ʻOku maʻu ʻe he Kau Fakamoʻoni ʻa Sihová ʻa e ʻū vitiō mo e ʻū tohi makatuʻunga Fakatohitapu fakaʻilekitulōnika ʻo lahi ange ia ʻi ha toe taimi ki muʻa. Ka ʻi he ngaahi konga lahi ʻo e māmaní ʻoku faingataʻa ki hotau fanga tokouá ke nau fakatau ha ʻInitaneti. Ko e niʻihi, ʻoku nau nofo ʻi he feituʻu ʻoku tuai ʻaupito ʻa e ʻInitanetí pe ko e mātuʻaki hala ʻaupito ha ʻInitaneti.

 Neongo iá, ko e tokolahi taha hotau fanga tokouá mo e fanga tuofāfiné ʻoku lava ke nau hiki he taimí ni ha tatau fakaʻilekitulōnika ʻo e ʻū tohí ʻo ʻikai ha ʻInitaneti! ʻOku malava fēfē ke hoko ʻa e meʻá ni?

 Ko e JW Box ko ha kiʻi meʻangāue ia ʻoku ʻave ki he ngaahi fakatahaʻanga ʻoku fakangatangata ai ʻa e ʻInitanetí. ʻI he kiʻi puhá ʻoku ʻi ai ha meʻangāue fakafetuʻutaki naʻe faʻu ʻe ha kautaha, mo ha polokalama naʻe faʻu ʻe he Potungāue Komipiutá ʻi Pēteli mo e ʻū tohi fakaʻilekitulōnika mo e ʻū vitiō ʻa ia ʻoku ala maʻu ʻi he jw.org. Ko e kiʻi puha taki taha ʻoku fakafuofua hono mahuʻingá ki he $75 ʻAmelika.

 ʻI he Fale Fakatahaʻangá, ʻoku hiki ʻe he fanga tokouá mo e fanga tuofāfiné ʻa e ʻū tohi mo e ʻū vitiō ki heʻenau telefoní mei he JW Box. Naʻa mo e faʻahinga ʻoku nau maʻu ʻa e ngaahi meʻangāue fakaʻilekitulōnika motuʻa mo maʻamaʻá ʻoku lava ke nau ngāueʻaki ia. ʻOku anga-fēfē hono fakafoʻou ʻa e ʻū faile ʻi loto ʻi he JW Box kapau ʻoku ʻikai ke maʻu ʻe he fakatahaʻangá ha ʻInitaneti? Mei he taimi ki he taimi, ʻoku ʻoatu ʻe he vaʻá ha USB ʻa ia ʻoku fakafuofua ki he $4 ʻAmelika. ʻOku ʻi ai ʻa e ʻū tohi mo e ʻū meʻa foʻou mei he jw.org pea ʻoku lava leva ke fakahū ia ki he JW Box.

 Kuo anga-fēfē hono tokoniʻi ʻe he JW Box ʻa hotau fanga tokouá? ʻOku fakamatalaʻi ʻe Nathan Adruandra, ko ha tamai mei he Lepupilika Temokalati ʻo Kongó: “Naʻá ku feinga lahi ke hiki ʻa e ongo vitiō “ʻE Sihova . . . Kuo U Falala ki he ʻAfiona” mo e Manatuʻi ʻa e Uaifi ʻo Loté. Ka naʻe ʻikai ke u lava pea naʻá ku ongoʻi loto-siʻi. Ka ʻi he taimi ní ʻoku lava ke u hiki ʻa e ʻū vitiō ko eni ki heʻeku telefoní pea ʻoku tokoniʻi eni kimautolu ngaahi mātuʻa ke akoʻi lelei ʻemau fānaú.”

 ʻOku pehē ʻe ha tokoua ʻokú ne tokoni ki hono fokotuʻu ʻa e JW Box ʻi he ngaahi fakatahaʻanga ʻi Naisīliá: “ʻOku vakai ʻa e fanga tokouá ki he JW Box ko ha meʻaʻofa makehe ia meia Sihova. ʻOku nau fiefia ʻaupito ke hiki ʻa e ʻū tohí mo e ʻū vitioó mei he Puha Meʻangāue Fakafaiakó ʻi ha founga faingofua.”

 Kuo ʻoatu ki hotau fanga tokoua ʻi ʻAfiliká, ʻi he Pasifikí mo ʻAmelika Tonga ha JW Box ʻe 1,700 tupu, pea ʻoku toe ʻi ai ha palani ke tufaki eni ki he ngaahi fakatahaʻanga lahi ange. ʻOku maʻu mei fē ʻa e paʻanga ke fakahoko ʻaki ʻa e meʻá ni? Fakafou ʻi he ngaahi tokoni loto-fiefoaki ki he ngāue ʻi māmani lahi, ʻa ia ʻoku fakahoko lahi ʻi he donate.jw.org. Mālō ʻaupito ki hoʻo tokoni nima-homó.