“TENKYU.” Yumi olgeta i save amamas long harim man i tok tenkyu taim yumi mekim gut wanpela wok o yumi givim presen long em, a? Yumi olgeta i laik pilim olsem ol narapela na moa yet ol lain yumi laikim i amamas long ol samting yumi mekim. Tru tumas, wanpela man yumi laikim moa yet em God Jehova. Olsem wanem? Em i save amamas long ol wok yumi mekim bilong lotuim em? Orait nau yumi ken skelim ol samting God i mekim long Ebetmelek, em man husat i bin redi long lusim laip bilong em bilong seivim wanpela profet bilong God.—Ritim Jeremaia 38:7-13 na 39:16-18.

Ebetmelek em i husat? Em i wanpela ofisa i save wok long haus bilong King Sedekaia bilong Juda. Ebetmelek i bin stap long taim bilong Jeremaia—em man God i bin salim bilong toksave long bikhetlain Juda olsem klostu nau bagarap bai painim ol. Maski Ebetmelek i stap namel long ol ofisa husat i no save tingim God, em i daun long God na i gat bikpela rispek long Jeremaia. Ol ofisa i sutim tok long Jeremaia olsem em i bikhet long gavman na ol i tromoi em i go insait long wanpela hulwara i drai pinis na i gat graun malumalum long en, na ol i larim em i stap bilong dai. Dispela samting i bin traim tru bilip bilong Ebetmelek. (Jeremaia 38:4-6) Ebetmelek bai mekim wanem?

Ebetmelek i strongim bel na bihainim wanpela tingting tasol, em i no pret long strafe em inap kisim long han bilong ol ofisa. Long ai bilong ol narapela em i go stret long Sedekaia na i tokim em olsem pasin ol man i mekim long Jeremaia i no stret liklik. Ating em i poinim pinga long ol dispela man, na em i tokim king: “Ol dispela man i mekim pasin nogut tru long profet Jeremaia.” (Jeremaia 38:9) Sedekaia i harim tok bilong Ebetmelek na i tokim em long kisim 30 man i go bilong helpim Jeremaia.

Ebetmelek i soim narapela gutpela pasin: pasin helpim. Em i kisim “ol olpela laplap na . . . pasim ol dispela laplap long baklain na slekim i go daun long Jeremaia.” Bilong wanem em i givim ol dispela laplap? Em i mekim olsem bilong Jeremaia i ken putim aninit long tupela han bilong em bambai rop i no ken katim skin taim ol i pulim em i kam ausait long graun malumalum.—Jeremaia 38:11-13.

Jehova i lukim samting Ebetmelek i mekim. Yu ting Em i amamas long dispela? Long rot bilong Jeremaia, God i tokim Ebetmelek olsem klostu nau Juda bai bagarap. Olsem wanpela saveman i tok, God i givim “5-pela tok promis bilong kisim bek” Ebetmelek. Jehova i tok: “Bai mi helpim yu, . . . ol bai i no inap putim yu long han bilong ol dispela man . . . Mi bai was gut long yu . . . ol bai i no inap kilim yu . . . yu no ken i dai.” Bilong wanem Jehova i tok promis long lukautim Ebetmelek? Jehova i tokim em: “Yu save bilip long mi.” (Jeremaia 39:16-18) Jehova i save olsem Ebetmelek i tingim tru Jeremaia na i helpim em, na tu, em i mekim olsem long wanem em i bilip tru long God.

Em nau, skul yumi kisim i klia tru: Jehova i pilim tru ol wok yumi mekim bilong lotuim em. Baibel i tokim yumi olsem em i save tingim olgeta liklik liklik samting em strongpela bilip i kirapim yumi long mekim. (Mak 12:41-44) Olsem wanem? Dispela i kirapim yu long i go klostu moa long dispela God husat i save amamas long ol wok yu mekim? Sapos yu mekim olsem, orait yu ken save tru olsem em bai truim tok Baibel i mekim long em olsem: “God i save givim gutpela pe long ol man i wok strong long painim em.”—Hibru 11:6.

Baibel ritim bilong Me:

◼ Jeremaia 32-50