Timbá libro ndrígu̱ún Reyes 3:1-28
3 Salomón ndiyáa wáxióo* faraón+ rey ndrígóo Egipto mu ma̱ndoo mambajxúu ga̱jma̱a̱. Ndiyáa ga̱jma̱a̱ ni̱jkha̱ kayáa náa Xuajñuu David+ índo̱ xtáa raguma goʼwóo.+ Ma̱ngaa xúʼko̱ má goʼwóo Jeobá+ ga̱jma̱a̱ xtájtsí dí rígá náa mbájndi Jerusalén.+
2 Nákha ikhú xa̱bu̱ xuajin kaʼníí nuxnajxi̱ tsigijñaʼ náa rí mitsídánʼ.+ Numuu dí nákha ikhú xóó na̱nguá niguma mbá guʼwá náa marigá mbiʼyuu Jeobá.+
3 Salomón nasngájma rí nandoo kaʼyoo Jeobá numuu dí najngrui̱go̱o̱ xó má rí niʼtáñajuunʼ anu̱u̱* David maʼni. Mú naxnájxi̱ tsigijñaʼ ga̱jma̱a̱ narkúní náa mitsídánʼ.+
4 Rey ni̱jkha̱ náa Gabaón mu maxnájxi̱ tsigijñaʼ ikhí, numuu dí ikhí rígá rí mitsídánʼ dí itháan gíʼdoo numuu.*+ Salomón nixnájxi̱ mbá 1,000 tsigijñaʼ dí nakarámáʼ ikhí.+
5 Náa Gabaón mbruʼun nisngájmaminaʼ Jeobá náa xnuʼndoo Salomón, niʼthúu̱n: “Atando̱ʼo̱ʼ asndu ndiéjunʼ má eyaaʼ”.+
6 Salomón niriʼñuu: “Ikháán nitasngájmáá ngajua rí tsétumuu* xa̱bia̱a̱ʼ David bi̱ nindxu̱u̱ anu̱ʼ.* Numuu dí ikhaa nijngruigo̱o̱ náa kamba̱a̱ʼ ga̱jma̱a̱ mbá a̱jkiu̱u̱n kaʼwu, jmbu ga̱jma̱a̱ májánʼ. Nitasngájmáá má xúʼko̱ dí májánʼ a̱jkia̱a̱nʼ asndu dí mbiʼi xúgi̱ dí niraxniáá mbáa a̱ʼdióo bi̱ magi̱ʼi̱ náa xílí* rí niʼtáñajunʼ.+
7 Dí xúgi̱ Jeobá Dios ndrígóʼ, ikháán nitagiúunʼ ikhúún dí mani̱ndxu̱ʼ rey, náa nigi̱ʼi̱ anu̱ʼ David maski ajndu nindxu̱ʼ mbáa dxámá bi̱ tséjmañuu.+
8 Xa̱bia̱a̱ʼ xtáa náa majñu̱únʼ xa̱bu̱ xuajin bi̱ ikháán nitraʼwíin.+ Mbá xuajin dí ra̱ʼkhá tháán mba̱a̱ rí asndu xáʼnga̱a̱ʼ gátraxnii xa̱bu̱.
9 Araxnáá xa̱bia̱a̱ʼ mbá a̱jkiu̱u̱n rí maʼnimbo̱o̱ mu xúʼko̱ majmaa maʼnimbánuu numún xa̱bu̱ xuajñaanʼ,+ mu majmaa maraʼwíí dí májánʼ ga̱jma̱a̱ dí ra̱májánʼ,+ numuu dí tsáá gájmaa gáʼnimbánuu numún xa̱bu̱ xuajin rígi̱ dí ra̱ʼkhá tháán mbaʼin* rá.”
10 Jeobá ninigu̱u̱ʼ rígi̱ rí Salomón nindo̱ʼo̱o̱.+
11 Ikhú Dios niʼthúu̱n: “Numuu dí nitanda̱ʼa̱ rígi̱, ga̱jma̱a̱ tátanda̱ʼa̱ dí maraxtaa mba̱yu̱u̱ʼ, dí maraʼdáá ni má dí makhañún bi̱ tsíñún gúyáaʼ. Ikháán nitanda̱ʼa̱ dí majmáán makrua̱ʼa̱a̱ʼ matadxawíín numún xa̱bu̱ bi̱ nuxruigami̱jna̱.+
12 Ma̱ni̱ rí natanda̱ʼa̱,+ maxna̱a̱ʼ mbá a̱jkia̱a̱nʼ rí najmañuu ga̱jma̱a̱ dí majmaa makro̱ʼo̱o̱.+ Ma̱ni̱ dí majmañaaʼ asndu xóo rí nimbáa táxtáa nákha ginii ni má xáxtáa nda̱wa̱á bi̱ xóo ikháán.+
13 Ma̱ngaa, maxna̱a̱ʼ asndu rí na̱nguá nitando̱ʼo̱ʼ:+ Dí maraʼdáá wéñuuʼ ma̱ngaa gamajkhu.+ Náa xúgíʼ mbiʼi dí gáraxtaa, xáxtáa nimbáa rey xóo ikháán.+
14 Ga̱jma̱a̱ á mu natatsimbaaʼ xtángoo ndrígóʼ ga̱jma̱a̱ kiʼtáñajunʼ ndrígóʼ índo̱ najngrui̱ga̱a̱ʼ náa kambo̱ʼ, xó má niʼni ana̱a̱ʼ David,+ ma̱ngaa ma̱ni̱ dí maraxtaa mba̱yu̱u̱ʼ”.+
15 Índo̱ Salomón ndijui̱i̱ ndiʼyoo dí nigundaa, ikhú ni̱jkha̱ náa Jerusalén, nixnájximinaʼ náa inuu arca* dí nimbánuu ndrígóo Jeobá, ga̱jma̱a̱ nixnájxi̱ tsigijñaʼ dí nakarámáʼ, tsigijñaʼ dí tsímáá.*+ Ma̱ngaa niʼni mújúunʼ mbá ganitsu mu mu̱phu̱ mbá xúgíinʼ xa̱bi̱i̱.
16 Nákha ikhú, a̱jmi̱i̱n gu̱ʼu̱ bi̱ nugujuamíjna̱, nigún gúyáá rey,
17 timbáa a̱ʼgu̱ niʼthí: “Atani̱ mba̱a̱ a̱jkia̱a̱nʼ tátioʼ rey, mbóó guʼwá náa xtáá ga̱jmu̱ʼ a̱ʼgu̱ bugi̱, ga̱jma̱a̱ índo̱ ikhúún nigúʼdaa ada̱, ikhí má xtáa ma̱ngaa.
18 Índo̱ niʼni ajtsú e̱jkha̱ʼ dí nigúʼdaa ada̱, a̱ʼgu̱ bugi̱ nigiʼdaa ada̱ ma̱ngaa, ndajkuáanʼ kuwáanʼxu̱ mbóó, ndawa̱a̱ imba̱a̱ ga̱jma̱á nindxu̱xu̱ náa guʼwá.
19 Índo̱ mbruʼun, a̱ʼdióo a̱ʼgu̱ bugi̱ nikháñuu numuu dí nimbrígiúuʼ.
20 Tikhu nduʼun nitu̱jxu̱u̱ ga̱jma̱a̱ ni̱jkha̱ kayáa a̱ʼdióʼ, nitámaaʼ níjniúu ndiyáraʼaa. Mú a̱ʼdióo bi̱ nikháñuu nitíga̱a̱ mba̱yaráʼaa ikhúún, índo̱ ñumbáá ndrígáaʼ bugi̱ naʼgu.
21 Índo̱ nituxu̱ʼ miʼcha̱ mu maxnu̱u̱ maʼxúuʼ a̱ʼdióʼ ndi̱yo̱o̱ dí nikháñuu, mú índo̱ ndi̱yo̱o̱ májánʼ ndi̱yo̱o̱ dí raʼkháa lá a̱ʼdióʼ bi̱ nigúʼdaa”.
22 Mú imba̱a̱ a̱ʼgu̱ niʼthí: “¡Na̱nguá, a̱ʼdióʼ ikhúún bi̱ ndaʼya, nikháñuu a̱ʼdiáaʼ ján!”. Ga̱jma̱a̱ bi̱ timbáa a̱ʼgu̱ niʼthí: “Na̱nguá, a̱ʼdiáaʼ ikháán bi̱ nikháñuu, ikhúún a̱ʼdióʼ bi̱ ndaʼya”. Xúʼko̱ kaʼnii nikúwá ragi̱ʼdu̱u̱n náa inuu rey.
23 Nda̱wa̱á kayuuʼ rey niʼthí: “Xígi̱ eʼthí bugi̱ ‹¡A̱ʼdióʼ ikhúún bi̱ ndaʼya, nikháñuu a̱ʼdiáaʼ ikháán!›”. Mú imba̱a̱ naʼthí mbu̱júu̱: “¡Na̱nguá, a̱ʼdiáaʼ ikháán bi̱ nikháñuu, ikhúún a̱ʼdióʼ bi̱ ndaʼya!”.
24 Ikhú rey niʼthí: “Aguwaʼ ku̱ya̱la mbá espada”. Ikhú niguwáʼ kuñu̱u̱n mbá espada.
25 Ga̱jma̱a̱ rey niʼthún: “Gurujtu ngayiila ada̱ bi̱ ndaʼya. Mbá ta̱pha̱a̱ gúxnia̱a̱la mbáa a̱ʼgu̱ ga̱jma̱a̱ i̱mbá ta̱pha̱a̱ gúxnia̱a̱la imba̱a̱ a̱ʼgu̱”.
26 Mbá nacha̱, ru̱dúu̱* ada̱ bi̱ ndaʼya, nigáwíinʼ a̱jkiu̱u̱n kaʼyoo a̱ʼdióo, ikha jngóo niʼtákáñuu rey: “¡Mbá péñu, tátioʼ, guxnia̱a̱ má ikhaa ada̱ bi̱ ndaʼya, náá gájmúún gúxiyáa!”. Mú imba̱a̱ a̱ʼgu̱ naʼthí: “¡Nimbáa má xáʼni a̱ʼdióo! ¡Guthu ngayii má!”.
27 Índo̱ rey niʼdxuun rígi̱, niʼthí: “¡Guxnia̱a̱la ada̱ bi̱ ndaʼya bi̱ timbáa a̱ʼgu̱! Xúxíyáala, ikhaa a̱ʼdióo”.
28 Xúgíinʼ xa̱bu̱ Israel nidxawíín xú káʼnii rey niʼnimbánuu ga̱jma̱a̱ niʼniún tsiánguá xóo niʼni rey.+ Numuu dí ndiyáá rí Dios nixnúu dí majmañuu maʼni rí májánʼ.+
