Ko e hā hoʻo fakakaukaú? ʻOku poupouʻi ʻe he ʻOtuá ʻa e taú? Kapau ko ia, ko fē faʻahi ʻokú ne kau ki aí ʻi he ngaahi fepaki ʻo e ʻaho ní? Ko hono ʻilo ʻa e tali ki he ngaahi fehuʻi ko ení ʻoku ʻi ai ʻene kaunga ki hoʻo vakai ki he taú. Ko e fakatātaá, kapau ʻokú ke ʻiloʻi ʻoku ʻikai ngata pē hono poupouʻi ʻe he ʻOtuá ʻa e taú pea kau ki he faʻahi ʻokú ke kau ki aí, ngalingali te ke ongoʻi lelei ange ʻi hoʻo ʻiloʻi ʻe ikuna hoʻo faʻahí. ʻI he tafaʻaki ʻe tahá, ʻe fēfē hoʻo ongoʻí ʻi hoʻo ʻiloʻi ʻoku poupouʻi ʻe he ʻOtuá ʻa e faʻahi ʻe tahá? Mahalo te ke toe fakakaukau ki ho tuʻungá.

ʻOku ʻi ai ha meʻa ʻoku toe mafatukituki ange. Ko hono ʻiloʻi e anga ʻo e vakai ʻa e ʻOtuá ki he taú ʻe kaunga nai ia ki he anga hoʻo vakai ki he ʻOtuá. Kapau ko e taha koe ʻi he laui miliona kuo fakamamahiʻi ʻi he taú, ʻoku ʻikai ha veiveiua ʻa e fiemaʻu ke ke ʻilo ʻa e tali ki he fehuʻi, ko e ʻOtuá, hangē ko e tui ʻa e niʻihi, ko ha tokotaha ʻokú ne fakalanga ʻa e taú pe fakatupunga ʻa e ngaahi faingataʻa ʻi he taú, pe mahalo ʻokú ne fakaʻatā mo tukunoaʻi ʻa e ngaahi fakamamahi ʻi he taú?

Te ke ʻohovale nai ʻi he ʻiloʻi ʻoku kehe ʻaupito ʻa e tali ʻi he Tohi Tapú. ʻIkai ko ia pē, mei he kuohilí ki he ʻahó ni, kuo kei tatau pē e vakai ʻa e ʻOtuá ki he taú. Tau lāulea angé ki he meʻa ʻoku leaʻaki ʻe he Tohi Tapú ki he vakai ʻa e ʻOtuá ki he taú ʻi he kuonga muʻá mo e ʻuluaki senitulí, ʻi he taimi naʻe ʻi māmani ai ʻa Sīsuú. ʻE tokoni eni kia kitautolu ke ʻiloʻi e vakai ʻa e ʻOtuá ki he taú ʻi he ʻahó ni pea naʻa mo e hoko ʻa e taú ʻi he kahaʻú.