Bihain long bebi i bon, fes 60 minit bilong en em taim bilong bikpela senis tru. Long wanem, em taim ol mama i mas pas gut wantaim bebi bilong ol, na dispela i helpim tru bebi long kamap gut. *

Wanem samting i kirapim mama long lukautim gut nupela bebi bilong em? Long buk The Journal of Perinatal Education, Professor Jeannette Crenshaw i stori olsem bodi i kamapim planti homon oxytocin na dispela i “kirapim tingting bilong kamap mama bihain long bebi i bon olsem holim bebi, lukluk long en, na givim susu.” Narapela homon bodi i kamapim long dispela taim i save “helpim mama long tingim bebi bilong em” na strongim pasin bilong em long pas gut wantaim bebi. Bilong wanem dispela i bikpela samting?

God Jehova, * Krieta bilong yumi i gat pasin laikim i kamapim dispela pasin bilong mama na bebi long pas gut wantaim. King Devit i givim biknem long God bikos em i kisim em “long bel bilong mama” na em i stap gut long han bilong mama. Em i beten olsem: “Mi bilip long yu, taim mama i karim mi na i kam inap nau. Mama i karim mi nupela yet na yu stap God bilong mi.”—Song 22:9, 10.

TINGIM: Sapos God i wokim dispela narakain samting na putim long bodi bilong mama bambai em inap laikim tru na helpim bebi long kisim ol samting em i nidim, orait yu ting dispela inap makim tu olsem God i tingim yumi wan wan, “ol pikinini bilong God”?—Aposel 17:29.

Jisas Krais i save gut long Krieta winim olgeta narapela man, em i tok: “Ol man i save salim tupela liklik pisin long koin i gat liklik pe. Tasol i no gat wanpela bilong ol dispela liklik pisin i save pundaun long graun na Papa bilong yupela i no save long dispela. Em i kaunim pinis olgeta gras long het bilong yupela. Olsem na yupela i no ken pret. Yupela i winim tru ol dispela liklik pisin.”—Matyu 10:29-31.

Sampela bilong yumi i save tingim ol liklik pisin yumi lukim, na no gat man i tingim wanpela bilong ol i pundaun long graun. Tasol Papa bilong yumi long heven i save tingim olgeta wan wan pisin. Na ol pisin—maski planti pisin—God i save tingim tru man winim ol dispela pisin. Skul yumi kisim: Yu “no ken pret” olsem God bai i no inap tingim yu, nogat. Em i save tingim yu tru!

 Baibel i tokim yumi

• “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.”—SINDAUN 15:3.

• “Bikpela i save lukautim ol stretpela manmeri, na em i save harim beten bilong ol.”—SONG 34:15.

• “Yu sori long mi oltaim, olsem na mi amamas long yu. Yu lukim dispela hevi bilong mi, na yu save long olgeta trabel i kamap long mi.”—SONG 31:7.

Sapos yumi save olsem God i tingim tru ol samting i painim yumi na em i lukautim yumi na i laik helpim yumi, yu ting dispela inap mekim sampela samting long laip bilong yumi? Yes, em inap. Hannah * long Inglan i tok:

“Planti, planti taim mi pilim olsem Jehova i no laikim mi na em i no save bekim ol beten bilong mi. Mi ting mi no gat strongpela bilip. Mi pilim olsem God i givim strafe long mi o em i givim baksait long mi bikos mi no bikpela samting. Mi pilim olsem God i no tingim mi.”

Tasol bihain Hannah i no gat tupela tingting moa olsem Jehova i tingim na laikim em. Wanem samting i senisim tingting bilong em? Em i tok: “Dispela samting i kamap isi isi. Mi tingim wanpela tok bilong Baibel i kamap planti yia i go pinis, em i stori long ofa bilong baim bek man na dispela i helpim mi tru, mi pilim pasin laikim bilong Jehova. Na taim mi kisim bekim bilong ol beten bilong mi, planti taim mi save krai, bikos mi luksave olsem Jehova i laikim mi. Na tu, long rot bilong stadi long Baibel na go long ol miting Kristen, mi kisim planti skul long Jehova, pasin bilong em, na tingting bilong em long yumi. Nau mi luksave olsem Jehova i tingim na laikim yumi na em i gat laik tru long lukautim yumi wan wan.”

Tok bilong Hannah i strongim yumi. Tasol olsem wanem yu inap bilip olsem God i save long ol samting i painim yu na em i tingim filings bilong yu? Neks atikol bai bekim dispela askim.