Kuo a‘u mai eni, ‘o tau ‘ilo‘i ‘a e tali ki he fehu‘i, Ko hai ‘a e ‘Otuá? Na‘a tau kamata ‘i he‘etau ako mei he Tohi Tapú ko hono huafá ko Sihova pea pehē ki hono ‘ulungaanga-tu‘u-ki-mu‘a ko e ‘ofá. Na‘a tau lāulea foki ki he me‘a kuó ne fai mo e me‘a te ne fai ke ma‘u ‘aonga ai ‘a e kotoa ‘o e fa‘ahinga ‘o e tangatá. Neongo ‘oku lahi ange ‘a e me‘a ke ako ‘o fekau‘aki mo e ‘Otuá, te ke fifili nai pe te ke ma‘u ‘aonga fēfē ‘i he hoko ‘o ako lahi ange ki aí.

‘Oku tala‘ofa ‘a Sihova “kapau te ke kumi kiate ia, te ne faka‘atā atu ke ke ‘ilo‘i ia.” (1 Kalonikali 28:9) Sioloto atu ki he me‘a‘ofa mahu‘inga ‘oku fakatatali mai kiate koe ‘i ho‘o hoko ‘o ‘ilo‘i ‘a e ‘Otuá​—ko ha ‘kaume‘a ofi mo Sihova!’ (Saame 25:14) ‘Oku mahu‘inga fēfē ‘a e kaume‘a ko ení kiate koe?

Fiefia mo‘oni. ‘Oku fakamatala‘i ‘a Sihova ko e “‘Otua fiefiá.” (1 Tīmote 1:11) ‘I he hoko ‘o ofi kiate iá pea fa‘ifa‘itaki ki he‘ene ngaahi foungá te ke ma‘u ai ‘a e fiefia mo‘oni, ‘a ia ‘e lava ke ke ma‘u ‘aonga fakaeongo, faka‘atamai mo fakaesino mei ai. (Saame 33:12) ‘Oku lava ke toe tokoni‘i koe ‘e he ‘Otuá ke ke ma‘u ha mo‘ui fiefia ‘aki ‘a e faka‘ehi‘ehi mei he ngaahi founga mo‘ui fakatupu maumaú, fakatupulekina ha ngaahi tō‘onga lelei, pea tauhi ma‘u ‘a e vaha‘angatae lelei mo e ni‘ihi kehé. Te ke loto-tatau ai mo e me‘a na‘e lea‘aki ‘e he tokotaha-tohi-sāmé: “Ko e fakaofiofi ki he ‘Otuá ‘oku lelei ia kiate au.”​—Saame 73:28.

Tokangaekina Fakafo‘ituitui. Na‘e tala‘ofa ‘e Sihova ki he‘ene kau sevānití: “Te u ‘oatu kiate koe ‘a e fale‘i pea ‘e ‘iate koe ‘a hoku fofongá.” (Saame 32:8) ‘Oku ‘uhinga iá ‘e ‘oatu ‘e Sihova ki he‘ene kau sevānití ‘a e tokanga fakafo‘ituitui pea fe‘unu‘aki ‘ene tokangaekiná ke fehoanaki mo ‘enau ngaahi fiema‘u fakafo‘ituituí. (Saame 139:1, 2) ‘I ho‘o fakatupulekina pē ‘a e vaha‘angatae lelei mo Sihová, te ke ‘ilo‘i ai ‘okú ne ‘i ai ma‘u pē kiate koe.

Ko ha kaha‘u fakaofo. Tānaki atu ki he‘ene ‘oatu kiate koe ‘a e kī ki he mo‘ui fiefia mo fiemālie ‘i he taimi ní, ‘oku toe fakaava atu ‘e Sihova ko e ‘Otuá ha kaha‘u fakaofo. (‘Aisea 48:17, 18) ‘Oku pehē ‘e he Tohi Tapú: “Ko ‘eni ia ‘e ma‘u ai ‘a e mo‘ui ta‘engatá, ko ‘enau hoko ‘o ‘ilo‘i koe, ko e ‘Otua mo‘oni pē taha, pea mo e tokotaha ko ia na‘á ke fekau maí, ‘a Sīsū Kalaisi.” (Sione 17:3) ‘I he ngaahi taimi faingata‘a ko ení, ko e ‘amanaki ‘oku tokonaki mai ‘e he ‘Otuá ‘oku hoko ia ko ha taula ‘okú ne tauhi kitautolu ke tau hoko ‘o “pau mo mālohi.”​—Hepelū 6:19.

Ko e ngaahi me‘a pē eni ‘e ni‘ihi ka ‘oku lahi ‘a e ngaahi ‘uhinga mahu‘inga ke hoko ai ‘o ‘ilo‘i lelei ange ‘a e ‘Otuá pea fakatupulekina ha vaha‘angatae fakafo‘ituitui mo ia. ‘Oku talitali lelei koe ke talanoa ki ha taha ‘o e Kau Fakamo‘oni ‘a Sihová pe ‘a‘ahi ki he jw.org ki ha fakamatala lahi ange.