Raga̱jma̱ i̱yi̱i̱ʼ rí na̱jkha̱ inuu Timoteo 1:1-18
1 I̱yi̱i̱ʼ rígi̱ niʼnirámáʼ Pablo, apóstol ndrígóo Cristo Jesús, xó má nindoo Dios, dí mundrígúu rí makuwáánʼ ga̱jma̱a̱ numuu Cristo Jesús,+
2 mu maʼga náa inuu Timoteo bi̱ nindxu̱u̱ a̱ʼdióʼ bi̱ nandoʼ ka̱yo̱o̱:+
Garigá náa ikháán rí májánʼ wéñuuʼ a̱jkiu̱u̱n,* dí nagáwíinʼ a̱jkiu̱u̱n ga̱jma̱a̱ rí tsímáá ndrígóo Anu̱lú Dios ma̱ngaa ndrígóo Cristo Jesús bi̱ nindxu̱u̱ Tátá ndrígúlú.
3 Naxna̱a̱ wéñuuʼ núma̱a̱ Dios bi̱ na̱ni̱ ñajuunʼ xó má nini̱ wajin xiʼñúnʼ ga̱jma̱a̱ mbá ku̱ma̱ kaʼwu, ma̱ngaa narmáʼáan a̱jkiu̱nʼ má xúʼko̱ tani̱ índo̱ natajkháan mbiʼíí mbruʼun.
4 Índo̱ narmáʼáan a̱jkiu̱nʼ dí xóo natambi̱ya̱ʼ, nandoʼ mba̱ya̱a̱ʼ mu xúʼko̱ maxtáá gagi.
5 Índo̱ narmáʼáan a̱jkiu̱nʼ eʼni fe ndrígáaʼ dí ragíʼdoo a̱jma̱ inuu,+ dí xóo ginii nigiʼdoo xíñáanʼ Loida ga̱jma̱a̱ ru̱dáaʼ* Eunice, ga̱jma̱a̱ nda̱yo̱o̱ gajkhun rí ikháán mangáán xtaʼdáá.
6 Ga̱jma̱a̱ numuu rígi̱, gajmaaʼ má xúʼko̱ rí Dios nixnáaʼ índo̱ ikhúún nixkrámáánʼ, atatsikáraʼa̱a̱ má xúʼko̱ xóo mbá aguʼ.+
7 Espíritu santo* rí Dios nixnúlú tséʼni rí mamiñúlúʼ,+ naxnúlú tsiaki̱i̱,+ ngajua, ga̱jma̱a̱ rí mundxaʼwamíjna̱ májánʼ.
8 Ikha jngóo xátiya̱a̱ʼ ma̱rata ga̱jma̱a̱ numuu Tátá ndrígu̱lú,+ ni má ga̱jma̱a̱ numuʼ ikhúún, rí xtáá náa guʼwá e̱jua̱nʼ ga̱jma̱a̱ numuu ikhaa, ga̱ʼnga̱a̱ʼ rí matamíniiʼ+ ga̱jma̱a̱ numuu ajngáa rí májánʼ ga̱jma̱a̱ gakuma̱a̱ʼ xtayáá tsiaki̱i̱ ndrígóo Dios.+
9 Ikhaa niʼni káwáánʼ ga̱jma̱a̱ nindxaʼwúlú mu manindxu̱lú mikaʼwáanʼ,+ raʼkháa ga̱jma̱a̱ numuu mbá ñajunʼ rí ikháanʼ ni̱ʼni̱, nindxu̱u̱ numuu rí xúʼko̱ nindoo ikhaa, ga̱jma̱a̱ numuu rí májánʼ wéñuuʼ a̱jkiu̱u̱n.+ Rígi̱ niwasngájmulú náa majñu̱u̱ʼ Cristo Jesús asndu nákha wajyúuʼ,
10 mú rí xúgi̱ nakujmaa kaʼwu, numuu rí Cristo Jesús bi̱ Naʼni káwáánʼlú nisngájmaminaʼ.+ Ikhaa niʼni rí nakháñulú ni xágiʼdoo numuu,*+ ga̱jma̱a̱ numuu ajngáa rí májánʼ+ niʼni makujmaa rí xóo gákuwáanʼ+ ga̱jma̱a̱ rí xuyulúʼ ni xáʼchúu,+
11 ga̱jma̱a̱ numuu rígi̱ nikánúʼ ñajunʼ rí mataráʼa, mani̱ndxu̱ʼ apóstol ga̱jma̱a̱ masngáa.+
12 Ikha jngóo xígi̱ kaʼnii xtáá ramínuuʼ xúgi̱+ ga̱jma̱a̱ tsétiyu̱ʼ.+ Numuu rí naniʼníiʼ bi̱ naku̱mu̱ʼ ka̱yo̱o̱ ga̱jma̱a̱ nda̱yo̱o̱ gajkhun rí ikhaa maʼngo̱o̱ mañewu̱u̱n rí niniʼñúuʼ náa ñawúunʼ asndu mbiʼi rúʼko̱.+
13 Atayaridáá má xúʼko̱ xkri̱doo* ajngáa májánʼ rí ikhúún nitha̱a̱nʼ,+ ga̱jma̱a̱ atasngájma má xúʼko̱ fe ga̱jma̱a̱ ngajua, xóo mbáa xa̱bu̱ bi̱ xtáa mbóó ga̱jma̱a̱ Cristo Jesús.
14 Ga̱jma̱a̱ espíritu santo dí kuaʼdáálú gámbáyaaʼ mu matiewa̱a̱n rí gíʼdoo wéñuuʼ numuu rí niwixnángawaaʼ.+
15 Ikháán má natayáá rí xúgíinʼ xa̱bekha bi̱ naguwáʼ náa Asia+ nini̱ñu̱ʼ, xóo Figelo ga̱jma̱a̱ Hermógenes.
16 Tátá gágáwíinʼ a̱jkiu̱u̱n kaʼñún bi̱ kúwá náa goʼwóo Onesíforo,+ numuu rí ikhaa nixnúʼ má xúʼko̱ tsiaki̱i̱, tátiyu̱u̱ʼ ga̱jma̱a̱ numuʼ rí xtáá náa guʼwá e̱jua̱nʼ kaxtoʼóʼ ga̱jma̱a̱ cadena.
17 Rí phú niʼni, índo̱ ikhaa nixtáa náa Roma ndiñúunʼ má xúʼko̱ asndu nixkamún.
18 Tátá gáʼni rí Jeobá* magáwíinʼ a̱jkiu̱u̱n kaʼyoo mbiʼi rúʼko̱. Ikháán má nitayáá xúgíʼ ñajunʼ rí niʼni ga̱jma̱a̱ numuʼ náa Éfeso.
