ʻOku mau muimui ofi ki he vakai ʻa e Tohi Tapú ki he nofo malí mo e vete malí. Naʻe fokotuʻutuʻu ʻe he ʻOtuá ʻa e nofo malí ke hoko ko ha haʻi tuʻuloa ia ʻi he vahaʻa ʻo ha tangata mo ha fefine. Ko e ʻuhinga pē ʻe taha mei he Tohi Tapú ke vete ai ha mali ko e fehokotaki fakasino taʻetaau.​—Mātiu 19:​5, 6, 9.

 ʻIo, ʻo fakafou ʻi he ngaahi foungá ni:

•   ʻŪ Tohi. ʻE lava ke fakamālohiʻi ʻa e ngaahi nofo malí ʻe he ngaahi fakamatala ʻoku maʻu hokohoko ʻi aí, naʻa mo e ngaahi nofo mali ʻoku hangē ʻe ʻikai toe lava ke fakaleleiʻí. Ko e fakatātaá, sio ki he kupu ko e “Tauhi Maʻu ʻa e Tukupā ʻi Hoʻo Nofo Malí,” “How to Forgive,” mo e “Rebuild Trust in a Marriage.”

•   Ngaahi Fakataha. ʻOku mau lāulea ki he ngaahi faleʻi ʻaonga ʻa e Tohi Tapú ki he nofo malí ʻi he ngaahi fakataha ʻa e fakatahaʻangá, ngaahi ʻasemipilií mo e ngaahi fakataha-lahí.

•   Kau Mātuʻa. ʻOku tokoniʻi ʻe he kau mātuʻa ʻi he fakatahaʻangá ʻa e ongo meʻa malí ʻo fakahanga ʻena tokangá ki he folofolá hangē ko ia ko e ʻEfesō 5:​22-​25.

 ʻIkai. Naʻa mo e taimi ʻoku fiemaʻu ai ke nau tokoniʻi ha ongo meʻa mali ʻoku na palopalemaʻia, ʻoku ʻikai haʻanau totonu ke tala ki he ongo meʻa malí ʻa e meʻa ke na faí. (Kalētia 6:5) Kae kehe, ʻe ʻikai ke ʻatā ke toe mali kapau ʻe fili ia ke vete ʻi ha ʻuhinga ʻoku ʻikai Fakatohitapu.​—1 Tīmote 3:​1, 5, 12.

 ʻOku fakalototoʻaʻi ʻe he Tohi Tapú ʻa e ongo meʻa malí ke na kei nofo fakataha pē neongo ha faingataʻa ʻe hoko. (1 Kolinitō 7:​10-​16) Ko e ngaahi palopalema lahi ʻe lava ke fakaleleiʻi ʻaki ʻa e lotu tōtōivi, ngāueʻaki ʻa e ngaahi tefitoʻi moʻoni Fakatohitapú pea mo fakahāhā ʻa e ʻofá.​—1 Kolinitō 13:​4-8; Kalētia 5:​22.

 Ka neongo ia, kuo fili ʻa e hoa mali Kalisitiane ʻe niʻihi ke māvae mei hono hoá ʻi ha ngaahi tuʻunga ʻoku fuʻu faingataʻa hangē ko ení:

•   ʻIkai loto-lelei ke tauhi ʻa e fāmilí.​—1 Tīmote 5:8.

•   Ngaohikoviʻi fakaesino tōtuʻa.​—Saame 11:5.

•   Fakatuʻutāmaki lahi ki he moʻui fakalaumālié. Ko e fakatātaá, ʻe fakamanamanaʻi nai ʻe ha hoa mali ha hoa mali Fakamoʻoni ʻa Sihova ʻi ha ngaahi founga ke ne maumauʻi ai ʻa e tuʻutuʻuni ʻa e ʻOtuá, pea ʻe fili ai e tokotaha ʻoku fakamanamanaʻí ke māvae ko ha founga pē ia ke “talangofua ki he ʻOtuá ko e pulé ia kae ʻikai ki he tangatá.”​—Ngāue 5:​29.