Jonás 1:1-17
1 Jeobá niʼthúu̱n ajngáa rígi̱ Jonás*+ a̱ʼdióo Amitái:
2 “Ayuʼ náa xuajin mba̱a̱ Nínive+ ga̱jma̱a̱ arathún xa̱bu̱ dí xuajin maguma gámbáa, numuu rí nda̱yo̱o̱ dí nuni nindxu̱u̱ ra̱májánʼ”.
3 Mú Jonás tándoo gáʼnimbo̱o̱ kaʼyoo Jeobá ikha jngóo niraʼwíí maʼga Tarsis, nigajtaa náa xuajin Jope ikhí nixkamaa mbá barco dí na̱jkha̱ náa Tarsis. Índo̱ niguámbóo niʼni numuu pasájiúu nitsimuu mu maʼga náa Tarsis gajmíi̱n bi̱ kajchún ikhí, mu xúʼko̱ xáʼnimbánuu rí Jeobá niʼthúu̱n.
4 Ikhú Jeobá niʼni rí maxnúu mbá ruʼwambiʼ náa lamáa,* ra̱ʼkhá tháán gakhi̱i̱ nixnúu giñámbíʼ rí asndu barco nigíʼ magudiri̱ga̱a̱.
5 Bi̱ nuruguambáá magún kuñu̱u̱n barco, ra̱ʼkhá tháán nimíñúún rí asndu mámbáa dí ikhiin nigíʼdi̱i̱ ninda̱ʼa̱a̱ dios ndrígu̱ún rí mambáñún ga̱jma̱a̱ nigíʼdi̱i̱ nidama̱ʼa̱ náa lamáa xúgíʼ rí kajti náa barco mu xáʼni ki̱wu̱n.+ Mú Jonás nijngúun náa awúu̱n barco ikhí nibóo̱ʼ ga̱jma̱a̱ mbá ndiyáá niʼgu.
6 Ikhú bi̱ naxná ikha náa barco ni̱jkha̱ gáʼthúu̱n: “¡Náá numuu rí nanuʼ!, ¡Atujxa̱a̱ʼ, aratháán dios ndrígáaʼ! Mbáa Dios bi̱ gajkhun magáwíinʼ a̱jkiu̱u̱n kaʼyulú mu xákáñulú”.+
7 Ikhú nitamíjná: “Guríyaʼlú suerte*+ mu mbuʼyáá tsáá gíʼdoo aʼkhúun náa gamiéjunʼ rígi̱”. Índo̱ niriya̱ʼ suerte, ndiyáá dí nindxu̱u̱ Jonás.+
8 Ikhú nitháán: “Mbá péñu* aratúxu̱, tsáá gíʼdoo aʼkhúun náa gamiéjunʼ dí ni̱ʼkha̱nú inulu rá. Dí ñajunʼ tani̱, náa edxa̱ʼ, náá xuajñaanʼ, tsáa xa̱bi̱i̱ nindxa̱a̱ʼ.”
9 Ikhaa niriʼñúún: “Ni̱ndxu̱ʼ hebreo, ndayamajkhuu* Jeobá, Dios bi̱ niʼni mekhu, bi̱ niʼni lamáa ga̱jma̱a̱ ku̱ba̱ʼ”.
10 Ikhú xa̱bu̱ nimiñún itháan, ga̱jma̱a̱ nitháán: “Dí lá nitani̱ ján.” (Xa̱bu̱ ndiyáá má dí xtáa ragáyúu náa inuu Jeobá, numuu dí ikhaa má niʼthún).
11 Ikhú nitháán: “Ndiéjunʼ gáʼyo̱o̱ʼ mu̱nia̱ʼxu̱ mu lamáa mawi̱ji̱i̱ rá.” Numuu dí lamáa ra̱ʼkhá tháán ejmangu̱u̱ʼ.
12 Ikhaa niʼthún: “Guxujxúun gudamu̱ʼu̱u̱n náa lamáa mu xúʼko̱ lamáa mawi̱ji̱i̱, numuu dí nda̱yo̱o̱ dí ga̱jma̱a̱ numuʼ ni̱ʼkha̱nú giñán mbiʼ rígi̱”.
13 Mú xa̱bu̱ nini̱ tsiakimíjna̱ magúun kuñuun barco náa rawuunʼ iyaʼ, mú táʼngu̱u̱n, numuu dí lamáa ra̱ʼkhá tháán ejmangu̱u̱ʼ.
14 Ikhú nitakáñíí Jeobá: “¡Mbá péñu Jeobá xátatsiʼñáʼ makañúxu ga̱jma̱a̱ numuu xa̱bu̱ bugi̱! Narígá rígi̱ numuu rí ikháán nandaaʼ Jeobá, ikha jngóo xátani rí maguaʼdáá aʼkhúxu náa makhañúu* xa̱bu̱ bi̱ nda̱a̱ aʼkhúun bugi̱”.
15 Nda̱wa̱á nixuxi̱i̱ Jonás nidama̱ʼa̱a̱n, ikhú lamáa niwi̱ji̱i̱.
16 Índo̱ xa̱bu̱ ndiyáá rígi̱ nimíñúún kuyáá Jeobá,+ nixnajxi̱ tsigijñaʼ gamajkhu náa inuu Jeobá ga̱jma̱a̱ nixná ajngún rí muni ñajuunʼ.
17 Jeobá nikuʼmaa mbáa e̱gi̱ʼ mba̱a̱ mu mikurajngiúunʼ Jonás ga̱jma̱a̱ ikhaa nixtáa ajtsú mbiʼi ga̱jma̱a̱ ajtsú mbruʼun náa awúu̱n e̱gi̱ʼ.+
