Līpooti ʻa e Kau Fanongonongo ʻo e Puleʻangá

Hoko ʻo ʻIlo ʻa e ʻOtua Anga-ʻOfá

ʻI HONO taʻu 16, ko ha Pelēsila ko hono hingoá ko Antônio ne ʻosi siva ʻa ʻene ʻamanaki ki he moʻuí. ʻI he ongoʻi ʻo e ʻikai hano ʻaongá naʻe taki atu ai ia ki hono ngāuehalaʻaki ʻo e faitoʻo kona tapú mo e ʻolokaholó. Naʻá ne faʻa fakakaukau fekauʻaki mo hano fai ʻo ha taonakita. Ko e ngaahi mōmeniti ko ʻení naʻá ne manatuʻi ai ʻa e meʻa naʻe talaange ʻe heʻene faʻeé kiate iá: “Ko e ʻOtua ko e ʻOfa.” (1 Sione 4:8) Ka ʻoku ʻi fē ʻa e ʻOtua ʻofa ko ʻení?

ʻI ha feinga ke fakaakeake mei heʻene ngāuekoviʻaki ʻa e meʻa fakatupu maʻunimaá, naʻe kumi tokoni ʻa Antônio mei he faifekau ʻo e siasi fakalotofonuá. Neongo naʻe longomoʻui ʻaupito ʻa Antônio ʻi he Siasi Katoliká, naʻá ne kei maʻu pē ʻa e ngaahi fehuʻi lahi. Ko e fakatātaá, ko e ngaahi lea ʻa Sīsū, “Pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni” naʻá ne fakapuputuʻuʻi ia. (Sione 8:32) Ko e hā ʻa e faʻahinga tauʻatāina naʻe talaʻofa ʻe Sīsuú? Naʻe ʻikai lava ke tokonaki mai ʻe he siasí ha ngaahi tali fakafiemālie ki heʻene ngaahi fehuʻí. Faifai atu pē, naʻe hē mamaʻo ʻa Antônio ʻo toe foki pē ki heʻene ngaahi tōʻonga motuʻá. Ko hono moʻoní, ko hono maʻunimaá naʻe kovi ange.

ʻI he taimí ni, ko e uaifi ʻo Antônio, ʻa Maria, naʻe kamata ke ne ako ʻa e Tohitapú mo e Kau Fakamoʻoni ʻa Sihová. ʻI he ʻikai ke fakafepakiʻi ʻene akó, naʻe tukunoaʻi ʻe Antônio ʻa e Kau Fakamoʻoní ko “ha lotu faka-ʻAmelika ʻoku nau ngāue ki he ngaahi meʻa mahuʻinga ʻa e puleʻanga ʻAmeliká.”

ʻI he ʻikai ke ne loto-siʻí, naʻe tuku takai ʻe Maria ʻi he falé ʻa e ngaahi tatau ʻo e ngaahi makasini Taua Leʻo mo e Awake! ʻa ia ʻoku fakaeʻa ai ʻa e ngaahi kupu ko ia naʻá ne fakakaukau ʻe mahuʻingaʻia nai ai ʻa Antônio. Koeʻuhi ʻoku fiefia ʻa Antônio he lautohí, naʻá ne faʻa sio fakavave ki he ngaahi makasiní ʻi he ʻikai ke ʻi ai ʻa hono uaifí. Ko e ʻuluaki taimi ia ʻi heʻene moʻuí, naʻá ne maʻu ai ʻa e ngaahi tali ki heʻene ngaahi fehuʻi faka-Tohitapú. “Naʻá ku toe kamata ke fakatokangaʻi ʻa e ʻofa pea mo e anga-lelei naʻe fakahaaʻi mai ʻe hono uaifí mo e Kau Fakamoʻoní kiate aú,” ko ʻene manatú ia. ʻI he aʻu ki he konga loto ʻo e 1992, naʻe fakapapauʻi ai ʻe Antônio te ne saiʻia mo ia foki ke ako ʻa e Tohitapú mo e Kau Fakamoʻoni ʻa Sihová. Kae kehe, naʻá ne hokohoko atu pē ʻa hono ngāuehalaʻaki ʻa e ngaahi faitoʻo kona tapú mo e inu ʻo fuʻu lahí. ʻI ha tuʻuapō ʻe taha ʻi heʻene foki ki ʻapi mo hano kaumeʻa mei ha kiʻi kolo masiva, naʻe taʻofi kinaua ʻe he polisí. ʻI he taimi naʻe ʻilo ai ʻe he polisí ha kōkeini ʻi he koloa ʻa Antônio, naʻa nau kamata ke haha ia. Naʻe hikihaʻaki ia ʻe ha polisi ʻe taha ʻi he pelepelá peá ne fakahanga ofi hifo ki hono matá ʻa e ngutuʻi meʻafaná. “Tāmateʻi ia!” ko e kaila atu ia ʻa ha polisi ʻe taha.

ʻI he tokoto ʻa Antônio ʻi he pelepelá, naʻá ne fakamanamanatu ai ki heʻene moʻuí. Ko e ngaahi meʻa lelei pē naʻe lava ke ne manatuʻí ko hono fāmilí mo Sihova. Naʻá ne lotu nounou, ʻo kole ʻa e tokoni ʻa Sihová. Naʻe ʻikai ha ʻuhinga mahino, ʻa e mavahe ʻa e kau polisí meiate iá. Naʻá ne foki ki ʻapi, ʻo tuipau naʻe maluʻi ia ʻe Sihova.

Naʻe toe kamata ke ako ʻa e Tohitapú ʻe Antônio fakataha mo e toe fakafoʻou ʻa ʻene longomoʻuí. Naʻá ne fai māmālie ha ngaahi liliu, koeʻuhí ke fakahōifua kia Sihova. (Efeso 4:​22-24) ʻI hono fakatupulekina ʻa e mapuleʻi-kitá, naʻá ne kamata ke ngāue ki heʻene ngaahi palopalema ʻo e faitoʻo kona tapú. Naʻe aʻu ʻo ne fiemaʻu ha tokoni fakafaitoʻo. ʻI he māhina ʻe ua ʻi ha kilīniki ki he toe fakaakeaké, naʻe ʻoange ai kiate ia ʻa e faingamālie ke ne lau ʻa e ngaahi tohi faka-Tohitapu ʻe niʻihi, ʻo kau ai ʻa e tohi ʻIlo ʻA Ia ʻOku Taki Atu ki he Moʻui Taʻengatá. Naʻe vahevahe leva ʻe Antônio ʻa e meʻa naʻá ne ako mei he ngaahi tohi ko ʻení ki he kau mahaki kehé.

ʻI he hili ʻa e mavahe ʻa Antônio mei he kilīnikí, naʻá ne hokohoko atu ʻene ako ʻa e Tohitapú mo e Kau Fakamoʻoní. ʻI he ʻahó ni, ko Antônio, Maria, ko hona ʻofefine ʻe toko ua, pea mo e faʻē ʻa Antônio ʻoku nau tauhi fakataha kia Sihova ko ha fāmili fiefia mo fāʻūtaha. ʻOku pehē ʻe Antônio: “ʻI he taimi ní ʻoku ou mahinoʻi ʻa e ʻuhinga moʻoni ʻo e ngaahi lea ‘ko e ʻOtuá ko e ʻOfa.’”

[Fakatātā ʻi he peesi 8]

Malanga ʻi Rio De Janeiro