Naʻe hū ʻa Noa mo hono fāmilí pea mo e fanga manú ki he ʻaʻaké. Naʻe tāpuni ʻe Sihova ʻa e matapaá, pea naʻe kamata ke ʻuha. Naʻe ʻuha lahi ʻaupito ʻo kamata ai ke tētē ʻa e ʻaʻaké. Naʻe faifai atu pē ʻo ʻufiʻufi ʻe he vaí ʻa e māmaní kotoa. ʻI tuʻa ʻi he ʻaʻaké, naʻe mate ai ʻa e kakai koví kotoa. Ka naʻe malu ʻa Noa mo hono fāmilí ʻi loto. ʻE lava ke ke sioloto atu ki heʻenau fiefia ʻi heʻenau talangofua kia Sihová?

Naʻe tō ʻa e ʻuhá ʻi he ʻaho ʻe 40 mo e pō ʻe 40, pea toki tuʻu. Naʻe holo māmālie hifo ʻa e vaí. Naʻe faifai pē ʻo toka ʻa e ʻaʻaké ʻi he ʻotu moʻungá. Ka naʻe kei lahi pē ʻa e vaí ʻi he feituʻu kotoa, ko ia naʻe ʻikai lava ke mavahe ʻa Noa mo hono fāmilí ʻi he taimi pē ko iá mei he ʻaʻaké.

Naʻe māmālie ʻa e mātuʻu ʻa e vaí. Naʻe ʻi he loto ʻaʻaké ʻa Noa mo hono fāmilí ʻo laka hake ʻi he taʻu ʻe taha. Hili iá naʻe tala ange ʻe Sihova ʻe lava ke nau hū ki tuʻa mei he ʻaʻaké ki ha māmani foʻou. Naʻa nau fiefia ʻaupito ʻi hono fakahaofi kinautolu ʻe Sihová, pea naʻa nau fakahaaʻi ia ʻaki hono fai ha feilaulau kia Sihova.

Naʻe fiefia ʻa Sihova ʻi he feilaulau ko ení. Naʻá ne palōmesi heʻikai te ne toe fakaʻauha ʻa e meʻa kotoa pē ʻi he māmaní ʻi ha lōmaki. Ke hoko ko ha fakaʻilonga ʻo e palōmesi ko iá, naʻá ne ʻai ke hā ʻi he langí ʻa e ʻuluaki ʻumatá. Kuó ke sio ʻi ha ʻumata?

Naʻe tala ange leva ʻe Sihova kia Noa mo hono fāmilí ke nau maʻu ha fānau pea fakafonu ʻa e māmaní.