Raga̱jma̱ libro ndrígu̱ún Reyes 13:1-25
13 Jehoacaz a̱ʼdióo Jehú+ ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria, índo̱ naʼni má 23 tsiguʼ dí Jehoás+ a̱ʼdióo Ocozías+ naʼtáñajunʼ náa Judá, ga̱jma̱a̱ Jehoacaz niʼtáñajunʼ mbá 17 tsiguʼ.
2 Niʼni dí ra̱májánʼ náa iduu Jeobá ga̱jma̱a̱ tániñuuʼ rakudaminaʼ ikháá má aʼkhá dí niʼni Jeroboán a̱ʼdióo Nebat dí niʼni rí xa̱bu̱ Israel muxudamíjna̱.+ Niʼni má xúʼko̱.
3 Ikha jngóo Jeobá ra̱ʼkhá tháán nikásngañu̱u̱ʼ+ kaʼñún xa̱bu̱ Israel,+ nixnájxi̱i̱n náa ñawúunʼ Hazael+ rey bi̱ xtáa náa Siria ga̱jma̱a̱ náa Ben-Hadad+ a̱ʼdióo Hazael náa mbá xúgíʼ mbiʼi rúʼko̱.
4 Nda̱wa̱á Jehoacaz niʼtákáñuu Jeobá, ga̱jma̱a̱ Jeobá niʼdxawuun, numuu dí ndiʼyoo xú kaʼnii rey ndrígóo Siria naʼni ngíníi xa̱bu̱ Israel.+
5 Ikha jngóo Jeobá nixniún xa̱bu̱ Israel mbáa bi̱ maʼni káwíin+ náa ñawúúnʼ xa̱bu̱ Siria, ga̱jma̱a̱ israelitas nindoo nikúwá náa guʼwún xó má nákha ginii.*
6 (Mú túniña̱a̱ʼ ruxudamíjna̱ aʼkhá xó má nini̱ bi̱ kúwá náa goʼwóo Jeroboán, rí niʼni dí xa̱bu̱ Israel muxudamíjna̱.+ Nini̱ má xúʼko̱ aʼkhá, ga̱jma̱a̱ poste rí mitsúʼkháan*+ kaʼníí rígá náa Samaria).
7 Kááʼ mbá 50 soldado bi̱ nudrúwíin wáyú niguanúu gajmíi̱n Jehoacaz, ma̱ngaa mbá gu̱wa̱ʼ carros ga̱jma̱a̱ mbá 10,000 soldado, numuu dí rey ndrígóo Siria niʼni gámbíin,+ niniñúúnʼ i̱ndó e̱jndo̱o̱ʼ xóo índo̱ nurujtsi trigo.+
8 Dí naʼthí xóó itháan ga̱jma̱a̱ numuu Jehoacaz, xúgíʼ dí niʼni ga̱jma̱a̱ tsiaki̱i̱ dí nigiʼdoo, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
9 Ikhú Jehoacaz ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nidi̱i̱ náa Samaria,+ ga̱jma̱a̱ a̱ʼdióo Jehoás ni̱jkha̱nú ninindxu̱u̱ nuxi̱i̱ʼ rey.
10 Jehoás a̱ʼdióo Jehoacaz ni̱jkha̱nú ninindxu̱u̱ rey náa Israel, nigidaʼ niʼtáñajunʼ asndu náa Samaria índo̱ naʼni má 37 tsiguʼ dí Jehoás+ nindxu̱u̱ rey náa Judá, Jehoás niʼtáñajunʼ mbá 16 tsiguʼ.
11 Niʼni dí ra̱májánʼ náa iduu Jeobá, tániñuuʼ rakudaminaʼ* aʼkhá dí Jeroboán a̱ʼdióo Nebat niʼni dí xa̱bu̱ Israel muxudamíjna̱.+ Niʼni ikháá má aʼkhá.
12 Dí naʼthí xóó itháan ga̱jma̱a̱ numuu Jehoás, xúgíʼ dí niʼni, tsiaki̱i̱ dí nigiʼdoo, xóo nixmínaʼ ga̱jma̱a̱ rey Amasías bi̱ xtáa náa Judá,+ kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.
13 Ikhú Jehoás ndiyáa jxu̱u̱ʼ gajmíi̱n wajin xiʼñúuʼ, ga̱jma̱a̱ Jeroboán*+ nigi̱ʼi̱ náa xíliu̱u̱* dí naʼtáñajunʼ. Jehoás nijuiʼdi̱i̱ náa Samaria náa nijuiʼdi̱ín reyes bi̱ nikúwá náa Israel.+
14 Índo̱ Eliseo+ ndiyóo mbá nandii dí nda̱wa̱á nixíyáa, Jehoás rey ndrígóo Israel nigajtaa gáʼyoo. Nibátámuuʼ náa ikhaa, nimbi̱ya̱ʼ ga̱jma̱a̱ niʼthúu̱n: “¡Anu̱ʼ,* anu̱ʼ! ¡Carro ndrígóo Israel ga̱jma̱a̱ bi̱ nudrúwíin wáyú!”.+
15 Ikhú Eliseo niʼthúu̱n: “Ayi̱ jcháaʼ mbá xkamídá ga̱jma̱a̱ mbá nguáthá flecha”. Ikha jngóo ikhaa ni̱ʼkha̱ kayóo xkamídá ga̱jma̱a̱ mbá nguáthá flecha.
16 Eliseo niʼthúu̱n rey Israel: “Arajthuun xkamídá”. Ikhú rey nigujthun ga̱jma̱a̱ Eliseo nigujthun ñawúunʼ rey.
17 Ikhú Eliseo niʼthúu̱n: “Atarmbáʼtáá ventana dí gíʼma xígií náa nagájnuu a̱jkha̱ʼ”.* Ikhú ikhaa nimbáʼtoo. Eliseo niʼthúu̱n: “¡Atada̱ʼ!”. Ikha jngóo ikhaa nidaʼ. Ga̱jma̱a̱ Eliseo niʼthúu̱n: “¡Flecha dí maʼni káwáánʼlú dí na̱ʼkha̱ náa Jeobá, flecha dí maʼni káwáánʼ maxnúu Siria! Maraxna̱a̱* Siria náa Afec+ asndu matani̱ gámbáa”.
18 Nda̱wa̱á niʼthúu̱n: “Arajthuun flechas”, ga̱jma̱a̱ rey nigujthun. Ikhú Eliseo niʼthúu̱n rey ndrígóo Israel: “Araxnáá mbayííʼ”. Ikhú ikhaa nixnúu kááʼ mbá ajtsú nuthu ga̱jma̱a̱ niwi̱ji̱.
19 Xa̱bi̱i̱ Dios bi̱ gajkhun nikiʼnáa kaʼyoo ga̱jma̱a̱ niʼthúu̱n: “¡Ndiyóoʼ dí maraxna̱a̱ witsu o majun nuthu mbayííʼ! Xúʼko̱ maʼnga̱a̱ʼ maraxna̱a̱ Siria asndu matani̱ gámbáa, mú dí xúgi̱ kááʼ maʼnga̱a̱ʼ maraxna̱a̱ ajtsú nuthu Siria”.+
20 Nda̱wa̱á dí rúʼko̱ Eliseo nikháñuu ga̱jma̱a̱ nidi̱i̱. Mbá grupo kuʼwáʼ moabitas+ naguʼwún natu̱ʼu̱u̱n náa xuajin índo̱ ndayáa tsiguʼ.*
21 Mbóo mbiʼi tikhuun xa̱bu̱ kúwá rudi̱i̱ mbáa wajinʼ, índo̱ ndiñún mbá grupo kuʼwáʼ, mbá nacha̱ nidama̱ʼa̱a̱n wajinʼ náa nijuiʼdi̱i̱ Eliseo ga̱jma̱a̱ nigáñún. Índo̱ wajinʼ ningajma náa itsu̱u̱ Eliseo, nigabi̱i̱+ ga̱jma̱a̱ niwi̱ji̱.
22 Rey Hazael+ bi̱ xtáa náa Siria niʼni ngíníi má xúʼko̱ xa̱bu̱ Israel+ náa mbá xúgíʼ mbiʼi dí nixtáa Jehoacaz.
23 Jeobá niʼniún dí májánʼ ga̱jma̱a̱ nigáwíinʼ a̱jkiu̱u̱n kaʼñún.+ Ga̱jma̱a̱ numuu rí nimbánuminaʼ ga̱jma̱a̱ Abrahán,+ Isaac+ ga̱jma̱a̱ Jacob.+ Na̱nguá nindoo gáʼni gámbíin, asndu dí mbiʼi xúgi̱ na̱nguá nixkawíin náa inuu.
24 Índo̱ rey Hazael bi̱ xtáa náa Siria nikháñuu, ikhú a̱ʼdióo bi̱ mbiʼyuu Ben-Hadad ni̱jkha̱nú ninindxu̱u̱ nuxi̱i̱ʼ rey.
25 Jehoás a̱ʼdióo Jehoacaz nigukaʼyiiʼ Ben-Hadad a̱ʼdióo Hazael xuajin dí ikhaa nigu kaʼyúuʼ anu̱u̱ Jehoacaz índo̱ nixmijná. Jehoás nixnúu mbá ajtsú nuthu+ ga̱jma̱a̱ nigruigúu xuajin dí rígá náa Israel.
