Hechos 9:1-43
9 Pe ja Saulo mini xyaʼakan yajel xiwuk ja snebʼumanik ja Kajwaltiki sok wani skʼana oj smil ja nebʼumaniki. Ja yuj waj ja bʼay ja mero olomal sacerdote
2 sok skʼanayi kartaʼik sbʼaja naʼitsik wa stsomo sbʼaje* bʼa Damasco bʼa jachuk oj yijan mochan bʼa Jerusalén chikan maʼ kristyanoʼil staʼa sok tixa ay ja bʼa sBʼej ja Kajwaltiki, sea winik ma ixuk.
3 Jaxa yajni wajum bʼa Damasco sok ojxta kʼotuk, junta chʼaykʼujol lijpi sbʼaj jun ijlabʼ bʼa satkʼinal,
4 jaxa yeʼn mokʼ man luʼum sok yabʼ jun kʼumal bʼa alji yabʼi: «Saulo, Saulo, ¿jas yuj waxa wiʼaj jpatiki?».
5 Ja yeʼn sjobʼo: «¿Machunkilukaʼa, Kajwal?». Jaxa yeʼn sjakʼayi: «Keʼnon ja Jesús, ja maʼ wana yijel spatiki.
6 Pe ja wego kʼeʼan sok ochan ja bʼa chonabʼi, sok ti oj aljukawabʼ tiw jasa tʼilan oja kʼuluki».
7 Jaxa winike matik wajumsoki mini xnijkiye sok mi xbʼobʼ kʼumanuke, yujni wane yabʼjel jun kʼumal pe mini maʼ xyilawe.
8 Ja Saulo tixa stulu sbʼaj ja bʼa luʼumi, sok ama sjamunej ja sati, mini xyila kʼinal. Ja yuj xchechawe och bʼa Damasco.
9 Mini yila kʼinal oxe kʼakʼu, sok mi waʼi sok mi jas yuʼaj.
10 Ja bʼa Damasco ay jun nebʼuman sbʼiʼil Ananías, jaxa Kajwaltiki yala yabʼ bʼa jun nakʼsatal: «¡Ananías!». Ja yeʼn sjakʼa: «¿Jasa, Kajwal?».
11 Ja Kajwaltiki yala yabʼi: «Kʼeʼan, sok kaʼax ja bʼa calle sbʼiʼil Toj sok leʼa ja bʼa snaj ja Judas jun winik bʼa Tarso sbʼiʼil Saulo. Pes ja yeʼn wani yajelyi orasyon
12 sok yilata bʼa jun nakʼsat wa x-ochkʼot jun winik sbʼiʼil Ananías sok wa xyaʼa kajan ja skʼabʼ bʼa yeʼna bʼa oj yil kʼinal».
13 Pe ja Ananías sjakʼayi: «Kajwal, jel kabʼunej yabʼalil sbʼaja winik it sok sbʼaja jastal jel yixtalan jawa nebʼumanik ja bʼa Jerusalén.
14 Jaxa il ayiʼoj ja cholal bʼa sparte ja olomalik sacerdote bʼa syamjel* yibʼanal ja matik wa spatawe kʼujolal ja bʼa wa bʼiʼili».
15 Pe ja Kajwaltiki yala yabʼi: «Kaʼax, yujni ja winik it jun yamkʼabʼal jtsaʼunej bʼa oj yiʼoch ja jbʼiʼil sbʼaja matik mi judíoʼuki, cha jachuk sbʼaja matik reyi sok sbʼaja yuntikil ja Israel.
16 Yujni ja keʼn oj jeyi jaman lek yibʼanal ja wokolik tʼilan oj yiʼ yuja jbʼiʼili».
17 Ja yuj ti waj ja Ananíasi, och ja bʼa naʼitsi, yaʼa kajan ja skʼabʼ bʼa yeʼna sok yala yabʼi: «Saulo, kala hermano, ja Kajwaltik Jesús, ja maʼ sjeʼa sbʼaj amok ja bʼa bʼej jakuma, sjekunejon bʼa oja wil kʼinal sok bʼa oj koʼuka bʼaj ja yip ja Dyosi».*
18 Sok wegoxta mokon ja bʼa sat jastal skajlabʼil chay, jaxa yeʼn yila kʼinal. Anto ti stulu sbʼaja sok yiʼaj jaʼ,
19 jaxa yeʼn tixa waʼ tʼusana sok jul ja yipi.
Tixa kan jujuntik kʼakʼu soka nebʼumanik teye bʼa Damasco
20 sok wegoxta och xchol sbʼaja Jesús ja bʼa naʼitsik wa stsomo sbʼajeʼi sok wa xyala ja Jesús yeʼnani ja Yunin ja Dyosi.
21 Pe yibʼanale ja matik wa xyabʼyeʼi jelni x-ochkan spensare sok wa xyalawe: «¿Mi maʼ yeʼnuk ja winik it bʼa jel tsats och yixtalaʼuk ja bʼa Jerusalén ja matik wa spatawe kʼujolal ja bʼa bʼiʼilal it? ¿Mi maʼ jakelukni ja il bʼa syamjel och sok yijel och* bʼa stiʼ sate ja olomalik sacerdote?».
22 Pe ja Saulo wanxta snebʼjel mas ja xcholjeli, sok yuja wa sjeʼa jaman lek ja Jesús yeʼnani ja Kristo, wani xjomji yolome ja judíoʼik teye bʼa Damasco.
23 Yajni ekʼ jitsan kʼakʼu, ja judíoʼiki xchapawe yabʼalil oj smil-e.
24 Pe ja Saulo yabʼ yabʼalil ja jas wane xchapjel sbʼaja yeʼn. Yuja kʼakʼu akwal wa stalnaye ja puertaʼik bʼa oj smil-e,
25 ja snebʼumaniki skoltaye bʼa jun akwal, pes bʼa jun sjotol ja niwan barda ti yawe koʼuk bʼa jun moʼoch.
26 Yajni kʼot ja bʼa Jerusalén, ja yeʼn sleʼani modo ajyelsok ja nebʼumaniki, pe yibʼanale wa xiwyeyuj yujni mi skʼuʼane ta junxa nebʼuman.
27 Ja yuj ja Bernabé waj skoltay sok yiʼaj och bʼa stiʼ sate ja jekabʼanumiki. Tixa xcholo yabʼye tsʼikan lek ja Saulo yilani ja Kajwaltik ja bʼa bʼeji, kʼumajiyuj sok mini tʼun xiwel xcholo bʼa sbʼiʼil ja Jesús ja bʼa Damasco.
28 Anto ja Saulo ti kansok ja yeʼnleʼi, sok wani xwaj ekʼ chikan bʼa wa skʼana ja bʼa* Jerusalén sok mini tʼun xiwel wa xcholo bʼa sbʼiʼil ja Kajwaltiki.
29 Ja yeʼn wa x-ochsok loʼil ja judíoʼik wa xkʼumaniye griego sok tarega wa skʼana oj ya yabʼye stojol.* Pe ja yeʼnleʼi jitsan ekʼele sleʼawe modo smiljel.
30 Yajni yabʼye ja hermanoʼiki, tixa yiʼaje bʼa Cesarea sok sjekawe bʼa Tarso.
31 Anto, bʼa yibʼanal ja Judea, ja Galilea sok ja Samaria, ja kongregasyoni och bʼa jun tyempo bʼa lamanil sok yijbʼi lek. Sok yuja wani xiwyeyuj ja Jyoba* sok wa x-aji kulan skʼujole yuja yipi,* och jitsanbʼuk.
32 Pe yuja Pedro wajum ekʼ bʼa yibʼanal ja lugarik, ti cha koʼko bʼa yulatajel ja nebʼumanik tey bʼa Lida.
33 Ja tiw ti yila jun winik sbʼiʼil Eneas, ja yeʼn mini xbʼobʼ snik sbʼaj sok ayxa waxake jabʼil tey bʼa chʼat.
34 Ja Pedro yala yabʼi: «Eneas, ja Jesukristo oj ya tojbʼan. Kʼeʼan sok tulukan jawa chʼati». Jaxa yeʼn wegoxta kʼe tekʼan.
35 Yajni yilawe yibʼanal ja matik teye bʼa Lida sok ja bʼa lajan kʼinal bʼa Sarón, ochye kʼuʼumanil* bʼa Kajwaltik.
36 Ja bʼa Jope ay jun nebʼuman sbʼiʼil Tabita, ja sutubʼali Dorcas.* Ja yeʼn wa skʼulan jitsan jastik lek sok jel wa skoltay ja matik ay snesesida.*
37 Pe ja bʼa kʼakʼujik jaw, koʼ chamel sok chami. Ja yuj yawe atnuk sok ti yaʼawe bʼaʼan bʼa jun kuarto tey bʼa kʼeʼel.
38 Jaxa Lida mojan yiʼoj ja Jope, ja yuj yajni yabʼye ja nebʼumanik tey ja Pedro bʼa chonabʼ jaw, sjekawe chabʼ winike bʼa spatjelyi skʼujol: «Awa pabor, laʼ wego ja bʼaytikoni».
39 Jaxa Pedro wegoxta stulu sbʼaj sok wajsoke. Yajni kʼoti, ti yiʼaje ja bʼa kuarto tey bʼa kʼeʼeli. Sok yibʼanal ja biudaʼiki jakye bʼa stiʼ sat ja Pedro, ja yeʼnleʼi wanexta okʼel sok naka sjeʼaweyi ja kʼuʼalik sok ja pal kʼuʼalik skʼulan ja Dorcas yajni sakʼanto.
40 Anto ja Pedro chʼak ya eluk bʼa juera yibʼanale, koʼ mekʼan sok yayi orasyon. Tixa sutu sbʼaj ja bʼay ja skuerpo ja Tabita sok yala: «Tabita, ¡kʼeʼan!». Jaxa yeʼn sjama ja sati, sok kechan pabor yila ja Pedro, kʼe jachan.
41 Ja yeʼn syamayi ja skʼabʼ bʼa yajel kʼeʼuk tekʼan. Tixa spaya ja nebʼumaniki sok ja biudaʼiki, sok sakʼanxa ay yaʼa ja bʼa stiʼ sate.
42 Yibʼanal ja Jope yabʼ yabʼalil sbʼaja it, sok jitsan skʼuʼane sbʼaja Kajwaltiki.
43 Ja Pedro tito kan jitsan kʼakʼu bʼa Jope bʼa snaj jun winik sbʼiʼil Simón, ja it maʼ wa skʼumbʼes tsʼuʼumi.
Notaʼik
^ Jach kanel ja bʼa griego: «sinagogaʼik». Kʼela ja bʼa Yaljelik cholubʼal, Sinagoga.
^ Jach kanel ja bʼa griego: «smochjel», «yajel och skadenaʼil».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jach kanel ja bʼa griego: «mochan oj yiʼ och».
^ Jach kanel ja bʼa griego: «wanxta ochel sok elel ja bʼa».
^ Ma «sok wa xkʼesok niwak kʼumal».
^ Kʼela ja bʼa Yaljelik cholubʼal.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «kreyenteʼil».
^ Ja bʼiʼilal Dorcas ja bʼa griego sok ja bʼiʼilal Tabita ja bʼa arameo wa stojolan jun tikʼe yal kʼujlal chej.
^ Ma «jel wa xyaʼa majtanal bʼa yajulal kʼujol».
