Nehemías 3:1-32

  • Nagu̱ma̱a̱ xtájtsí (1-32)

3  Eliasib+ ndxajkun bi̱ phú kayá edxu̱u̱ ga̱jma̱a̱ a̱ngui̱i̱n bi̱ nindxu̱ún ndxajkun nigíʼdi̱i̱ nini̱ májáanʼ Xkrugún Mugu̱.*+ Nini̱ ka̱ʼwi̱i̱+ ga̱jma̱a̱ nixuda̱a̱ʼ xkrugua. Ma̱ngaa nini̱ ka̱ʼwi̱i̱ náa Torre ndrígóo Meá+ asndu náa Torre ndrígóo Hananel.+ 2  Xa̱bu̱ Jericó+ nini̱ májáanʼ náa i̱mba̱ xuíʼtóo xtájtsí. Zacur a̱ʼdióo Imrí niʼni májáanʼ náa i̱mba̱ xuíʼtóo. 3  E̱ji̱i̱n Hasenaá nini̱ májáanʼ Xkrugoo E̱gi̱ʼ.*+ Nitsuajun ixi̱ náa maʼni riejuun+ ga̱jma̱a̱ nixuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. 4  Meremot,+ a̱ʼdióo Uriya, a̱ʼdióo Hacoz, niʼni májáanʼ náa i̱mba̱ xuíʼtóo xtájtsí, Mesulam,+ a̱ʼdióo Berekías, a̱ʼdióo Mesezabel, niʼni májáanʼ náa i̱mba̱ xuíʼtóo xtájtsí ga̱jma̱a̱ Sadoc a̱ʼdióo Baaná niʼni májáanʼ náa i̱mba̱ xuíʼtóo xtájtsí. 5  Xa̱bu̱ tecoítas+ nini̱ májáanʼ náa i̱mba̱ xuíʼtóo xtájtsí, mú xa̱bu̱ bi̱ guáʼdáá numún tágún gúñajunʼ numuu rí táʼndún majuiʼtañajúúnʼ. 6  Joiadá a̱ʼdióo Paséah ga̱jma̱a̱ Mesulam a̱ʼdióo Besodeya nini̱ májáanʼ Xkrugoo Xuajin Wayuu.*+ Nitsuajun ixi̱ náa maʼni riejuun ga̱jma̱a̱ nixuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. 7  Melatías bi̱ nindxu̱u̱ xa̱bu̱ gabaonita+ ga̱jma̱a̱ Jadón bi̱ nindxu̱u̱ xa̱bu̱ meronotita nini̱ májáanʼ náa i̱mba̱ xuíʼtóo xtájtsí. Ikhiin nindxu̱ún xa̱bu̱ bi̱ naguwáʼ náa Gabaón ga̱jma̱a̱ náa Mizpá,+ bi̱ kaʼñún náa naʼtáñajunʼ xa̱bu̱ ñajunʼ bi̱ xtáa xígií náa mbaaʼ náa narámaaʼ a̱jkha̱ʼ* náa mañu Éufrates.+ 8  Uziel a̱ʼdióo Harhaya, nindxu̱u̱ mbáa bi̱ nañajunʼ ga̱jma̱a̱ oro, niʼni májáanʼ náa i̱mba̱ xuíʼtóo xtájtsí. Ga̱jma̱a̱ Hananías, bi̱ naʼni mújúunʼ rí ndataun, niʼni májáanʼ náa i̱mba̱ xuíʼtóo xtájtsí. Ikhiin nijmún itsí mu mugíʼ piso náa kamba̱a̱ náa Jerusalén asndu náa Xtájtsí rí Ma̱ja̱nʼ.*+ 9  Refayá a̱ʼdióo Hur niʼni májáanʼ náa i̱mba̱ xuíʼtóo xtájtsí. Ikhaa nindxu̱u̱ príncipe náa mbá ta̱pha̱ mbayuuʼ Jerusalén. 10  Jedayá a̱ʼdióo Harumaf niʼni májáanʼ náa i̱mba̱ xuíʼtóo xtájtsí, dí kri̱ga̱ náa inuu goʼwóo. Ga̱jma̱a̱ Hatús a̱ʼdióo Hasabneya niʼni májáanʼ náa i̱mba̱ xuíʼtóo xtájtsí. 11  Malkiya a̱ʼdióo Harim+ ga̱jma̱a̱ Hasub a̱ʼdióo Pahat-Moab+ nini̱ májáanʼ náa i̱mba̱ xuíʼtóo xtájtsí, xúʼko̱ má Torre náa rígá Hornos.+ 12  Náa i̱mba̱ xuíʼtóo xtájtsí niʼni májáanʼ Salum a̱ʼdióo Halohés gajmíi̱n waʼxiinʼ. Ikhaa nindxu̱u̱ príncipe náa mbá ta̱pha̱ mbayuuʼ Jerusalén. 13  Hanún gajmíi̱n xa̱bu̱ Zanóah+ nini̱ májáanʼ Xkrugua dí gíʼ xígií náa Mata.*+ Nini̱ májáanʼ ga̱jma̱a̱ nixuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. Ma̱ngaa nini̱ májáanʼ mbá 445 metro* xtájtsí asndu náa Xkrugua náa rígá Ru̱tsu̱u̱ Idiʼ.*+ 14  Malkiya a̱ʼdióo Recab, bi̱ nindxu̱u̱ príncipe náa mbayuuʼ Bet-Hakerem,+ niʼni májáanʼ Xkrugua náa rígá Ru̱tsu̱u̱ Idiʼ. Niʼni májáanʼ ga̱jma̱a̱ nikuda̱a̱ʼ xkrugua ma̱ngaa ixi̱ mbi̱jua̱ rí magugua̱a̱ ga̱jma̱a̱. 15  Salún a̱ʼdióo Colhozé, bi̱ nindxu̱u̱ príncipe náa mbayuuʼ Mizpá,+ niʼni májáanʼ Xkrugua náa rígá Puzu.*+ Niʼni májáanʼ ma̱ngaa niʼni goʼwóo ga̱jma̱a̱ nikuda̱a̱ʼ xkrugua ma̱ngaa ixi̱ mbi̱jua̱ rí nagúguáa ga̱jma̱a̱. Ma̱ngaa niʼni májáanʼ xtájtsí ndrígóo Laguna náa Na̱jkha̱ kúʼwúun iyaʼ,*+ rí gíʼ xígií náa rígá Jardín* ndrígóo Rey,+ asndu náa Escalera+ rí nagajta̱a̱ náa Xuajñuu David.+ 16  Nehemías a̱ʼdióo Azbuc, bi̱ nindxu̱u̱ príncipe náa mbá ta̱pha̱ mbayuuʼ Bet-Zur,+ niʼni májáanʼ náa i̱mba̱ xuíʼtóo xtájtsí, náa inuu rí Nijuiʼdi̱i̱ David*+ asndu náa tanque rí niguma+ ma̱ngaa asndu náa Guʼwún bi̱ guáʼdáá Tsiaki̱i̱.* 17  Levitas nini̱ májáanʼ náa i̱mba̱ xuíʼtóo xtájtsí, bi̱ ndiyá edxu̱u̱ ikhí nindxu̱u̱ Rehúm a̱ʼdióo Baní, Hasabías, bi̱ nindxu̱u̱ príncipe náa mbá ta̱pha̱ mbayuuʼ Queilá,+ niʼni májáanʼ náa i̱mba̱ xuíʼtóo xtájtsí ga̱jma̱a̱ numuu xuajñuu. 18  A̱ngiu̱ún ikhiin nini̱ májáanʼ náa i̱mba̱ xuíʼtóo xtájtsí. Bi̱ ndiyá edxu̱u̱ ikhí nindxu̱u̱ Bavái a̱ʼdióo Henadad, bi̱ nindxu̱u̱ príncipe náa mbá ta̱pha̱ mbayuuʼ Queilá. 19  Náa i̱mba̱ níjniúu, Ézer a̱ʼdióo Jesúa,+ bi̱ nindxu̱u̱ príncipe náa Mizpá, niʼni májáanʼ náa i̱mba̱ xuíʼtóo xtájtsí náa inuu rí naxtagijxi̱i̱ ajua̱nʼ, dí wíji̱ kayóo xtájtsí.+ 20  Ikhú, Baruc a̱ʼdióo Zabái+ niñajunʼ gakhi̱i̱ wéñuuʼ ga̱jma̱a̱ niʼni májáanʼ náa i̱mba̱ xuíʼtóo xtájtsí, náa wíji̱ dí kayóo xtájtsí asndu náa riejuun goʼwóo Eliasib+ ndxajkun bi̱ phú kayá edxu̱u̱. 21  Ma̱ngaa Meremot,+ a̱ʼdióo Uriya, a̱ʼdióo Hacoz, niʼni májáanʼ i̱mba̱ xuíʼtóo xtájtsí, náa riejuun goʼwóo Eliasib asndu náa nawámbárigo̱o̱ goʼwóo Eliasib. 22  Ndxajkun bi̱ kúwá náa mbayuuʼ Jordán+ nini̱ májáanʼ náa i̱mba̱ xuíʼtóo xtájtsí. 23  Benjamín ga̱jma̱a̱ Hasub nini̱ májáanʼ náa i̱mba̱ xuíʼtóo xtájtsí, dí kri̱ga̱ mijngii náa inuu guʼwún. Azarías, a̱ʼdióo Maaseya, a̱ʼdióo Ananíah, niʼni májáanʼ náa i̱mba̱ xuíʼtóo, dí kri̱ga̱ mijngii náa goʼwóo. 24  Ga̱jma̱a̱ Binuí a̱ʼdióo Henadad niʼni májáanʼ náa i̱mba̱ xuíʼtóo xtájtsí, náa nagi̱ʼdu̱u̱ goʼwóo Azarías asndu náa wíji̱ dí kayóo xtájtsí+ ma̱ngaa asndu náa eskíniu̱u̱. 25  Palal a̱ʼdióo Uzái niʼni májáanʼ náa i̱mba̱ xuíʼtóo xtájtsí dí kri̱ga̱ náa inuu dí wíji̱ kayóo xtájtsí ga̱jma̱a̱ torre, rí na̱jkha̱ xígií náa Goʼwóo Rey,*+ dí gíʼ itháan rijma̱a̱ náa Rexo̱o̱ náa gíi̱nʼ bi̱ Nuñewa̱a̱n.*+ Pedaya a̱ʼdióo Parós+ niʼni májáanʼ náa i̱mba̱ xuíʼtóo. 26  Xa̱bu̱ bi̱ nuñejunʼ náa guʼwá rí nduyamajkuíí Dios*+ bi̱ kúwíin náa Ofel+ nini̱ májáanʼ asndu náa inuu Xkrugua dí rígá Iyaʼ*+ náa xígií nagájnuu a̱jkha̱ʼ* asndu náa torre dí nakujmaa itháan mitsídánʼ. 27  Ikhú xa̱bu̱ tecoítas+ nini̱ májáanʼ náa i̱mba̱ xuíʼtóo xtájtsí, náa inuu torre dí nakujmaa itháan mitsídánʼ asndu náa xtájtsí ndrígóo Ofel. 28  Ndxajkun nini̱ májáanʼ náa i̱mba̱ xuíʼtóo xtájtsí dí kri̱ga̱ itháan rijma̱a̱ náa Xkrugún Wáyú.*+ Mámbáa niñajunʼ náa inuu goʼwóo. 29  Sadoc+ a̱ʼdióo Imer niʼni májáanʼ náa i̱mba̱ xuíʼtóo xtájtsí, dí kri̱ga̱ náa inuu goʼwóo. Semaya a̱ʼdióo Secanías, bi̱ nañewu̱u̱n Xkrugua náa narámaaʼ a̱jkha̱ʼ,*+ niʼni májáanʼ náa i̱mba̱ xuíʼtóo xtájtsí. 30  Ikhú, Hananías a̱ʼdióo Selemías ga̱jma̱a̱ Hanún, bi̱ maʼni majuiin e̱ji̱i̱n Zalaf, nini̱ májáanʼ náa i̱mba̱ xuíʼtóo xtájtsí. Mesulam+ a̱ʼdióo Berekías niʼni májáanʼ náa i̱mba̱ xuíʼtóo xtájtsí, dí kri̱ga̱ náa inuu goʼwóo. 31  Ma̱ngaa Malkiya, bi̱ ma̱ngaa nindxu̱u̱ bi̱ nañajunʼ ga̱jma̱a̱ oro, niʼni májáanʼ náa i̱mba̱ xuíʼtóo xtájtsí, dí na̱jkha̱ xígií náa guʼwún xa̱bu̱ bi̱ nuñajunʼ náa guʼwá rí nduyamajkuíí Dios*+ ma̱ngaa náa guʼwún bi̱ nugujua̱ náa inuu Xkrugua náa Nduyáá á mu xúgíʼ rígá májánʼ* asndu náa cuarto dí grígu tsu̱du̱u̱ náa eskíniu̱u̱. 32  Xa̱bu̱ bi̱ nuñajunʼ ga̱jma̱a̱ oro ga̱jma̱a̱ bi̱ nugujua̱ nigíʼdi̱i̱ nini̱ májáanʼ xtájtsí asndu náa cuarto dí grígu náa eskíniu̱u̱ asndu náa Xkrugún Mugu̱.+

Mbaʼa nota

^ O “Puerta de las Ovejas”.
^ O “Puerta del Pescado”.
^ O “Puerta de la Ciudad Vieja”.
^ O “oeste”.
^ O “Muro Ancho”.
^ O “Puerta de los Montones de Ceniza”.
^ Náa ajngáa hebreo naʼthí, “1,000 gúʼxúʼ”. Atayáá apén. B14.
^ O “Puerta del Valle”.
^ O “Puerta de la Fuente”.
^ O “Ixi̱ ri̱ʼi̱”.
^ O “Estanque del Canal”.
^ O “Sepulturas de David”.
^ O “Casa de los poderosos”.
^ O “Patio de la Guardia”.
^ O “Casa del Rey”.
^ O “netineos”. Náa ajngáa hebreo naʼthí, “bi̱ nixnajxi̱mijna̱”.
^ O “Puerta del Agua”.
^ O “este”.
^ O “Puerta de los Caballos”.
^ O “Puerta Oriental”.
^ Náa ajngáa hebreo naʼthí, “bi̱ nixnajxi̱mijna̱”.
^ O “Puerta de la Inspección”.

Copyrights ndrígóo i̱yi̱i̱ʼ rígi̱