ʻOku totonu ʻetau manavahē ki he maté ko ha fili pea tau fou ʻi ha ngaahi sitepu lelei ke maluʻi ʻa ʻetau moʻuí. (1 Kolinitō 15:26) Kae kehe, ko ha manavahē taʻeʻuhinga ki he maté makatuʻunga ʻi ha loi pe tui fakafaʻahikehe ʻokú ne ʻai ʻa e kakaí ke nau “hangē ha pōpulá ʻi he kotoa ʻenau moʻuí.” (Hepelū 2:​15) Ko hono ʻiloʻi ʻa e moʻoní te ne fakatauʻatāinaʻi koe mei ha manavahē taʻetotonu ki he maté​—ko ha manavahē ʻe lava ke ne kaihaʻasi meiate koe ʻa e malava ke ke fiefia ʻi he moʻuí.​—Sione 8:​32.

Moʻoni fekauʻaki mo e maté

•   Ko e maté ʻoku ʻikai te ne ʻiloʻi ha meʻa. (Saame 146:4) ʻOku ʻikai fiemaʻu ke ke manavahē ki ha langa pe mamahi hili hoʻo maté, he ʻoku fakahoa ʻe he Tohi Tapú ʻa e maté ki he mohe.​—Saame 13:3; Sione 11:11-​14.

•   Heʻikai lava ke fai ʻe he kau maté ha kovi kiate kitautolu. Naʻa mo e ngaahi fili anga-fakamālohi ki muʻá ʻoku “mole honau mālohí ʻi he maté.” (Palōveepi 21:16) ʻOku pehē ʻe he Tohi Tapú ko “ʻenau fehiʻá mo ʻenau meheká kuo ʻosi mole atu ia.”​—Tangata Malanga 9:6.

•   Ko e maté ʻoku ʻikai ʻaupito ko e ngataʻanga tuʻuloa ia ʻo ʻetau ʻi aí. Fakafou ʻi ha toetuʻu, ʻe toe fakamoʻui ai ʻe he ʻOtuá ʻa e kakai kuo nau maté.​—Sione 5:​28, 29; Ngāue 24:15.

•   ʻOku palōmesi ʻa e ʻOtuá ki ha taimi ʻa ia “ʻe ʻikai ke toe ʻi ai ha mate.” (Fakahā 21:4) ʻI he fekauʻaki mo e taimi ko iá, ʻoku pehē ʻe he Tohi Tapú: “Ko e kau māʻoniʻoní te nau maʻu ʻa e māmaní, pea te nau nofo ai ʻo taʻengata,” ʻo ʻatā fakaʻaufuli mei ha manavahē pē ki he maté.​—Saame 37:29.