswi tirhisa. — Mat. 5:1-11; 7:24-27.

12. Loko uya u djondza hi Yesu, uta navela kuyendla yini?

¹² Lirhandzu la wena hi Yesu lingaya li tiya loko u yanakanyisisa hi leswi lifu la yena lingahi yendlela swona akuva hi rivaleliwa swidjoho swa hina. (Mat. 20:28) Loko uswi twisisa swaku Yesu ayoswi lava kuku fela, uta tisola u tlhela u kombela Yehovha kuva aku rivalela.(Mint. 3:19, 20; 1 Yoh. 1:9) Loko uya u rhandza Yesu na Yehovha, utaya u navela kuva xikarhi ka vanhu lava rhandzaka Yehovha na Yesu.

13. I mpsini leswi Yehovha angaku nyika swona?

¹³ Rhandza lava rhandzaka Yehovha. Swingaha yendleka maxaka ya wena ni khale ka vanghanu va wena vangaswi twisisi swaku hi mhaka muni u tinyiketelile ka Yehovha. Vangaha tlhela vaku djikela. Kambe Yehovha ataku nyika maxaka, kunga vamakwerhu abandleni. Loko uli kusuhi ni vamakwerhu, vataku rhandza va tlhela vaku pfuna. (Marka 10:29, 30; Hev. 10:24, 25) Hi kufamba ka nkama, maxaka ya wena mangaha gandzela Yehovha swin’we na wena ni kuhanya hi minawu ya yena. — 1 Pet. 2:12.

14. Hi kuya hi 1 Yohane 5:3, i yini leswi ungaswi tsumbula hi minawu ya Yehovha?

¹⁴ Hlonipha minawu ya Yehovha u tlhela u hanya hi yona. Swinga yendleka ankama awungasemu tiva Yehovha awu hanyisa xileswi awuswi lavisa xiswona. Kambe swoswi se waswi tiva swaku swa yampsa kuhanya hi minawu ya Yehovha. (Pis. 1:1-3; lerha 1 Yohane 5:3.) Pimisa hi leswi Bibele liswi byelaka vanuna, vasati, vapsali ni vana. (Efe. 5:22–6:4) U titwise kuyini ankama ungaswi tirhisa ka ndjangu wa wena? A ndjangu wa wena awu tsakanga ke? Kuvuliwa yini hi mahanyelo ya wena swoswi hi leswi unga langa vanghanu lavanene? Ama yampsanga? Awu tsakanga swoswi kutlula khale? (Swi. 13:20; 1 Kor. 15:33) Haswi vona swaku nhlamulu ya wena i ina.

15. U fanele u yendla yini loko uswi lava kutirhisa minawu ya Bibele?

¹⁵ Minkama yin’wana swingahaku karhatela kutirhisa leswi uswi djondzaka ka Bibele. Leswi hi swona swi yendlaka swaku Yehovha a tirhisa nhlengeletano ya yena leyihi nyikaka mabuku lawa mahi pfunaka kuhambanisa leswinene ka swa kubiha. (Hev. 5:13, 14) Loko u djondza mabuku lawa, utaswi vona swaku ma pfuna naswona ama djikadjiki. Leswo switaku yendla uswi lava kulumba nhlengeletano ya Yehovha.

16. Ungava kuma kwini vagandzeli va Yehovha?

¹⁶ Rhandza nhlengeletanu ya Yehovha u tlhela uyi seketela. Vanhu va Yehovha va kumeka amabandleni, naswona hinkwavu va rhangeliwa hi N’wana wa yena, Yesu. (Efe. 1:22; 5:23) Yesu a lange ntlawa nyana wa vavanuna lava totiweke kuva va rhangela ka ntirho lowu a lavaka swaku wu yendliwa namuntlha. Yesu a vule swaku ntlawa lowu i “nandza wotshembeka  ni kutlhariha”, naswona vawu teka na wu li wa lisima ntirho wa vona wa kuku phamela swakudla swa moya ni kuhlayisa wuxaka la wena na Yehovha. (Mat. 24:45-47, NM) Nandza wotshembeka ni kutlhariha a tiyiseka ka leswaku vavanuna lava fanelekaka va vekiwa kutirha tani hi madoda. Madoda lawa mangaku pfuna kuhlayisa wuxaka la wena na Yehovha. (Esa. 32:1, 2; Hev. 13:17; 1 Pet. 5:2, 3) Madoda ma tiyimisele kuyendla hinkwaswo leswi mangaswi kotaka akuva maku tiyisa ni kuku pfuna kutiyisa wunghanu la wena na Yehovha. Kambe xin’wana xa lisima hintamu mangaku yendlelaka xona i kuku pfuna kudjondzisa van’wana hi Yehovha. — Efe. 4:11-13.

17. Hi kuya hi Varhoma 10:10, 13, 14, hi mhaka muni u fanele u byela van’wana hi Yehovha?

¹⁷ Djondzisa van’wana kuva va rhandza Yehovha. Yesu a rhume vadjondzisiwa va yena kubyela van’wana hi Yehovha. (Mat. 28:19, 20) Swingaha yendleka hi yendla vadjondzisiwa akuva hi hetisisa nawu ntsena. Kambe loko uya u rhandza Yehovha uta titwa kufana na mupostolo Petro na mupostolo Yohane, lavanga te: ‘hingakala hingakoti kutshika kuvula leswi hiswivoneke ni leswi hiswitweke.’ (Mint. 4:20) Akuna nchumu lexingahi tsakisaka ngopfu kutlula kupfuna munhu kurhandza Yehovha. Pimisa hi leswi Filipi anga tsakisa xiswona loko a pfune Muetiyopiya kuva a twisisa Matsalwa ni kutlhela a tsakamisiwa. Loko u tekelela Filipi hi kuyingisa xileriso xa Yesu xa kuchumayela, utava u ombisa swaku ulava kuva Mboni ya Yehovha. (Lerha Varhoma 10:10, 13, 14.) Loko uza u fika laha, na wena utaza utiyendla xivutiso xa kufana ni lexinga yendliwa hi Muetiyopiya loko aku: “kungasivela yini leswaku ni khuvuliwa xana?” — Mint. 8:36.

18. Hita bula hi yini ka djondzo leyi landzaka?

¹⁸ Loko u tsakamisiwa u tava u yendle xiboho xa lisima ngopfu ka wutomi la wena. Leswi xiboho lexi xinga xikulu, u fanele u rhanga hi kupimisa kahle na ungasexi yendla. U fanele u tiva yini hi kutsakamisiwa? U fanele u yendla yini na ungase tsakamisiwa? Swivutiso leswi, swita hlamuliwa ka djondzo leyi landzelaka.