Em i Holimpas Bilip Bilong En
Taim Song Hee i gat 11 pela krismas, mama bilong em i luksave olsem bun bilong baksait bilong em i krungut. Wanpela dokta i painimaut olsem Song Hee i gat sik scoliosis, dispela sik i save mekim bun bilong baksait i krungut, na bun i luk olsem seip bilong leta C o S. Sik bilong Song Hee i go bikpela, olsem na em i mas kisim operesen. Tasol em i no laik kisim blut long taim bilong operesen. Nius “Kirap!” i askim em long stori bilong em.
Namba wan taim ol dokta i painimaut long sik bilong yu, olsem wanem ol i helpim yu?
Insait long klostu 3-pela yia, mi stap aninit long lukaut bilong tupela dokta. Na ol i luksave olsem sik long bun bilong baksait bilong mi i wok long i go bikpela. Na dispela i pasim klok na waitlewa bilong mi, na mi hatwok long pulim win. Olsem na mi mas kisim operesen.
Yu wanbel long kisim operesen?
Mi wanbel long kisim operesen, tasol ol i tokim mi olsem dispela em wanpela bikpela operesen, olsem na mi mas kisim blut. Long dispela taim bun bilong baksait bilong mi i klostu krungut olgeta. Tasol bilip bilong mi long Baibel em risen na mi no orait long kisim blut. *
Yu painim wanpela dokta husat i amamas long mekim operesen?
Mi na mama bilong mi i bungim wanpela dokta long asples bilong mipela long Florida, Amerika. Dispela dokta i gat save long mekim kain operesen. Tasol taim mi tokim em olsem bai mi no kisim blut, em i tok i no gat wanpela dokta inap mekim kain bikpela operesen na man i no kisim blut. Na em i tok sapos mi no kisim operesen bai mi dai paslain long taim mi gat 20 krismas. Long dispela taim mi gat 14 krismas tasol.
Yu bin stori long em long bilip bilong yu long blut?
Mi stori long en olsem Baibel i as bilong bilip bilong mi. Na mi kamapim klia olsem God i tingim blut i samting i holi, maski em blut bilong man o animal. * Sapos wanpela man bilong lain Israel i kaikai blut, em i mekim wanpela bikpela rong na ol i mas kilim em i dai! * Na tu, mi soim em long tok bilong Aposel 15:19, 20. Dispela skripsa i kamapim tok i go long ol Kristen long ol i mas “sakim blut,” dispela i makim olsem ol i no ken kaikai na dring blut o kisim blut long rot bilong sut samting.
Dokta i gat wanem tingting?
Dokta i strong long mi mas kisim blut. Na mi kirap nogut olsem haus sik i tok sapos mi kisim blut, orait ol bai i no sasim mi long kisim dispela operesen.
Yutupela mama i mekim wanem disisen?
Maski ol dokta i no laik long mekim operesen we mi no inap kisim blut, mi na mama i mekim disisen long bihainim bilip bilong mipela. Tasol narapela hevi i kamap. Aninit long lo bilong gavman, mi no winim yet krismas bilong mekim ol bikpela disisen. Tasol sik bilong mi i go bikpela, olsem na mi mas i go kamap long kot. I gutpela olsem loya i harim kot i tok, insait long 30 de mi mas painim wanpela dokta husat inap mekim operesen na mi no ken kisim blut.
Yu bin painim wanpela dokta?
Gutpela samting i kamap, mipela i painim wanpela dokta paslain long taim kot i makim. * Hospital Lieson Komiti bilong Ol Witnes Bilong Jehova long hap mipela i stap long en i painim wanpela dokta bilong scoliosis long New York. Na em i wanbel long tingting ol i kamapim na em i laik helpim mi.
Dispela operesen i kamap gut?
Operesen i kamap gut! Dokta Robert M. Bernstein i putim ol liklik hap ain long bun bilong baksait bilong mi na bai ol bun i go kamap stret. Em i mekim 2-pela operesen, 2-pela wik bihain long fes operesen em i mekim narapela operesen.
Bilong wanem ol i mekim 2-pela operesen?
Sapos fes operesen i mekim na mi lusim planti blut, orait namel long dispela taim ol i makim long 2-pela operesen, bodi bilong mi bai inap long kamapim ol retpela sel bilong blut paslain long ol i mekim narapela operesen. Ol dokta i mekim gutpela wok na long 2-pela operesen wantaim mi no bin lusim planti blut. Olsem na mi laik tok tenkyu long ol dispela dokta bikos ol i bin redi na mekim gut operesen. Mi kamap orait gen na mi no bungim ol hevi em pasin bilong kisim blut i save kamapim. *
Dokta i gat wanem tingting long operesen bilong yu?
Ol Dokta i mas rispektim tingting na bilip bilong sikman
Em i amamas tru! Em i tok: “Ol dokta i no ken tingting tasol long mekim ol operesen bilong helpim ol sikman, nogat.” Em i ting olsem ol dokta i mas pilim tingting na bilip bilong sikman na dispela inap helpim ol. Planti ol man, maski ol i no Witnes Bilong Jehova, ol tu bai wanbel long dispela tingting.
^ par. 7 Mama bilong Song Hee em wanpela Witnes Bilong Jehova. Song Hee i gat wankain bilip olsem mama bilong em. Em i kisim baptais long 2012 taim em i gat 16 krismas.
^ par. 17 Hospital Lieson Komiti i save helpim ol Witnes i gat sik long painim ol dokta husat inap long helpim gut ol na ol i no givim blut long ol.
^ par. 21 Long wanpela atikol i stori long ol hevi i save painim ol man husat i kisim blut, lain Clinical Excellence Commission bilong New South Wales long Australia i tok: “Pasin bilong kisim blut i wankain long man i kisim wanpela hap bilong bodi bilong narapela man. Taim ol i putim dispela hap bilong bodi long narapela, em bai i no inap long wok gut bikos em i no hap bilong bodi bilong em. Olsem na i klia tru olsem pasin bilong kisim blut i save kamapim ol hevi.”
