Kisim Skul Long Tok Bilong God

Wanem Samting Bai Painim Ol Lotu?

Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Yu ting olgeta lotu i gutpela?

Insait long planti lotu i gat ol manmeri em ol i gat gutpela bel na ol i laik mekim ol samting God i laikim. God i lukim ol dispela man na em i tingim ol. Tasol sori tru, sampela i yusim lotu bilong mekim ol wok nogut. Long bipo, sampela bikman bilong lotu i bin givim bikpela pen tru long ol man i no bihainim lotu bilong ol. (2 Korin 4:3, 4; 11:13-15) Long nau, sampela ripot long nius i tok sampela bikman bilong lotu i kirapim ol man long mekim pasin teroris, sapotim woa, o insait long pasin bilong mekim nogut long ol pikinini.—Ritim Matyu 24:3-5, 11, 12.

Baibel i tok i gat tupela kain lotu i stap—lotu i tru na lotu giaman. Lotu giaman i no skulim ol man long stretpela save long God. Tasol God Jehova i laik bai ol man i mas kisim stretpela save long em.—Ritim 1 Timoti 2:3-5.

2. Wanem samting bai painim ol lotu?

God i no laikim ol lotu i save giamanim ol man, em ol lotu husat i tok ol i laikim tru God, tasol ol i no skulim stret ol man long God em i husat tru. Ol man i bihainim ol dispela lotu i amamas long i stap pren bilong ol manmeri bilong graun em Satan i bosim. (Jems 4:4; 1 Jon 5:19) Baibel i tok ol lotu em ol i sapotim ol gavman bilong graun na i no sapotim God, ol i olsem wanpela pamukmeri. Baibel i kolim dispela pamukmeri olsem “Bikpela Babilon.” Em i kisim dispela nem long wanpela taun bilong bipo we lotu giaman i bin kirap long en bihain long Bikpela Tait long taim bilong Noa. Klostu nau God bai pinisim wantu ol lotu em ol i wok long giamanim na daunim ol man.—Ritim Revelesen 17:1, 2, 5, 17; 18:8, 23, 24.

 3. Olsem wanem God bai mekim ol manmeri bilong olgeta hap i stap amamas?

Klostu nau God bai givim strafe long ol lotu giaman—dispela em i gutnius. Dispela bai pinisim pasin bilong daunim ol man long olgeta hap. Na ol lotu giaman bai i no inap moa long giamanim ol man na brukim ol lain. Olgeta man husat i stap long dispela taim ol bai stap wanbel long lotuim dispela wanpela God tru.—Ritim Aisaia 11:9; Revelesen 18:20, 21; 21:3, 4.

4. Ol gutpela manmeri i mas mekim wanem?

Jehova i no inap lusim tingting long ol gutpela manmeri em ol i stap nabaut namel long ol lotu giaman long olgeta hap bilong graun. Long nau em i wok long bungim ol kain man olsem long rot bilong skulim ol long tok i tru na ol i stap wanbel.—Ritim Maika 4:2, 5.

Jehova i amamas long ol manmeri husat i kam insait long lain bilong em na i laik lotuim em. Maski ol pren na famili bilong yumi i no amamas taim yumi kirap mekim wok bilong Jehova, yumi kisim planti gutpela samting. Yumi kamap pren bilong God, yumi kisim nupela famili i laikim yumi, na yumi wet long kisim laip i stap gut oltaim.—Ritim Mak 10:29, 30; 2 Korin 6:17, 18.

Bilong kisim sampela save moa, lukim sapta 15 na 16 bilong dispela buk em ol Witnes Bilong Jehova i wokim. Tru Tru Baibel i Tok Wanem?

[Piksa Kredit Lain long pes 16]

The Complete Encyclopedia of Illustration/J. G. Heck