Ko e fakataha-lahi fakavahe 2020 naʻe fakahisitōlia​—ko ʻetau fuofua fakataha-lahi fakamāmanilahi ia naʻe hiki pea ʻai ke ala maʻu ʻi he ʻInitanetí! Kae kehe, ʻi Malauī mo Mosemipiiki, ko e tokolahi taha hotau fanga tokouá mo e fanga tuofāfiné naʻa nau maʻu ʻa e fakataha-lahí ʻo ʻikai ngāueʻaki ʻa e ʻInitanetí. Naʻe malava fēfē eni?

 Koeʻuhi ko e meʻá ni, naʻe fakaʻatā ai ʻe he kōmiti Kouʻotineita mo e Faiako ʻo e Kulupu Pulé ke fakamafola ʻa e fakataha-lahí ʻi he televīsoné mo e letiō ʻi Malauī mo Mosemipīkí. Ko e hā naʻe fiemaʻu ai ke fai ení? ʻOku kau ʻa Malauī ʻi he fonua ʻoku mamafa taha ai ʻa e ʻInitanetí ʻi he māmaní, pea ko ia ai ko e Kau Fakamoʻoni tokosiʻi pē ʻoku lava ke nau maʻu ʻa e ʻInitanetí. Hangē ko e fakamatala ʻa William Chumbi, ko ha mēmipa ʻo e Kōmiti Vaʻa ʻi Malauī: “Ko e founga pē naʻe tufaki atu ai ʻa e meʻakai fakalaumālie ko ení ki he fanga tokouá mo e fanga tuofāfiné ko e letioó mo e televīsoné.” Ko Luka Sibeko, ʻoku ngāue foki ʻi he Kōmiti Vaʻa ʻi Malauī, ʻokú ne pehē: “Kapau naʻe ʻikai malava ke mau maʻu ia ʻi he TV mo e letioó, ko e fanga tokoua tokosiʻi pē ʻi homau feituʻu ngāue ʻi he vaʻá naʻe mei lava ke nau maʻu ʻaonga mei he fakataha-lahí.” ʻI Mosemipiiki foki, ko e fanga tokoua tokosiʻi pē naʻe lava ke nau fakatau ha meʻangāue fakaʻilekitulōnika feʻunga, kae ʻumaʻā ʻa e ʻInitanetí.

 Koeʻuhi ko e mahaki fakaʻauha COVID-19, ko e ngaahi kautaha televīsone mo e letiō ʻe niʻihi naʻa nau ʻosi fakamafola ʻa e ngaahi fakataha ʻa e fakatahaʻangá. a Ko hotau fanga tokouá naʻa nau fetuʻutaki ki he ngaahi kautaha ko ení pea kole ha toe taimi ke fakamafola ai ʻa e fakataha-lahí.

 ʻI Malauī, naʻe fehangahangai hotau fanga tokouá mo ha pole. Ko e anga-mahení, ko e ngaahi kautaha fakamafola leá ʻoku nau fakangatangata ʻa e taimi ʻenau kau kasitomaá ki he houa pē taha. ʻOku hohaʻa ʻa e ngaahi kautahá naʻa mole ʻa e tokanga ʻenau kau fanongó ʻi he lōloa ange ʻa e polokalamá. Ka naʻe fakamatalaʻi ʻe hotau fanga tokouá ko ʻetau ngāué ko ha ngāue maʻá e kakaí. Naʻa mo e lolotonga ʻa e nofo maʻu ʻi ʻapí, ʻoku tau ʻoatu ki he kakaí ʻa e ngaahi ongoongo lelei fakafiemālie mei he Tohi Tapú, ʻa ia ʻe lava ke tokoniʻi ai ʻa e kakaí ke hoko ko e kau tangataʻifonua lelei pea maʻu ha moʻui fakafāmili fiefia. ʻI hono ʻiloʻi eni ʻe he ngaahi kautahá, naʻa nau tali ʻa e kole ʻa e fanga tokouá ke fakalahi ʻenau taimi fakamafolaleá.

 ʻI Malauī, naʻe fakamafola ʻa e fakataha-lahí ʻi ha kautaha televīsone ʻe taha mo ha kautaha letiō ʻe taha, ʻoku aʻu ki he feituʻu kotoa he fonuá mo e malava ke aʻu ki he kakai ʻe laui miliona. ʻI Mosemipiiki, naʻe fakamafola ʻa e fakataha-lahí ʻi ha kautaha televīsone ʻe taha mo e kautaha letiō ʻe 85.

 ʻI he ongo fonuá fakatouʻosi, ko e tola fakakātoa ʻe $28,227 b naʻe fakamoleki ke fakamafola ʻa e fakataha-lahí ʻi he televīsoné pea ofi ʻi he tola ʻe $20,000 ke fakamafola ʻi he letioó. Ko e totongi ʻo e letioó naʻe kehekehe pē mei he tola ʻe $15 ki ha kiʻi kautaha siʻisiʻi ki he tola ʻe $2,777 ki ha kautaha lahi ange.

 Ko hotau fanga tokouá naʻa nau ngāue mālohi ke ngāueleleiʻaki ʻa e paʻanga tokoní. Ko e fakatātaá, ʻi Malauī, naʻe malava ke nau aleaʻi ha totongi māʻulalo ange, kau ai ʻa e holoki pēseti ʻe 30. Ko e ngaahi holoki ko ení naʻe hao ai ha tola ʻe $1,711. ʻI Mosemipiiki, ko e ngaahi kautaha ʻe niʻihi naʻa nau loto-lelei ke tuku hifo ʻenau totongí koeʻuhi ko ʻetau ʻiloa ʻi he faitotonú mo ʻetau totongi taimi totonú.

 Naʻe houngaʻia lahi hotau fanga tokouá ʻi he sio pe fanongo ki he fakataha-lahí ʻi he ngaahi kautaha fakalotofonuá. Ko Patrick, ko ha mātuʻa mei Malauī, ʻokú ne pehē: “ʻOku mau fakamālō ki he fanga tokoua ʻi he Kulupu Pulé ki heʻenau tokanga makehe lolotonga ʻa e mahaki fakaʻauhá.” Ko Isaac, mei Malauī foki, ʻokú ne pehē: “ʻOku ʻikai haʻamau meʻangāue fakaʻilekitulōnika, ko ia naʻa mau houngaʻia lahi ki he tokonaki makehe mei he kautaha ʻa Sihová ke fanongo ki he fakataha-lahí ʻi he letioó. Koeʻuhi ko e tokonaki ko ení, ko e kotoa hoku fāmilí naʻa nau maʻu ʻaonga mei he fakataha-lahí. Naʻa mau vakai ki heni ko e fakamoʻoni ia ʻo e ʻofa ʻa Sihova ki heʻene kakaí.”

 Ko e fakataha-lahi 2020 ko e fuofua fakataha-lahi ia ʻa ha tokotaha malanga ʻi Mosemipiiki. ʻOkú ne pehē: “Ko e fokotuʻutuʻu ke sio ki he fakataha-lahí ʻi he TV naʻe fakamanatu mai ai kiate au ko Sihova ʻa e ʻOtua māfimafi-aoniú. Naʻe ʻikai taʻofi ʻe he mahaki fakaʻauhá ʻene tokonaki mai kiate kimautolu ʻa e meʻakai fakalaumālié pea ʻomai tonu ia ki hoku loto falé. Naʻá ku fakamoʻoniʻi ai ʻa e ʻofa ʻi he haʻohaʻonga ʻo e kakai ʻa Sihová. ʻOku ou tuipau ko e lotu-moʻoní eni.”

 Ko ha mātuʻa ko Wyson ʻokú ne pehē: “ʻOku ou fie fakahaaʻi ʻeku houngaʻia ʻi he founga hono tokangaʻi kimautolu ʻe he tamaioʻeiki anga-tonú lolotonga ʻa e mahaki fakaʻauhá. Ko e tokonaki ko eni ke fakamafola ʻa e fakataha-lahí ʻi he letioó mo e TV kuó ne tokoniʻi ʻa e tokolahi ʻo kimautolu ʻoku fāinga fakapaʻanga ʻi he feituʻu masiva ange ko eni ʻo e māmaní ke maʻu ʻa e polokalamá pea maʻu ʻaonga mei ai.”

 Ko e fakataha-lahi fakavahe 2021, kuo toe tali ʻe he kōmiti Kouʻotineitá mo e Faiakó ke fakamafola ʻa e fakataha-lahí ʻi he televīsoné mo e letioó ʻi he ngaahi feituʻu pau. ʻOku anga-fēfē ʻetau fua ʻa e fakamole ke fakamafola ʻa e fakataha-lahí ʻi he founga ko ení? Fakafou ʻi he ngaahi tokoni ki he ngāue ʻi māmani lahí, ko e lahi ʻo kinautolu ʻoku fai ia fakafou ʻi he ngaahi founga kehekehe ʻi he donate.jw.org. Fakamālō atu ki hoʻomou tokoni nima-homó.