Santiago 4:1-17
4 Náá eku̱mu̱u̱ xkujndu ga̱jma̱a̱ rí nagi̱ʼdala kaníkháanʼ rá. Lá tsékumu̱u̱ náa rí nagua̱ʼa̱ maʼni xuyala rí kúwáanʼ runimíjna̱ gajmiála ráʼ.+
2 Ikháanʼ nandala maguaʼdáá mú na̱nguá kuaʼdáá. Nuradíin má xúʼko̱ xa̱bu̱ ga̱jma̱a̱ nagua̱ʼa̱ maguaʼdáá, mú na̱nguá exkamaa rí nandala. Nagi̱ʼdala má xúʼko̱ ga̱jma̱a̱ nu̱ni̱ xkujndu.+ Na̱nguá kuaʼdáála numuu rí tsénda̱ʼa̱.
3 Maski má nunda̱ʼa̱, xú káʼnii gándoo gúndrígú á mu nunda̱ʼa̱ majmala mu̱ni̱ dí ra̱májánʼ ga̱jma̱a̱ mu̱ni̱ rí nagua̱ʼa̱ xuyala rá.
4 Ikháanʼla bi̱ na̱nguá kuajún jmbu náa Dios,* lá tséya̱a̱ rí mambajxála gajmiála numbaaʼ nindxu̱u̱ rí xámbájxala gajmiála Dios ráʼ. Ikha jngóo asndu tsáa bi̱ nandoo mambajxúu ga̱jma̱a̱ numbaaʼ xtáa ranindxu̱u̱ xa̱bu̱ sia̱nʼ náa Dios.+
5 Lá nakumala rí mbaʼ natsún dí naʼthí náa Kiʼniraʼmáʼ: “A̱jkiu̱lú naxkajxáánʼ rí maxígulú, naʼniulú rí magua̱ʼa̱ wéñuuʼ mu̱ʼni̱ xúgíʼ enii dí rígá ráʼ.”+
6 Mú rí májánʼ wéñuuʼ a̱jkiu̱u̱n Dios* rí nasngájmulú nindxu̱u̱ mba̱a̱. Ikha jngóo náa Kiʼniraʼmáʼ naʼthí: “Dios tsíyoo gáʼyoo rí nuni̱ mbaʼumíjna̱ xa̱bu̱,+ mú nasngájma rí májánʼ wéñuuʼ a̱jkiu̱u̱n náa bi̱ ni̱ndxu̱ún xa̱bu̱ guabiinʼ”.+
7 Ikha jngóo gunimbala ku̱ya̱a̱ Dios,+ mú guguajún jthi̱i̱n Gixa̱a̱+ ga̱jma̱a̱ ikhaa maʼni tsíngumináʼ náa ikháanʼla.+
8 Aʼgua kanuu náa Dios ga̱jma̱a̱ ikhaa ma̱ʼkha̱ kanuu náa ikháanʼla.+ Gu̱ni̱ kaʼwi̱i̱ ñawánla ikháanʼ bi̱ nu̱ni̱ aʼkhá+ ga̱jma̱a̱ gu̱ni̱ kaʼwi̱i̱ a̱jkia̱la+ ikháanʼ bi̱ tséjmáanʼ gúraʼwi̱i̱ rí mu̱ni̱.
9 Gagáwíinʼ a̱jkia̱la ga̱jma̱a̱ gumbi̱ya̱ʼ.+ Xúnduʼwa̱, gagáwíinʼ a̱jkia̱la ní xáʼdxala gákuwáanʼ ngíná.
10 Gu̱ni̱ wabamijná náa inuu Jeobá*+ ga̱jma̱a̱ ikhaa maʼni rí maguaʼdáá numala.+
11 A̱ngui̱nʼ, guniʼñáánʼ ru̱tha̱ dí ra̱májánʼ ga̱jma̱a̱ numún eʼwíinʼ.+ Asndu tsáa bi̱ naʼthí dí raʼkhí ga̱jma̱a̱ numuu mbáa ndxájulú o naʼthá numuu ndxájuu naʼthí dí raʼkhí numuu xtángoo ga̱jma̱a̱ naʼthá numuu. Á mu ikháán naratá numáá xtángoo na̱nguá nindxa̱a̱ʼ mbáa bi̱ naʼnimbánuu xtángoo, nindxa̱a̱ʼ mbáa bi̱ naʼnimbánuu xkujndu.
12 Xtáa mbáwíí bi̱ Nagrui̱ga̱ xtángoo ga̱jma̱a̱ bi̱ Naʼnimbánuu xkujndu,+ ikhaa ma̱ndoo maʼni kríya̱a̱ʼ mbáa o maʼni gámbáa.+ Mú ikháán tsáa lá nindxa̱a̱ʼ mu ma̱ra̱ta̱ númáá xa̱bu̱ numbaaʼ ga̱jma̱a̱ʼ rá.+
13 Rí xúgi̱ gudxawíín ikháanʼ bi̱ nu̱ta̱, “xúgi̱ o gájtsíí mu̱ʼgua̱ náa xuajin mba̱a̱ rúʼko̱, maguanúlúʼ ikhí mbá tsiguʼ, mugu̱jua̱ ga̱jma̱a̱ muʼda̱a̱lú inuu”,+
14 mú tséya̱a̱la rí gúgiʼnii gájtsíí.+ Numuu rí nindxa̱la xóo rujmbaaʼ rí nanújngoo mbá nacha̱ ga̱jma̱a̱ nandáti̱ga̱a̱.+
15 Rígi̱ rí phú gíʼmaa mu̱tha̱, “á mu Jeobá* nandoo,+ makuwáánʼlú ga̱jma̱a̱ mu̱ʼni̱ rígi̱ o rúʼko̱”.
16 Mú ikháanʼla nuni̱ mbaʼumíjna̱ ga̱jma̱a̱ rí nu̱ni̱. Xúgíʼ rúʼko̱ nindxu̱u̱ ra̱májánʼ.
17 Numuu rí á mu mbáa ndaʼyoo má rí gíʼmaa maʼni dí májánʼ mú tséʼni, xtáa rakudaminaʼ aʼkhá.+
Mbaʼa nota
^ Náa ajngáa griego naʼthí, “Ikháanʼ bi̱ nuxuʼdamíjná aʼkhá gajmiála i̱mba̱a̱”.
