Ngaahi Fehuʻi mei he Kau Lautohí

ʻE fakapotopoto ki ha Kalisitiane moʻoni ke kau ki ha putu pe ko ha mali ʻi ha fale lotu?

Ko ʻetau kau ki ha founga pē ʻo e lotu loí ʻoku taʻefakahōifua ia kia Sihova pea kuo pau ke fakaʻehiʻehi mei ai. (2 Kolinito 6:​14-​17; Fakahā 18:4) Ko ha putu ʻi ha fale lotu ko ha ngāue fakaelotu ia ʻoku ngalingali ke kau ki ai ha malanga ʻo pouaki ʻa e ngaahi fakakaukau taʻefakatohitapu ko ia hangē ko e taʻefaʻamate ʻa e soulú mo ha pale fakahēvani ki he kakai lelei kotoa pē. ʻE toe kau nai ki ai ʻa e ngaahi tōʻonga ko ia hangē ko hono ʻai ʻa e fakaʻilonga kolusé mo e kau fakataha ʻi he lotú mo e pātelé pe ko e faifekaú. Ko e ngaahi lotu mo e ngaahi tōʻonga fakalotu kehe ʻoku fepaki mo e akonaki ʻa e Tohitapú ʻe toe hoko nai ia ko e konga ʻo ha kātoanga mali fakalotu ʻoku fai ʻi ha fale lotu pe ʻi ha feituʻu kehe. Ko e ʻi ha kulupu ʻa ia ʻoku kau ai ʻa e tokotaha kehe kotoa ʻi ha tōʻonga fakalotu loí, ʻe ʻiloʻi nai ai ʻe ha Kalisitiane ʻa e faingataʻa ke talitekeʻi ʻa e tenge ke kau ki aí. He taʻefakapotopoto moʻoni ē ke fakaʻasi kita ki he tenge peheé!

Fēfē kapau ʻoku ongoʻi ʻe ha Kalisitiane ʻokú ne moʻuaʻaki ke kau ki ha putu pe ko ha mali ʻoku fai ʻi ha fale lotu? Ko e fakatātaá, ʻe uki nai ʻe ha husepāniti taʻetui ʻa hono uaifi Kalisitiané ke ne kau fakataha mo ia ʻi ha kātoanga pehē. ʻE lava ke ne kau fakataha mo ia ʻi he tuʻunga ko ha tokotaha mamata fakalongolongo pē? ʻI he tokanga ki he ngaahi fakaʻamu ʻa hono husepānití, ʻe fili nai ʻa e uaifí ke ʻalu mo ia, ʻi he fakapapauʻi ke ʻoua ʻe kau ʻi ha ngaahi ouau fakalotu pē. ʻI he tafaʻaki ʻe tahá, te ne fili nai ke ʻoua ʻe ʻalu, ʻi he fakakaukau ko e tenge fakaeongo ʻi he ngaahi tuʻungá ʻe lava ke fakamoʻoniʻi ʻe fuʻu tōtuʻa ia kiate ia, mahalo ʻe fakatupunga ai ia ke ne fakangaloku ʻa e ngaahi tefitoʻi moʻoni fakaʻotuá. Ko e filí ʻoku ʻaʻana ia ke fai. Te ne fiemaʻu pau ke fiemālie ʻi hono lotó, ʻi hono maʻu ha konisēnisi maʻa.​​​—1 Timote 1:​19.

ʻI ha tuʻunga pē, ʻe lelei kiate ia ke ne fakamatalaʻi ki hono husepānití ʻe ʻikai lava ke ne kau fakatatau ki hono konisēnisí ki ha ngaahi ouau fakalotu pē pe kau ʻi hono hivaʻi ʻa e ngaahi himí pe punou ʻi he taimi ʻoku fai ai ʻa e lotú. Makatuʻunga ʻi heʻene fakamatalá, te ne fakaʻosiʻaki nai ai ko e ʻi ai ʻa hono uaifí ʻe lava ke malanga hake ai ha tuʻunga ʻa ia ʻe ʻikai lelei nai kiate ia. Te ne fili nai ai ke ʻalu tokotaha ʻi heʻene ʻofa ki hono uaifí, tokaʻi ʻa ʻene ngaahi tuí, pe ko ha holi ke fakaʻehiʻehi mei ha tuʻunga fakamā pē. Ka ʻo kapau ʻokú ne tuʻukāivi ke ne ʻalu mo ia, te ne ʻalu nai mo ia ʻi he tuʻunga ko e tokotaha mamata pē.

ʻOku totonu ke toe fakakaukau ki he uesia ʻe lava ke hoko ki hotau kaungātuí ʻi heʻetau kau ki ha meʻa ʻoku fai ʻi ha fale fakalotu. ʻE lava ke ne maumauʻi ʻa e konisēnisi ʻo ha niʻihi? ʻE lava ke fakavaivaiʻi ai ʻenau talitekeʻi ke kau ʻi he tauhi ʻaitolí? “Fakapapauʻi ʻa e ngaahi meʻa mahuʻinga lahi angé,” ko e enginaki ia ʻa e ʻapositolo ko Paulá, “koeʻuhi ke mou hoko ai ʻo taʻemele pea ʻikai fakatūkiaʻi ʻa e niʻihi kehé ʻo aʻu ki he ʻaho ʻo Kalaisí.”​—Filipai 1:​10, NW.

Kapau ʻoku kau ki he meʻa ʻoku hokó ha kāinga ofi fakakakano, ʻe ʻi ai nai ha ngaahi tenge fakafāmili lahi. ʻI ha tuʻunga pē, kuo pau ki ha Kalisitiane ke ne fakafuofuaʻi fakalelei ʻa e ngaahi meʻa kotoa ʻoku kau ki aí. ʻI he malumalu ʻo e ngaahi tuʻunga ʻe niʻihi te ne fakaʻosiʻaki nai ʻe ʻikai ha ngaahi faingataʻa ʻe malanga hake ʻi he kau ki ha putu pe mali ʻi he tuʻunga ko ha tokotaha mamata. Kae kehe, ko e ngaahi tuʻungá ʻe hoko nai ai ʻi he kau ki aí ke ngalingali maumauʻi ʻa hoto konisēnisí tonu pe ko e konisēnisi ʻo e niʻihi kehé ʻo fakalaka ia ʻi he ngaahi ʻaonga ʻe malava ke hoko ʻi he kau ki aí. Ko e hā pē ʻa e tuʻungá, ʻoku totonu ke fakapapauʻi ʻe he Kalisitiané ʻe ʻikai ke taʻofi ʻe heʻene filí ʻa ʻene tauhi ha konisēnisi lelei ʻi he ʻao ʻo e ʻOtuá pea mo e tangatá.