Na‘e fā‘ele‘i au ‘i Acul, ko ha kolo tu‘u mavahe ‘i he feitu‘u mo‘unga fakahihifo ‘o Kuatemalá. Ko hoku fāmilí ‘oku nau kau ki he kakai Ixil, ko ha matakali ‘o e hako ‘o e kau Meiá. Tānaki atu ki he lea faka-Sipeiní, na‘á ku tupu hake ‘o lea ‘i he‘emau lea tu‘ufonuá. Na‘á ku tupu hake ‘i he taimi na‘e hoko ai ‘a e tau fakalotofonua anga-fakamamahi ‘i Kuatemala ‘o fe‘unga mo e ta‘u ‘e 36. Lolotonga ‘a e taimi ko ení na‘e tokolahi ‘a e kakai Ixil na‘e mate aí.

‘I he‘eku ta‘u faá, ko hoku tokoua lahí na‘á ne ta‘u fitu pea na‘á ne va‘inga‘aki ha ki‘i fo‘i pomu ‘a ia na‘e pā fakafokifā. Pea ‘i he fakatu‘utāmaki ko iá na‘e kui ai hoku matá; pea ko e me‘a fakamamahí, na‘e mate ai hoku tokouá. Hili iá, na‘á ku ngāue‘aki hoku taimí ‘i ha ako ki he fānau kuí ‘i he kolo ko Kuatemalá, ‘a ia na‘á ku ako ai ‘o ngāue‘aki ‘a e tohi ma‘á e kau kuí. ‘I he akó, na‘e ta‘ofi au ‘e he kau faiakó mei he fetalanoa‘aki mo e fānau kehé, pea ko hoku ngaahi kaungāakó na‘a nau fakamama‘o meiate au, ka na‘e ‘ikai ke u mahino‘i kakato ‘a e ‘uhingá. Na‘á ku ta‘elata ma‘u pē pea faka‘amu ki he māhina ‘e ua ‘i he ta‘u taki taha ‘a ia te u feohi ai mo ‘eku fa‘eé ‘i ‘api, he na‘á ne anga-lelei mo manava‘ofa ma‘u pē. Ko e me‘a fakamamahí, na‘á ne mate pē ‘i he‘eku kei ta‘u hongofulú. Na‘á ku ongo‘i kuo mole ‘a e tokotaha pē ‘i he māmaní na‘e ‘ofa ‘iate aú, na‘á ku loto-mamahi lahi ‘aupito.

‘I he‘eku ta‘u 11, na‘á ku foki ki hoku kolo tupu‘angá pea nofo ai mo ha taha ‘oku ou tokoua‘aki mo hono fāmilí. Na‘a nau tokanga‘i ‘eku ngaahi fiema‘u fakamatelié, ka na‘e ‘ikai ha taha te ne tokoni‘i fakaeongo au. ‘I he faai atu ‘a e taimí, na‘á ku tangi ki he ‘Otuá: “Ko e hā ‘a e ‘uhinga na‘e mate ai ‘a ‘eku fa‘eé? Ko e hā ‘oku ou kui aí?” Na‘e tala mai ‘e he kakaí kiate au ko e ngaahi me‘a fakamamahi ko ení ko e finangalo pē ia ‘o e ‘Otuá. Na‘á ku fakamulituku ‘aki ‘oku ‘ikai ke tokanga mai ‘a e ‘Otuá pea ‘oku ‘ikai totonu ‘a e me‘a ‘okú ne faí. Ko e ‘uhinga pē taha na‘e ‘ikai ke u taonakita aí koe‘uhi na‘e ‘ikai ke u ma‘u ha ‘uhinga lelei ke u taonakita ai.

Koe‘uhi ko ‘eku kuí, na‘á ku hoko ‘o laveangofua fakaesino mo fakaeongo. ‘I he‘eku kei tamasi‘í, na‘e ngaohikovi‘i fakaefehokotaki fakasino au ‘i he ngaahi tu‘unga lahi. Na‘e ‘ikai ke u līpooti ‘a e ngaahi hia ko iá​—he na‘á ku fakakaukau ‘e ‘ikai ke tokanga mai ha taha ia. Na‘e tātaitaha ke lea mai ‘a e kakaí kiate au, pea na‘e ‘ikai ke u talanoa au mo ha taha. Na‘á ku nofo toko taha pē mo e loto-mafasia, pea na‘e ‘ikai ke u falala ki ha taha.

‘I he‘eku ta‘u hongofulu tupu si‘í, na‘e ‘i ai ha ongo Fakamo‘oni ‘a Sihova (ko ha ongo me‘a mali) na‘á na fakaofiofi mai kiate au lolotonga ‘a e taimi mālōlō ‘a e akó. Ko e taha ‘o e kau faiako ‘i hoku ‘apiakó, ‘a ia na‘á ne faka‘ofa‘ia ‘i hoku tu‘ungá, na‘á ne kole kiate kinaua ke ‘a‘ahi mai kiate au. Na‘á na tala mai kiate au ‘a e ngaahi tala‘ofa ‘i he Tohi Tapú ‘a ia ‘e toetu‘u ‘a e kau maté pea ‘e ‘ā ‘a e mata ‘o e kuí. (‘Aisea 35:5; Sione 5:​28, 29) Na‘á ku sai‘ia ‘i he me‘a na‘á na ako‘i maí, ka na‘e faingata‘a kiate au ke talanoa mo kinaua, he na‘e ‘ikai ke u anga ‘i he leá. Kae kehe, neongo ‘eku ongo‘i maá, na‘á na anga-lelei mo anga-kātaki ‘i he ‘a‘ahi mai kiate aú koe‘uhi ke lava ‘o ako‘i au fekau‘aki mo e Tohi Tapú. Ko e ongo me‘a ko ení na‘á na lue ‘o laka hake ‘i he maile ‘e ono (kilomita ‘e 10) ‘o kolosi ‘i ha mo‘unga ke a‘u mai ki hoku koló.

Na‘e fakamatala‘i mai kinaua ‘e hoku tokouá ‘okú na teuteu maau ka na‘e ‘ikai ke na ma‘u ha me‘a fakamatelie lahi. Neongo ia, na‘á na fakahaa‘i ma‘u pē ‘a e mahu‘inga‘ia fakafo‘ituitui ‘iate au, pea ‘omai mo ha fanga ki‘i me‘a‘ofa. Na‘á ku ongo‘i ko ha Kalisitiane mo‘oni pē te ne malava ke fakahāhā ‘a e feilaulau‘i-kita peheé.

Na‘á ku ako ‘a e Tohi Tapú fakafou ‘i he tokoni ‘a e ngaahi tohi ma‘á e kau kuí. Neongo na‘á ku mahino‘i ‘i hoku ‘atamaí ‘a e me‘a na‘á ku laú, ka ‘i he fakaeongó na‘e ‘i ai ha me‘a na‘e faingata‘a kiate au ke u tali. Ko e fakatātaá, na‘e faingata‘a ke u tui ‘oku tokanga mai ‘a e ‘Otuá kiate au ko ha tokotaha pea ‘e malava ke vahevahe mai ‘e he ni‘ihi kehé ‘a e ngaahi ongo‘i ‘a e ‘Otuá kiate au. Na‘á ku mahino‘i ‘a e ‘uhinga ‘oku faka‘atā fakataimi ai ‘e he ‘Otuá ‘a e fulikivanú, ka na‘e faingata‘a kiate au ke u sio kiate ia ko ha Tamai ‘ofa mo‘oni. *

‘I he faai mai ‘a e taimí, ko e me‘a na‘á ku ako mei he Tohi Tapú na‘á ne tokoni‘i au ke liliu ‘eku vakai ki he ngaahi me‘á. Ko e fakatātaá, na‘á ku ako ‘oku kaungāongo‘i mo‘oni ‘a e ‘Otuá mo e fa‘ahinga ‘oku nau faingata‘a‘iá. ‘I he fekau‘aki mo ‘ene kau lotu na‘e ngaohikoviá, na‘e pehē ‘e he ‘Otuá: “Kuó u mātā mo‘oni ‘a e faingata‘a‘ia ‘a hoku kakai . . . ‘oku ou ‘afio‘i lelei ‘a e ngaahi mamahi ‘oku nau fuesiá.” (‘Ekisoto 3:7) ‘I he‘eku hounga‘ia ‘i he ngaahi ‘ulungaanga fakaalaala ‘o Sihová, na‘e ue‘i ai au ke fakatapui ‘eku mo‘uí kiate ia. ‘I he 1998, na‘á ku papitaiso ko e taha ‘o e Kau Fakamo‘oni ‘a Sihová.

Hili ‘a e ta‘u ‘e taha mei he‘eku papitaisó, na‘á ku ma‘u ‘a e ako ma‘á e kau kuí ofi ki he kolo ‘o Escuintla. Lolotonga ‘eku ‘i hoku kolo tupu‘angá, na‘e ‘i ai ha mātu‘a ‘i he fakataha‘angá na‘á ne ‘ilo ki he ngaahi pole na‘á ku fetaulaki mo ia ‘i he‘eku feinga ke ma‘u ‘a e ngaahi fakatahá. Ka ko e fakataha‘anga ofi taha mai kiate aú na‘e ‘i he ‘otu mo‘unga tatau ia mo ia na‘e fononga mai ai ‘a e ongo Fakamo‘oní ke ako mo aú, pea na‘e faingata‘a ke u ‘alu ki ai. Ke tokoní, na‘e ‘ilo ‘e he mātu‘á ha fāmili Fakamo‘oni ‘i Escuintla ‘a ia na‘a nau loto-lelei ke ‘ave au ki honau ‘apí pea tokoni‘i au ke ma‘u ‘a e ngaahi fakataha ‘a e fakataha‘angá. Talu mei he ‘aho ko iá, na‘a nau tokanga‘i au ‘o hangē ko ha mēmipa honau fāmilí tonu.

‘E lava ke u fakamatala ki he ngaahi fa‘ifa‘itaki‘anga lahi ‘o e ‘ofa na‘e fakahaa‘i mai ‘e he ngaahi mēmipa ‘o e fakataha‘angá kiate aú. Ka ‘i he fakalūkufuá, ko e ngaahi hokosia ko ení ‘okú ne fakatuipau‘i au ‘i he hoko ko e taha ‘o e Kau Fakamo‘oni ‘a Sihová, ‘oku ou ‘i he lotolotonga ai ‘o e kau Kalisitiane mo‘oní.​—Sione 13:34, 35.

‘Oku ‘ikai ke u toe ongo‘i ‘oku ‘ikai ha‘aku mahu‘inga pea ‘ikai ha ‘amanaki. Ka ‘i he taimi ní ‘oku mohu taumu‘a ‘eku mo‘uí. ‘I he hoko ko ha sevāniti taimi-kakato ‘i he ngāue fakaeako Tohi Tapu ‘a e Kau Fakamo‘oni ‘a Sihová, ‘oku ou tokangataha ai ki hono ako‘i ki he ni‘ihi kehé ‘a e ngaahi mo‘oni mahu‘inga mei he Tohi Tapú kae ‘ikai tokangataha ki he‘eku faingata‘a‘ia fakaesinó. ‘Oku ou toe ma‘u ‘a e monū ko ha mātu‘a ‘i he fakataha‘angá pea fakahoko ‘a e ngaahi malanga Fakatohitapu ma‘á e kakaí ‘i he ngaahi fakataha‘anga fakalotofonuá. ‘Oku ou toe ma‘u foki mo e monū ke fakahoko ‘a e ngaahi malanga Fakatohitapu ‘i he fakataha-lahi fakavahefonuá ‘a ia ‘oku laui afe ‘a e fa‘ahinga ‘oku nau ma‘u iá.

‘I he 2010, na‘á ku ma‘u tohi fakamo‘oni ako mei he Ako‘anga Ako Fakafaifekau (‘a ia ‘oku ui he taimí ni ko e Ako Ma‘á e Kau ‘Evangeliō ‘o e Pule‘angá) na‘e fakahoko ‘i ‘Eli Salavatoa. Na‘e ‘ai ‘e he ako ko ení ke u mateuteu ke fakahoko lelei ange hoku ngaahi fatongia ‘i he fakataha‘angá. ‘I hono ma‘u ‘a e ako ko ení na‘á ne ‘ai au ke u ongo‘i ‘oku fakamahu‘inga‘i lahi pea ‘ofa‘i au ‘e Sihova ko e ‘Otuá, ‘a ia ‘okú ne lava ke ‘ai ha taha pē ke taau ki he‘ene ngāué.

Na‘e pehē ‘e Sīsū: “‘Oku ‘i ai ‘a e fiefia lahi ange ‘i he foaki atú ‘i he ma‘u maí.” (Ngāue 20:35) ‘I he ‘ahó ni, ‘oku lava ke u pehē ‘oku ou fiefia mo‘oni, pea neongo ko e ki mu‘á na‘e ‘ikai ke u lava ‘o sioloto atu te u malava ‘o tokoni‘i ‘a e ni‘ihi kehé, ka ‘i he taimí ni ‘oku ou ongo‘i ‘e malava ke u tokoni‘i ‘a e ni‘ihi kehé.