“Lolotonga hono faito‘o au koe‘uhi ko ‘eku kanisaá, na‘á ku fa‘a ongo‘i ilifia,” ko e fakamatala ia ‘a Pamela. “Ka ‘i he taimi na‘á ku lotu ai kia Sihova ko e ‘Otuá, na‘á ku ongo‘i nonga pea lava ke u fakakaukau lelei. ‘Oku ou kei fe‘ao pē mo e langá, neongo ia ko e lotú ‘okú ne tokoni‘i au ke tauhi ma‘u ha vakai pau. ‘I he ‘eke mai ‘e he kakaí pe ‘oku ou ongo‘i fēfē, ‘oku ou tala ange, ‘‘Oku ‘ikai ke u ongo‘i sai, ka ‘oku ou fiefia pē!’”

Ko e mo‘oni, ‘oku ‘ikai ke tau tatali ke hoko ha puke lahi ka tau toki lotu. Ko kitautolu kotoa ‘oku tau fekuki mo e ngaahi faingata‘a, lalahi pe iiki, pea ‘oku tau fa‘a ongo‘i ‘oku tau fiema‘u ha tokoni ke fekuki ai mo ia. ‘E tokoni ‘a e lotú?

‘Oku pehē ‘i he Tohi Tapú: “Lī ho‘o kavengá kia Sihova, pea te ne tokoni‘i koe. ‘E ‘ikai ‘aupito te ne tuku ‘a e tokotaha mā‘oni‘oní ke ne tō.” (Saame 55:22) He fakakaukau fakafiemālie ē ko ia! Ko ia ‘e lava fēfē ke tokoni‘i koe ‘e he lotú? ‘I ho‘o lotu ki he ‘Otuá ‘i he founga totonú, te ne ‘oatu kiate koe ‘a e me‘a ‘okú ke fiema‘u ke fekuki ai mo ho‘o ngaahi faingata‘a‘iá.​—Sio ki he puha “ Me‘a ‘e ‘Oatu ‘e he Lotú Ma‘au.”