Filemón 1:1-25
1 I̱yi̱i̱ʼ rígi̱ niʼnirámáʼ Pablo, bi̱ kraʼaa náa guʼwá e̱jua̱nʼ+ ga̱jma̱a̱ numuu Cristo Jesús, ma̱ngaa ndxájulú Timoteo+ mu maʼga inuu Filemón, bi̱ nandulú kuʼyáá ga̱jma̱a̱ bi̱ nuñajunʼ gajmiúlú,
2 xó má náa ndxájulú Apfia ga̱jma̱a̱ Arquipo+ bi̱ nuñajunʼ mbóó gajmiúlú xóo soldado náa Cristo, ga̱jma̱a̱ bi̱ nagimbíi̱n* náa guʼwáaʼ:+
3 Garigá rí májánʼ wéñuuʼ a̱jkiu̱u̱n Dios* náa ikháanʼla ga̱jma̱a̱ rí tsímáá ndrígóo Anu̱lú Dios ma̱ngaa ndrígóo Tátá Jesucristo.
4 Índo̱ natakáñuu Dios mu maxna̱a̱ núma̱aʼ naríyaʼ má xúʼko̱ mbiʼyaaʼ,+
5 numuu rí nadxawuun má xúʼko̱ fe rí xtaʼdáá, ma̱ngaa rí nandaaʼ xtayáá Tátá Jesús ga̱jma̱a̱ xúgíinʼ bi̱ niraʼwíin* Dios.
6 Natajkháan mu fe rí xtaʼdáá gajmiáanʼ eʼwíinʼ maxkajxi̱i̱n mu ma̱ta̱ya̱a̱ xúgíʼ dí májánʼ rí kuaʼdáá ga̱jma̱a̱ numuu Cristo.
7 Ra̱ʼkhá tháán nidxuʼ ga̱jma̱a̱ niʼni̱i̱ a̱jkiu̱nʼ índo̱ nidxuun ngajua ndrígáaʼ, núma̱aʼ má ikháán ndxájuʼ, nitani̱ rí muda̱a̱ tsiaki̱i̱ a̱jkiu̱ún xúgíinʼ bi̱ niraʼwíin Dios.
8 Ikha jngóo, maski ajndu ikhúún ni̱ndxu̱ʼ xa̱bi̱i̱ Cristo ga̱jma̱a̱ kaʼyoʼ matha̱nʼ rí gíʼmaa matani̱ rí májánʼ,
9 mú ga̱jma̱a̱ numuu ngajua rí xtaʼdáá na̱nda̱ʼa̱a̱ʼ rí matani̱ rígi̱. Ikhúún Pablo ñajunʼ xa̱bu̱ nikhi̱i̱ má, ma̱ngaa rí xúgi̱ xtáá náa guʼwá e̱jua̱nʼ ga̱jma̱a̱ numuu Cristo Jesús.
10 Na̱nda̱ʼa̱a̱ʼ mbá péñu* ga̱jma̱a̱ numuu Onésimo,+ bi̱ ninindxu̱u̱ asndu xóo a̱ʼdióʼ+ índo̱ nixtáá náa guʼwá e̱jua̱nʼ.
11 Rí nákha ginii támbáyaaʼ wéñuuʼ, mú rí xúgi̱ ma̱ndoo mambáyulú nájmáanʼ.
12 Nakuʼnguáanʼ maʼga̱a̱ mbu̱júu̱ náa ikháán bi̱ ra̱ʼkhá tháán eyoʼ ka̱yo̱o̱.
13 Nandoʼ rí maguanúu gi̱i̱ mu mambáyuʼ xóo xtiʼkuaaʼ, xúgi̱ rí xtáá guʼwá e̱jua̱nʼ ga̱jma̱a̱ numuu ajngáa rí májánʼ.+
14 Mú tsíyóʼ ma̱ni̱ mbaʼ maníí rígi̱ á mu raʼkháa ikháán rathá, mu xúʼko̱ xátani̱ xóo katsudáán ñajunʼ májánʼ rígi̱, matani̱ ga̱jma̱a̱ xúgíʼ a̱jkia̱a̱nʼ.+
15 Mbáa ikha jngóo nitsíngu̱u̱nʼ náa ikháán mbá xngaa:* Mu xúʼko̱ ma̱ndoo mata̱nga̱án maraxtaa ga̱jma̱a̱ʼ kámuu,
16 ni xáta̱ya̱a̱ xóo mbáa ñumbáá,+ atayáá xóo mbáa bi̱ gíʼdoo numuu, xóo ndxájuaaʼ bi̱ nandaaʼ xtayáá.+ Ikhúún nandoʼ ka̱yo̱o̱, mú ikháán gíʼmaa maʼndaaʼ xtayáá itháan numuu rí mbóó xtaa ratiejunʼ ga̱jma̱a̱ʼ náa Jesús.
17 Á mu natayoʼ rí ni̱ndxu̱ʼ xóo mbáa bi̱ nambájxa̱a̱ʼ ga̱jma̱a̱ʼ, atriguíi májánʼ, xó má gátrigúun ikhúún.
18 Á mu niʼniaaʼ mbá dí raʼkhí o gíʼmaa náa inaaʼ, ma̱ni̱ numa̱a̱ʼ má ikhúún.
19 Ikhúún Pablo, naniraʼmáʼ ga̱jma̱a̱ ñawúnʼ: Ikhúún má gáni numa̱a̱ʼ, (mú garmáʼáan a̱jkia̱a̱nʼ rí ikháán itháan mba̱a̱ gíʼmáán náa inuʼ).
20 Mbá péñu ndxájuʼ, ataniuʼ rí májánʼ ma̱ngaa atani̱ rí mbayáa tsiaki̱i̱ a̱jkiu̱nʼ ga̱jma̱a̱ numuu Cristo.
21 Nda̱yo̱o̱ má rí matani̱ dí natha̱nʼ, ga̱jma̱a̱ rí matani̱ itháan ki xóo rí naniraʼmáʼ.
22 Raʼkháa i̱ndó rúʼko̱, ma̱ngaa atayáʼ náa maguanúʼ numuu rí gúʼthu̱u̱n matangu̱ún mbu̱júu̱ gáyala,*+ númala má rí nutajkháan.
23 Narajxi̱ín Epafras+ bi̱ kruʼúún ga̱jmu̱ʼ náa guʼwá e̱jua̱nʼ ga̱jma̱a̱ numuu Cristo Jesús.
24 Ma̱ngaa narajxi̱ín Marcos, Aristarco,+ Demas+ ga̱jma̱a̱ Lucas,+ ikhiin nindxu̱ún bi̱ nañajunʼ gajmíʼ.
25 Garigá rí májánʼ wéñuuʼ a̱jkiu̱u̱n Tátá Jesucristo náa ikháanʼla, numuu rí májáanʼ a̱jkia̱la.
