“Ko e Kau Fakamoʻoní naʻa nau anga-lelei ʻo ʻikai ki he kakaí pē kae pehē foki ki heʻeku ongo kiʻi kulií. ʻI he ʻaho ʻe taha, ko Elaine, naʻá ne tuʻu ʻi he veʻe papa tuʻuaki tohí, naʻá ne ʻoange ki heʻeku ongo kiʻi kulií ha pisikete. Hili iá, ʻi he taimi kotoa pē naʻa mau ʻalu ai ki koló naʻá na fusi maʻu pē hona kolá ʻi he feinga ke ʻalu ki he ‘feituʻu naʻe ʻi ai ʻa e pisiketé.’

“Naʻe ʻosi atu ha ngaahi māhina. Naʻe saiʻia ʻeku ongo kiʻi kulií ʻi hono kai ʻa e pisiketé pea naʻá ku saiʻia ʻi he fetalanoaʻaki nounou mo e Kau Fakamoʻoní. Ka naʻá ku toumoua ke fuʻu anga-fakakaumeʻa. Naʻá ku taʻu 70 tupu, pea naʻe ʻikai ke u fuʻu fakapapauʻi ʻa e meʻa naʻe tui ki ai ʻa e Kau Fakamoʻoní. Koeʻuhi naʻá ku loto-mamahi ʻi he siasi Palotisaní, naʻá ku fakakaukau ko e lelei tahá ke u ako pē ʻe au ʻa e Tohi Tapú.

“Lolotonga ʻa e taimi ko ení, naʻá ku sio ki he Kau Fakamoʻoni kehe ʻi he ngaahi feituʻu kehe ʻo e koló, ʻoku nau tuʻu ʻi heʻenau veʻe papa tuʻuakí. Naʻa nau anga-lelei foki mo kinautolu. Naʻa nau ngāueʻaki maʻu pē ʻa e Tohi Tapú ke tali ʻa e ngaahi fehuʻí pea ko e olá, naʻe tupulaki ʻeku falala kiate kinautolu.

“ʻI he ʻaho ʻe taha, naʻe ʻeke mai ʻe Elaine, ‘ʻOkú ke tui ko e fanga manú ko ha meʻaʻofa mei he ʻOtuá?’ Naʻá ku tala ange, ‘ʻIo, ʻoku ou tui pehē!’ Naʻe vahevahe mai leva ʻe Elaine ʻa e ʻAisea 11:6-9. Ko e liliuʻanga ia ki heʻeku moʻuí, neongo naʻá ku kei toumoua pē ke tali ha tohi.

“ʻI he ngaahi ʻaho hokó, naʻá ku fiefia ʻi ha fetalanoaʻaki nounou kae mohu ʻuhinga mo Elaine mo hono husepānití, ʻa Brent. Naʻá na fokotuʻu mai ke u lau ʻa e tohi Mātiu ki he tohi Ngāue ke mahinoʻi ʻa e meʻa ʻoku kaunga ki he hoko ʻo hangē ko Kalaisí. Ko ia naʻá ku fai ia. ʻIkai fuoloa mei ai, naʻá ku tali ha ako Tohi Tapu mo Brent mo Elaine. Ko e faʻahitaʻu māfana ia ʻo e 2016.

“Naʻá ku fakatuʻotuʻa ki heʻeku ako Tohi Tapu fakauiké pea mo e ngaahi fakataha ʻi he Fale Fakatahaʻangá. Naʻá ku ongoʻi houngaʻia mo fiefia ʻi hono ako ʻa e meʻa ʻoku leaʻaki moʻoni ʻe he Tohi Tapú. ʻI ha taʻu pē nai ʻe taha mei ai, naʻá ku papitaiso ko ha Fakamoʻoni. ʻI he taimí ni ʻoku ou taʻu 79, ʻoku ou ʻiloʻi ʻoku ou ʻi he ʻalunga totonú. Kuo faitāpuekina au ʻe Sihova ʻaki hono fakakau au ʻi hono fāmili ʻo e kau sevāniti fakatapuí.”