Vakai Ki He Māmaní

“Ko e hoko ko ha palesitení ‘okú ne ‘ai ai ke te ongo‘i ‘a e fiema‘u ke lotú.”​—BARACK OBAMA, PALESITENI ‘O ‘AMELIKÁ.

‘I hono kole ange ke fili ha founga ke fakahaa‘i ai ‘a e pōlepole‘aki hoto fonuá, ko e pēseti ‘e 56 ‘o e kakai ‘i ‘Āsenitina ‘i he vaha‘a ‘o e ta‘u 10 ki he 24 na‘a nau pehē ‘oku nau sai‘ia ange ke tui ‘a e falani ‘o e timi soka fakafonuá.​—LA NACIÓN, ‘ĀSENITINA.

‘Oku pehē ‘e he ngaahi ola mei ha fakatotolo “‘oku fakafuofua ki he vahe tolu ‘e taha ‘o e me‘akai kuo ngaohi ke faka‘aonga‘i ‘e he tangatá kuo mole pe maumau‘i fakaemāmanilahi ia, ‘a ia ‘oku tatau ia mo e toni nai ‘e 1.3 piliona he ta‘u.”​—KAUTAHA ME‘ATOKONI MO E NGOUE ‘A E PULE‘ANGA FAKATAHATAHÁ, ‘ĪTALI.

“‘I he ‘ahó ni, ko e ngaahi taú mo e ngaahi ongoongo ‘o e ngaahi taú ‘oku fonu ia ‘i he māmaní, pea ko ia ko e kau sōtia ‘o hotau Fonua Tupu‘angá ‘oku totonu ke nau mateuteu ma‘u pē ke malu‘i hono kakaí pea mo e me‘a toputapu kotoa mei ha fa‘ahinga taukave‘i pē na‘e fai mai ‘e ha fili mei tu‘a.”​—PATRIARCH KIRILL, PULE ‘O E SIASI ‘OFOTOKISĪ LŪSIÁ.

Ko e tumutumu ‘i he fika ‘o e ngaahi fakatu‘utāmaki he halá na‘e līpooti ia ki ha kautaha malu‘i ‘i Siamane ‘i he 2010 na‘e hoko ia ‘i he vaha‘a ‘o e 7:00 pongipongí ki he 8:00 pongipongí. “Ko e taha ‘i he ngaahi ta‘ota‘ofi‘anga mahu‘inga taha ki he fakatu‘utāmakí ko hono vahe‘i ha taimi fe‘unga ke a‘u ai ki he ngāué ‘i he pongipongí,” ko e fakamatala ia ‘a e ‘ōfisa ‘o ha kautaha.​—PRESSEPORTAL, SIAMANE.

Kau Taki Kei Si‘i ‘i Malēsia

Ko ha fe‘auhi ‘iloa he TV ‘i Malēsia ko hono taumu‘á ke fili ha taki imam lelei, pe taki lotu Mosilemi. ‘I hono fakakaveinga ko e “Imam Muda,” pe “Taki Kei Si‘í,” ‘oku hiki vitiō ‘a e polokalamá ni ‘i Kuala Lumpur. Ko e kau fe‘auhí, ‘a ia ko honau ta‘umotu‘á ko e ta‘u 18 ki he 27, pea ‘oku nau ha‘u mei he ngaahi puipuitu‘a kehekehe, ‘oku to‘o māmālie atu kinautolu kae ‘oua kuo toe pē ‘a e toko taha. Ko e ngaahi palé ‘oku kau ai ‘a e pa‘anga mo ha kā fo‘ou, ka ko e tokotaha ikuná ‘oku toe ‘oange foki ki ai ha ngāue ke ne hoko ko ha taki imam, ko ha sikolasipi ke ako ‘i Saute ‘Alepea, pea mo ha fononga pilikimi ki Mecca kuo ‘osi totongi. Ko e kau fe‘auhí kuo pau ke nau pōto‘i ‘i hono fakahoko ‘a e ngaahi ngafa ‘o ha taki imam, malava ke fakakikihi‘i ha ngaahi ‘īsiu fakalotu mo ha ngaahi ‘īsiu lolotonga, pea lau ma‘uloto ‘a e Kōlaní. ‘Oku pehē ‘e he tokotaha fa‘u polokalamá ko ‘ene taumu‘á ke “tohoaki‘i ‘a e to‘utupú” ki he lotu Mosilemí.

Ta‘efakapotopoto ‘i he ‘Initanetí

Ko e tokolahi ‘oku nau ngāue‘aki ‘a e ngaahi netiueka sōsialé ‘oku ‘ikai te nau tomu‘a sio ki he ngaahi nunu‘a ‘e ala hoko fekau‘aki mo hono fakahaa‘i ha fakamatala fakapulipuli. Neongo ia, ‘e malava ‘a e ta‘efakapotopoto ‘i he ‘initanetí ke ne uesia ‘a ho‘o mo‘uí ‘amui. Fakatatau ki he lau ‘a e pule ako ko Timothy Wright, na‘e hā ‘i he pepa ko e Sydney Morning Herald ‘a ‘Aositelēliá, “ko e tekinolosia ‘i onopōní ‘oku ‘uhinga iá, ko e lea ta‘efakakaukau‘i, ko e laukovi fakatupu maumau, ko e ‘ata ta‘efe‘unga pe ko hono fakahaa‘i ‘a e ngaahi fakaikiiki fakapulipuli ‘a ha taha, ‘oku lēkooti tu‘uma‘u ia mo ala ma‘u tau‘atāina ‘e ha taha pē ‘oku hū ki he netiueka sōsialé.” ‘Oku ‘uhinga ení ko e “ngaahi fehālaaki ko ia kuo fai ‘i he ta‘u 15 ‘e kei ala ma‘u mai pē ia ‘e ha pule ngāue ‘i he ta‘u ‘e 10 ki mui ai,” ko e lau ia ‘a Wright.