Timbá i̱yi̱i̱ʼ rí niʼnirámáʼ Pedro 3:1-22
3 Xúʼko̱ má mangáanʼ gu̱ʼu̱ bi̱ ninujúnʼ, gunimbala ku̱ñu̱u̱n ajmbiala,*+ mu xúʼko̱ á mu kúwá tikhuun bi̱ tsénimbu̱u̱n ajngá rawuunʼ Dios, maguánú munimbu̱ún ga̱jma̱a̱ rí xóo nuni̱ guʼñu̱ún rí asndu xáʼyóoʼ má majuiʼthúún,+
2 numuu rí ikhiin míniiʼ má nduyáá rí nuni̱ nindxu̱u̱ kaʼwu+ ga̱jma̱a̱ guáʼdáá wéñuuʼ gamajkhún.
3 Rí xóo nuni̱ tsiʼyámijná xánindxu̱u̱ i̱ndó mbájníí, rí xóo muxtigúu edxu̱ún, rí majmún oro+ ga̱jma̱a̱ rí mugíʼ xtíin rí minumuu wéñuuʼ.
4 Guni̱ tsiʼyáa a̱jkiu̱ún ga̱jma̱a̱ mbá rí tséʼchuu, rígi̱ nindxu̱u̱ rí xákiʼniin ga̱jma̱a̱ rí xúthi mbaʼ muthíí,+ numuu dí rígi̱ gíʼdoo wéñuuʼ numuu eʼyoo Dios.
5 Numuu rí xúʼko̱ kaʼnii nini̱ tsiʼyámijná gu̱ʼu̱ bi̱ nikúwá nákha wájyúuʼ, bi̱ nikúwá jmbu* náa Dios ga̱jma̱a̱ rígá rí niguáʼthi̱i̱n náa ikhaa índo̱ kúwá runimbu̱ún kuñún ajmbiu̱ún,
6 xó má Sara niʼnimbo̱o̱ kaʼyoo Abrahán ga̱jma̱a̱ niʼthúu̱n tátá.+ Ikháanʼ nindxa̱la e̱ji̱i̱n á mu nu̱ni̱ má xúʼko̱ dí májánʼ, ga̱jma̱a̱ xúniʼñánʼ rí nimbá maʼnimíñala.+
7 Xúʼko̱ má mangáanʼ xa̱bekha bi̱ niniʼgúnʼ, gakuwáanʼ má xúʼko̱ gajmiála gu̱ʼya̱la ga̱jma̱a̱ gakrua̱ʼa̱la kuñu̱u̱n, guyamajkhún gu̱ʼu̱+ numuu rí ikhiin nindxu̱ún mitsaʼkhiin xóo mbá rayaʼ dí xígú, numuu rí mangiin mudrigúu rí ikháanʼ kaʼyala mundrígúu+ rí makuwáanʼ, numuu rí á mu tséni̱ xúʼko̱ Dios xáʼdxawun rí gútajkáan.
8 Imbo̱o̱ rí nandoʼ ma̱tala, mbóó rí gúndxaʼwamíjnala xúgiáanʼ,+ gakrua̱ʼa̱la kuyamíjna̱,+ gaʼndala kuyamíjna̱, gagáwíinʼ a̱jkia̱la kuyamíjna̱ ga̱jma̱a̱ ganindxa̱la xa̱bu̱ guabáanʼ.+
9 Xátangáanʼ muniu̱u̱n dí ra̱májánʼ bi̱ niniala dí raʼkhí,+ xútawéñúnʼ bi̱ nutawéñala.+ Rí phú gíʼmaa mu̱ni̱, gu̱ni̱ tsajkurámíinʼ,+ ikhaa numuu rúʼko̱ rí nijuatsaʼwála mu xúʼko̱ mundrígúu rí maguma tsajkurámáanʼla.
10 Numuu rí “bi̱ nandoo maxtáa gagi ga̱jma̱a̱ maxtáa májánʼ, gíʼmaa rí mañewu̱u̱n raju̱u̱n mu xáʼthí dí ra̱májánʼ,+ ga̱jma̱a̱ mañewu̱u̱n rawuunʼ mu xáʼthí rí nduwaʼ.
11 Gatsíngúunʼ náa dí ra̱májánʼ+ ga̱jma̱a̱ gaʼni dí májánʼ,+ gayáʼ dí tsímáá ga̱jma̱a̱ gaʼga kidxuuʼ.+
12 Numuu rí Jeobá* nayejxu̱u̱n má xúʼko̱ bi̱ míjíinʼ ga̱jma̱a̱ naʼdxun rí nutakáñíín,+ mú Jeobá* tsénigu̱u̱ʼ eni̱ bi̱ nuni̱ dí ra̱májánʼ”.+
13 Numuu rí, tsáá lá gáʼniala dí ra̱májánʼ á mu dí nandala mu̱ni̱ dí májánʼ rá.+
14 Maski má numíniiʼ ga̱jma̱a̱ numuu rí nu̱ni̱ rí májánʼ, mú nakuwáanʼla gagi.+ Xámíñalaʼ ga̱jma̱a̱ rí ikhiin naʼnimíñún,* ni má xáxmiéjuanla.+
15 Rí gíʼmaa mu̱ni̱, guyamajkuíí Cristo xóo Tátá náa a̱jkia̱la. Gakuwáanʼla xawii mu muriʼñán asndu tsáá bi̱ gándaʼa̱la mu̱tha̱ ga̱jma̱a̱ numuu rí kua̱ʼthi̱i̱n. Mú gu̱nila rígi̱ ga̱jma̱a̱ gamajkhu,+ ma̱ngaa xákiʼnáanʼla.+
16 Gaguaʼdáá mbá ku̱ma̱ kaʼwu+ mu xúʼko̱ tséʼniuu má dí gúthi ga̱jma̱a̱ numala, bi̱ nuthi matiñu̱u̱nʼ+ ga̱jma̱a̱ numuu rí májánʼ e̱nila, xóo xa̱bi̱i̱ Cristo.+
17 Numuu rí itháan májánʼ mumíniiʼ ga̱jma̱a̱ numuu rí nu̱ʼni̱ rí májánʼ+ á mu Dios nandoo marigá xúʼko̱, ki xóo rí mumíniiʼ ga̱jma̱a̱ numuu dí ra̱májánʼ.+
18 Numuu rí Cristo nikháñuu mbóó miʼtsú asndu kámuu ga̱jma̱a̱ numuu aʼkhá.+ Mbáa xa̱bu̱ májáanʼ nikháñuu ga̱jma̱a̱ numún xa̱bu̱ ra̱míjíinʼ+ mu xúʼko̱ maʼga kaguáanʼla náa Dios.+ Nákhi ninindxu̱u̱ mbáa xa̱bu̱ nixiyáa,+ mú índo̱ Dios niʼniga̱bi̱i̱ ninindxu̱u̱ mbáa espíritu.+
19 Ga̱jma̱a̱ xígi̱ kaʼnii ni̱jkha̱ gáʼtáruʼúún ángeles bi̱ gajchún náa guʼwá e̱jua̱nʼ,+
20 bi̱ túnimbu̱u̱n nákha mbiʼi ndrígóo Noé,+ índo̱ Dios niʼngo̱o̱ a̱jkiu̱u̱n nigiʼthu̱u̱n mu mambá raguma arca*+ náa nikáwíin mbá nguéjmi̱i̱n xa̱bu̱ náa iyaʼ, xóo muʼthá, mbá migiñiinʼ xa̱bu̱.*+
21 Ma̱ndoo muʼnimbríguíi dí nirígá mbiʼi rúʼko̱ ga̱jma̱a̱ rí xóo ikháanʼ najnguála iyááʼ, rí naʼni káwáanʼla, mú rígi̱ tséʼni kaʼwi̱i̱ xuyala. Rí naʼni, nañambáá mu munda̱ʼa̱a̱ Dios mbá ku̱ma̱ kaʼwu+ ga̱jma̱a̱ numuu rí nigabi̱i̱* Jesucristo.
22 Ikhaa ni̱jkha̱a̱ mekhuíí ga̱jma̱a̱ xtáa náa níjniú mújúunʼ Dios.+ Ángeles, bi̱ nutañajunʼ ga̱jma̱a̱ bi̱ guáʼdáá tsiaki̱i̱ nunimbu̱ún kuyáá.+
