Apocalipsis 7:1-17
7 Tsaʼan ja bʼa it kila tekʼane ekʼ chane anjel ja bʼa xchanil xchikin ja luʼumi. Ja yeʼnleʼi wane smakjel ja ikʼ wan eleljan ja bʼa xchanil slado ja luʼumi bʼa jachuk mok sjuʼ ikʼ ja bʼa luʼumi, ja bʼa mari sok ja bʼa teʼaltiki.
2 Cha kila pilan anjel bʼa wan elelkʼen ja bʼa wa x-el ja kʼaʼuji. Jaxa yeʼn yiʼojyi jun seyo ja sakʼan Dyosi, sok tsats lek yawan ja chane anjelik matik akʼubʼalyile permiso oj yixtalaʼuke ja luʼum sok ja mari.
3 Sok yala yabʼye: «¡Moka wixtalaʼukex ja luʼumi, ja mari sok ja teʼaltetiki man xkʼulantikon seyar ja bʼa spatane ja smosoʼe ja jDyostiki!».
4 Sok ti kabʼ janekʼe ja matik kʼulajiye seyari: kʼulajiye seyar 144,000 bʼa spetsanil ja kʼole bʼa yuntikil ja Israel.
5 Ja bʼa kʼole bʼa Judá, kʼulaji seyar 12,000;ja bʼa kʼole bʼa Rubén, 12,000;ja bʼa kʼole bʼa Gad, 12,000;
6 ja bʼa kʼole bʼa Aser, 12,000;ja bʼa kʼole bʼa Neftalí, 12,000;ja bʼa kʼole bʼa Manasés, 12,000;
7 ja bʼa kʼole bʼa Simeón, 12,000;ja bʼa kʼole bʼa Leví, 12,000;ja bʼa kʼole bʼa Isacar, 12,000;
8 ja bʼa kʼole bʼa Zabulón, 12,000;ja bʼa kʼole bʼa José, 12,000;ja bʼa kʼole bʼa Benjamín, kʼulaji seyar 12,000.
9 Tsaʼan ja bʼa it kila jun niwan nole kristyano bʼa mini maʼ wa xbʼobʼ ya kuenta. Ja yeʼnleʼi jakele bʼa yibʼanal ja chonabʼik, kʼoleʼik, lugarik sok kʼumalik, sok ti tekʼane bʼa stiʼ ja trono sok bʼa stiʼ sat ja Cheji. Slapuneje sakal snajtil skʼuʼe sok yamanyujile spowil palmera.
10 Sok tsatsxta wane awanel: «¡Ja koltaneli tini wa xjak bʼa jDyostik, ja maʼ kulan ekʼ bʼa trono, sok bʼa Cheji!».
11 Yibʼanal ja anjeliki ti tekʼane ekʼ bʼa sjoyanal ja trono, sok bʼa sjoyanal ja ansyanoʼiki sok ja bʼa chane querubini; sok koʼye mekʼan bʼa stiʼ ja trono sok stoyowe ja Dyosi.
12 Sok yalawe: «¡Amén! Ja jDyostik maʼ ayiʼoj biboʼil sok ipal tʼilani atsʼebʼantaxuk, atoyxuk, akisxuk sok aʼaxukyi tsʼakatal bʼa tolabida. Amén».
13 Anto june ja bʼa ansyanoʼiki sjobʼoki: «¿Machunkiluke ja matik lapanyujile ja najtil sakal kʼuʼali? ¿Sok bʼa jakeleʼa?».
14 Ja yuj wegoxta jakʼayi: «Kala kajwal, weʼnani ja maʼ wa snaʼa». Anto ja yeʼni yalakabʼi: «Yeʼnleni ja matik wa xkanye sakʼan ja bʼa niwan wokoli; xchukʼuneje ja snajtil skʼuʼe sok yaʼuneje sakbʼuk soka xchikʼel ja Cheji.
15 Ja yuj teye bʼa stiʼ strono ja Dyosi sok kʼakʼu akwal wane yaʼteltajel ja bʼa stemplo. Sok jaxa Maʼ kulan ekʼ ja bʼa trono oj xchapyile jun karpa naʼits bʼa oj stalnaye.
16 Mixa oj stekʼe waʼin sok mixani oj takuk stiʼe; cha mixani ojto chʼakuke kʼaʼuj sok mixato jas oj tsikjukeyuj.
17 Yujni ja Chej, ja it maʼ tey bʼa stsʼeʼel ja trono, oj stalna sok oj yiʼ och bʼa ay olom jaʼik bʼa sakʼanil. Sok jaxa Dyosi oj skusyi ja yalel sateʼi».
