Hechos 19:1-41
19 Yajni tey bʼa Corinto ja Apolosi, ja Pablo ti ekʼ bʼa yoj slujmal Asia sok koʼko bʼa Éfeso. Ti staʼa tiw jujuntik nebʼumanik
2 sok sjobʼoyile: «¿Aji maʼ wilex ja yip ja Dyos* ja yajni ochyex kʼuʼumanili?». Jaxa yeʼnleʼi sjakʼaweyi: «Mini bʼa kabʼunejtikon yabʼalil ta ay yip Dyos».
3 Ja yeʼn yala yabʼye: «Anto, ¿jas yijel jaʼ awiʼajex?». Jaxa yeʼnleʼi sjakʼaweyi: «Jani it ya’a ja Juani».
4 Ja Pablo yala: «Ja Juan ya yiʼ jaʼ ja kristyano jastal senya bʼa sutxita skʼujole sok wa xyala yabʼ ja chonabʼ a-skʼuʼuke sbʼaja maʼ ti jakum tsaʼani, wa xkʼan alxuk, sbʼaja Jesús».
5 Yajni yabʼye ja it, ja yeʼnleʼi yiʼaje jaʼ bʼa sbʼiʼil ja Kajwaltik Jesús.
6 Yajni ja Pablo yaʼa kajan ja skʼabʼ bʼa yeʼnle, koʼ sbʼaje ja yip ja Dyosi* sok kʼe kʼumanuke bʼa tuktukil kʼumal sok och yal-e jasa oj ekʼuki.
7 Ja yibʼanaleʼi wajye junuk 12 winike.
8 Jaxa yeʼn, tixa och ja bʼa naʼits wa stsomo sbʼaje sok mini tʼun xiw yaʼa sloʼil oxe ixaw sok slejel modo bʼa yajel kʼokxuke sbʼaja sGobyerno ja Dyosi.
9 Pe jujuntik jel chʼuʼuy wajye sok mi skʼana oj skʼuʼuke, sok wa staʼawe tiʼal malo bʼa stiʼ sat ja kristyano ja sBʼej ja Kajwaltiki. Ja yujil, ja Pablo yaʼakan ja kristyanoʼik jaw sok spila ja nebʼumaniki. Sok kʼakʼu kʼakʼu wa xya ekʼ loʼilik ja bʼa eskuela bʼa Tirano.
10 Jach skʼulan chabʼ jabʼil, ja yuj ja judíoʼik soka griegoʼik yibʼanale ja matik teye ja bʼa parteʼik bʼa Asia, yabʼye ja yabʼal ja Kajwaltiki.
11 Ja Dyosi mini yaʼakan yajel makunuk ja Pablo bʼa skʼulajel jastik jel chaʼanyabʼalil.
12 Asta wa xyiʼaje ochyi ja matik maloʼay ja yal kʼuʼutsik sok ja mandilik staʼunej ja skuerpo ja Pablo, sok wa xtojbʼiye soka chamelik yiʼojeʼi, jaxa pukujik* jel malo wa x-el ja bʼa yeʼnle.
13 Pe jujuntik judíoʼik bʼa wa xwajye bʼa tuktukil lugar bʼa yajel el pukujik jel malo cha sleʼawe modo yajel makunuk ja sbʼiʼil ja Kajwaltik Jesús sbʼaja matik ochel sbʼaj pukujik* jel malo. Wa xyalawe: «Ja keʼn wa xkawilex mandar oj elanik bʼa sbʼiʼil ja Jesús, sbʼaja maʼ wa xcholo ja Pablo».
14 Jani it ja jas wa skʼulane ja juke yuntikil jun olomal sacerdote judío sbʼiʼil Esceva.
15 Pe ti jakʼjiyile yuj jun pukuj* jel malo: «Wa xnaʼa machunkiluk ja Jesús sok wa xnaʼa machʼa ja Pablo. Pe ¿machunkilukex ja weʼnlexi?».
16 Anto ja winik maʼ ochel sbʼaj ja pukuj* jel malo och tiroʼanuk soka yeʼnleʼi sok jujune chʼak skʼul ganar. Jaxa yeʼnle bʼasan sok yajbʼele spakawe ajnel ja bʼa naʼits jawi.
17 Sok yibʼanal ja judíoʼik sok ja griegoʼik teye bʼa Éfeso, yabʼye yabʼalil ja jas ekʼeli. Ja yuj yibʼanale jel och xiwele, jaxa sbʼiʼil ja Kajwaltik Jesusi jel och toyjuk.
18 Sok jitsan ja bʼa matik ochyeta kʼuʼumanili* wa xwaj yal-e sok wa xwaj xchol-e jaman lek ja jas wa skʼulaneʼi.
19 Pes jitsan ja bʼa matik skʼulane jastik bʼa magia stsomowe ja slibroʼeʼi sok ti stsikawe bʼa stiʼ sat ja tuki. Yawe el kuenta janekʼ stsʼakol, sok elkʼot 50,000 sat plata.
20 Sok jachuk ja yabʼal ja Jyoba* och pukxuk ele sok jel och staʼ yip.
21 Yajni ekʼ yibʼanal ja it, ja Pablo xchapa* ke yajni x-ekʼ ja bʼa Macedonia sok ja bʼa Acaya, tixa oj waj bʼa Jerusalén. Cha yala: «Yajni wajyonta ja tiwi, cha tʼilani oj wajkon bʼa Roma».
22 Ja yuj sjeka chawane skoltanumik ja bʼa Macedonia: ja Timoteo soka Erasto. Pe ja yeʼn ti kan jun tyempo ja bʼa parteʼik bʼa Asia.
23 Ja bʼa tyempo jaw kʼe jun niwan kʼumal yuja sBʼej ja Kajwaltiki.
24 Pes jun winik sbʼiʼil Demetrio, june maʼ wa stojbʼes yal chʼin temploʼik bʼa plata bʼa Ártemis, wa skoltay ja smojiki bʼa oj cha staʼe jitsan sganare.
25 Anto ti stsomo ja kʼulumaniki sok ja maʼ junxtatik ja yaʼteleʼi sok yala: «Winike jumasaʼ, ja weʼnlexi wani xa naʼawex jani wa xkʼulantik ganar yuja negosyo it.
26 Jaxa wego waxa wilawex sok waxa wabʼyex, ke mi kechanuk ja bʼa Éfeso, bʼa tʼusan mi yibʼanaluk ja bʼa parteʼik bʼa Asia, ja tan Pablo jaw yaʼunej kʼokxuk jitsan kristyano sok yaʼunej tukbʼuk spensare yuja wa xyala ja dyosik kʼulubʼal sok kʼabʼali mini meran dyosuke.
27 Chomajkil, mi kechan xiwela sbʼaj oj chʼayuk ja jastal jel lek xnaji sbʼaj ja jnegosyotiki, cha xiwelani sbʼaj oj ijnajuk ja stemplo ja niwan dyos ixuk sbʼiʼil Ártemis. Jaxa ixuk dyos it, ja maʼ wa xtoyjiyuj yibʼanal ja bʼa parteʼik bʼa Asia sok spetsanil ja swinkil ja luʼumi, ojni chʼayuk ja stoyjelali».
28 Yajni yabʼye ja it, ja winikeʼi jel tajkiye sok och awanuke: «¡Jel niwan ja Ártemis ja sdyose ixuk ja efesioʼiki!».
29 Ja yuj kʼe jun niwan kʼumal ja bʼa chonabʼi, sok yibʼanale ajnelxta ochye ja bʼa teatro* sok skichuneje och ja Gayo soka Aristarco, chabʼ Macedonioʼik smoj biaje ja Pablo.
30 Jaxa Pablo wani skʼana oj ochuk ja bʼaye ja kristyano, pe mini skʼanawe ja nebʼumaniki.
31 Asta jujuntik ja bʼa matik wa xchapawe kʼinik sok tajnelik, bʼa yamigoʼeni ja Pablo, sjekaweyi jun rason sok spataweyi skʼujol bʼa mokni tʼun wajuk ja bʼa teatro.*
32 Jaxa bʼa jutsʼin jaw, tuktukilxta ja jas wane yaljeli, pes ja matik teye tsomani jomta yolome sok tʼusan mi yibʼanaluke ja yeʼnleʼi mi snaʼawe jas yuj ti tsomane.
33 Ja yuj ja bʼa yoj nole kristyano ti yawe eljan ja Alejandro, ja maʼ sjutbʼinejan ja judíoʼiki. Jaxa Alejandro sjeʼa senya soka skʼabʼi yujni wa skʼana oj skolta sbʼaj bʼa stiʼ sat ja chonabʼi.
34 Pe yajni yaʼa sbʼaje kuenta ke jun judío, yibʼanale och awanuke junxta lajan. Jach yalawe chabʼ ora: «¡Jel niwan ja Ártemis ja sdyose ixuk ja efesioʼiki!».
35 Yajni ja maʼ ay yaʼtel ja bʼa chonabʼ ya lamxuk ja nole kristyano, ti yalaʼa: «Winike bʼa Éfeso, ¿yuj maʼ ay jun kristyano bʼa mi snaʼa ke ja Éfeso jani ja chonabʼ wa stalna ja stemplo ja niwan Ártemis sok ja imajen mokon bʼa satkʼinali?
36 Mini maʼ wa skʼulan dudar sbʼaja it, ja yuj aʼawik kulan sok mok jasa kʼulukex ajnel jomolxta.
37 Ja winike awiʼonejexjani mi elkʼanumuke bʼa temploʼik sok mi kʼumaneluke kistal sbʼaja ixuk jdyostiki.
38 Ja yujil, ta ja Demetrio sok ja kʼulumanik teyesoki ayiʼoje jun keja sbʼa jun kristyano, jaʼ xchol ay skʼakʼujil wa stsomo sbʼaje ja juesiki sok ja yuj ay gobernadorik.* Anto ayal-e tiw ja smul staʼunejeyi ja smojeʼi.
39 Pe ta ja weʼnlexi ay jas mas wanex slejel, ja it tʼilani ti oj tojbʼesxuk bʼa jun junta jastalni wa xyala ja leyi.
40 Yujni xiwela sbʼaj ayotik bʼa oj jlejuk jmultik bʼa wantik skontraʼajel ja gobyerno yuja jas wan ekʼel ja wego, yujni mey kiʼojtik jun preba jas yuj wan kʼeʼel ja kʼumal it».
41 Yajni chʼak yal ja it, tixa chʼak ja sjuntaʼeʼi.
Notaʼik
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «kreyenteʼili».
^ Kʼela ja bʼa Yaljelik cholubʼal.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja it jun lugar bʼa wa xbʼobʼ stsom sbʼaje ja kristyano. Ja lugar it setantik, kʼulubʼalsok ton sok wa xbʼobʼ ochuk junuk 25,000 kristyano.
^ Ja it jun lugar bʼa wa xbʼobʼ stsom sbʼaje ja kristyano. Ja lugar it setantik, kʼulubʼalsok ton sok wa xbʼobʼ ochuk junuk 25,000 kristyano.
^ Kʼela ja bʼa Yaljelik cholubʼal, Gobernador.
