“Bikpela, planti taim mi singaut long yu. Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela?” (Habakuk 1:2, 3) Dispela em ol tok bilong Habakuk, gutpela man God i orait long em. Olsem wanem? Askim bilong em i soim olsem em i no gat bilip? Nogat! God i tokim Habakuk olsem Em i makim pinis taim bilong pinisim ol pen na hevi.—Habakuk 1:2, 3.

Taim yu o wanpela pren o famili bilong yu i karim ol pen na hevi, em isi long tok God i no hariap long mekim ol samting bilong helpim yumi long nau. Maski yumi gat dispela tingting, Baibel i tok: “Jehova i no save wok isi isi long truim tok promis bilong em, olsem sampela man i save tok. Nogat. Tasol em i wetim yupela na i no les kwik, long wanem, em i no laik bai wanpela i kisim bagarap. Em i laik bai olgeta i tanim bel.”—2 Pita 3:9.

Klostu nau! Jisas i kamapim klia olsem i gat wanpela lain pipol bilong dispela taim em ol bai lukim ol samting i kamap bilong makim olsem yumi stap long las de bilong “dispela taim.” (Matyu 24:3-42) Truim bilong tok profet bilong Jisas long taim bilong yumi i soim olsem klostu nau God bai pinisim ol pen na hevi. *

Tasol olsem wanem God bai pinisim olgeta pen na hevi? Taim Jisas i stap long graun, em i kamapim strong bilong God long pinisim ol pen na hevi bilong ol man. Skelim sampela bilong ol dispela eksampel.

Disasta: Taim Jisas na ol aposel i raun long bot long Raunwara Galili, strongpela win i laik kapsaitim bot bilong ol. Tasol Jisas i kamapim klia olsem em na Papa bilong em inap kontrolim ol win na ren samting. (Kolosi 1:15, 16) Jisas i tok: “Inap nau! No ken pairap!” Na wanem samting i kamap? “Win i dai na raunwara i stap isi tru.”—Mak 4:35-39.

Sik: Ol man i save olsem Jisas inap opim ai bilong ol aipas na oraitim ol lek nogut, ol man i karim hevi bilong epilepsi, lepra, na ol narapela sik. “Em i oraitim olgeta man i stap nogut.”—Matyu 4:23, 24; 8:16; 11:2-5.

Sot long kaikai: Jisas i yusim strong Papa i givim long em long givim kaikai long ol man i sot. Baibel i tok, long taim em i mekim wok autim tok, tupela taim em i givim kaikai long planti tausen man.—Matyu 14:14-21; 15:32-38.

Dai: Jehova i gat strong long pinisim dai, dispela i klia tru taim Baibel i stori long 3-pela taim Jisas i kirapim bek ol man i dai pinis. Wanpela bilong ol dispela lain i dai 4-pela de i go pinis na Jisas i kirapim em bek.—Mak 5:35-42; Luk 7:11-16; Jon 11:3-44.