Tul᷊ung taumata měmarikěsa watangenge hala. Pěgělị kakiwal᷊o tawe harusẹ̌ simbaheng gunang mẹ̌tul᷊ung si sire měmarikěsa pěndang i sire hala.

Bahansangko i sire tadeạu piạ motif nihino. Pẹ̌dorongko si sire mẹ̌tiněna kawe nụe i sire někoạ sěmbaụ hal᷊ẹ̌. Tul᷊ung i sire piạ motif mapaelẹ̌, ene kai kakěndagẹ̌ si Yehuwa, taumata, dingangu těntirong Alkitapẹ̌. Pẹ̌bawěke dingangi sire, abe kere měnasẹ̌. Abe měkoạ si sire mamea, katewe bahansangko i sire gunang měkoạ kapaelange.

Tul᷊ung i sire limembong makěndagẹ̌ si Yehuwa. Todẹko kerea těntirong Alkitapẹ̌, prinsip, dingangu parenta nělahẹ sipatu Mawu dingangu kakěndag’E si kitẹ. Bahansangko i sire tadeạu mẹ̌tiněna pěndang i Yehuwa dingangu piạ kapulu makal᷊uasẹ̌ naung’E.