Apocalipsis 5:1-14
5 Ja b’a stojol skʼabʼ ja Ma’ kulan ekʼ ja b’a trono ti kila jun royo tsʼijbʼunubʼal bʼa xchabʼil lado.* Lutubʼal lek sok juke seyo.
2 Sok ti kila jun anjel b’a jel ja yipi b’a tsatsxta wan yaljel: «¿Maʼ wa sbʼajin yajel eluk ja seyoʼik sok sjamjel ja royo?».
3 Pe mini june ja bʼa satkʼinali, mini ja bʼa luʼum sok mini ja bʼa yibʼ luʼumi wa xbʼobʼ sjam ja royo sok yiljel ja jas tsʼijbʼunubʼal ja tiwi.
4 Sok ti kʼe okon tsats lek yujni mi xtax maʼ wa sbʼajin oj sjam ja royo sok yiljel ja jas tsʼijbʼunubʼal ja tiwi.
5 Pe june ja bʼa ansyanoʼiki yalakabʼi: «Mokxa okʼan. Kʼela, ja Choj ja bʼa kʼole bʼa Judá, ja maʼ elel ja bʼa spamilya* ja David, skʼulanta ganar. Ja yuj ja yeʼni wa xbʼobʼ sjam ja juke seyo sok ja royo».
6 Ja bʼa mojan b’ay ja trono sok bʼa yoj snalan ja chane querubini sok ja ansyanoʼiki, ti kila ti tekʼan ekʼ jun chej bʼa lajansok akʼubʼalxa jastal majtanal. Ayiʼoj juke skacho sok juke sat. (Ja satali jani wa senyaʼan ja juke yip ja Dyosi* bʼa jekubʼale bʼa yibʼanal ja luʼumi).
7 Ja Cheji wegoxta mojxi sok yiʼaj ja royo tey bʼa stojol skʼabʼ ja Maʼ kulan ekʼ bʼa trono.
8 Yajni yiʼaj ja royo, ja chane querubini sok ja 24 ansyanoʼiki koʼye mekʼan bʼa stiʼ sat ja Cheji. Kada jujune ayiʼoje jun arpa sok tasaʼik bʼa oro bʼutʼel incienso.* (Ja incienso jaʼ wa senyaʼan ja yorasyon ja matik tsaʼubʼalexa sbʼaja Dyosi).
9 Sok wa stsʼebʼantaye jun yajkʼachil tsʼebʼoj bʼa wa xyala: «Wani xa bʼajin oja wiʼ ja royo sok sjamjel ja seyoʼik yiʼoji, yujni ajiya jastal majtanal sok jawa chikʼeli amanayi ja Dyos kristyanoʼik bʼa tuktukil kʼole, kʼumal, lugar sok chonabʼ.
10 Ja weʼn awaʼakan bʼa akʼotuke jun gobyerno sok sacerdoteʼik bʼa yaʼteltajel ja jDyostiki. Sok jaxa yeʼnleʼi oj yaʼe mandar sbʼaja luʼumi».
11 Ti jkʼelaʼa, sok kabʼ ja skʼumal jitsan anjelik ja bʼa sjoyanal ja trono, ja bʼa sjoyanal ja querubiniki sok ja bʼa ansyanoʼiki. Aye jitsan ekʼele diez mil* sok jitsan ekʼele mil,
12 sok tsatsxta wane yaljel: «Ja Chej bʼa aji jastal majtanal sbʼejni oj ajukyi ja cholali, ja rikesaʼil, ja biboʼil, ja ipal, ja kisjelal, ja toyjelal sok ja lekilali».
13 Sok ti kabʼ yibʼanal ja kʼulbʼenik ay ja bʼa satkʼinal, ja bʼa luʼum, ja bʼa yibʼ luʼum sok ja bʼa mar, yibʼanal ja jas ay ja bʼa yeʼnleʼi, wane yaljel: «Ja Maʼ kulan ekʼ ja bʼa trono sok ja Cheji, ja matik jel yipe bʼa tolabida, aʼaxukyile ja lekilal, ja kisjelal sok ja toyjelal».
14 Ja chane querubini wane yaljel: «¡Amén!». Jaxa ansyanoʼiki koʼye mekʼan sok yaweyi stoyjel ja Dyosi.
Notaʼik
^ Jach kanel ja bʼa griego: «bʼa yojol sok bʼa spatik».
^ Jach kanel ja bʼa griego: «yech».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «pom». Kʼela ja bʼa Yaljelik cholubʼal.
^ Ma «Aye diez mil ekʼele diez mil».
