MODIMO o ntse a e so fetole maikutlo a hae ka dintho tseo a batlang ho di etsetsa batho le hoja batswadi ba rona ba pele e leng Adama le Eva, ba sa ka ba mamela mme ba tlisetsa batho sebe le lefu. Ka lentsweng la hae Bibele, Modimo o bontshitse ka makgetlo hore maikutlo a hae ha a e so fetohe.

• “Ba lokileng ba tla rua lefatshe ba tla dula ho lona ka ho sa feleng.”​—Pesaleme ya 37:29.

• “O tla metsa lefu ka ho sa feleng, mme ka sebele Mmusi Morena Jehova o tla hlakola meokgo difahlehong tsohle.”​—Esaia 25:8.

• “E le sera sa ho qetela, lefu le tla etswa lefeela.”​—1 Bakorinthe 15:26.

• “Lefu ha le sa tla hlola le eba teng, mme ho siama [maswabi] kapa ho bokolla kapa bohloko ha di sa tla hlola di eba teng.”​—Tšenolo 21:4.

Modimo o tla “metsa lefu” kapa o tla le fedisa jwang? Bibele e re ‘ba lokileng . . . ba tla dula [lefatsheng] ka ho sa feleng.’ Empa e boetse e re “ha ho motho ya lokileng lefatsheng ya tswelang pele ho etsa se molemo.” (Moeklesia 7:20) Na see se bolela hore Modimo ha a sa tla hlola a sebedisa melao ya hae haeba ho thwe baetsadibe kapa batho ba sa phethahalang ba tla phela ka ho sa feleng? Tjhe ha ho jwalo, Bibele e re: ‘Modimo . . . a ke ke a bua leshano,’ ka hoo seo se ke ke sa etsahala. (Tite 1:2) Jwale keng eo Modimo a tla etsang e le hore batho ba phele ka ho sa feleng?

Jehova o re bontshitse lerato ka ho fana ka thekollo e le hore a re lokolle lefung. Thekollo ke ho lefella ditshenyehelo tse itseng ka se lekanang le se senyehileng e le hore toka e phethahatswe. Ka ha re baetsadibe ebile re a shwa, Bibele e re: “Ha ho le ya mong wa bona eo ka mokgwa le ha e le ofe a ka lopollang esita le morabo, kapa a fa Modimo thekollo bakeng sa hae, (Tefo ya topollo ya moya wa bona ke ya bohlokwa haholo hoo e leng siyo ho isa nakong e sa lekanyetswang).”​—Pesaleme ya 49:7, 8.

Ha motho ya sa phethahalang a shwa, o patala dibe tsa hae, empa seo ha se bolele hore a ka kgona ho itopolla kapa hona ho lopolla motho e mong. (Baroma 6:7) Re ne re hloka motho ya phethahetseng le ya se nang sebe ho fana ka bophelo ba hae e le hore a kwahele dibe tsa rona.​—Baheberu 10:1-4.

Ena ke tokisetso eo Modimo a e entseng. O ile a romela mora wa hae Jesu hore a tlohe lehodimong mme a tswalwe lefatsheng a phethahetse ebile a sena sebe. (1 Petrose 2:22) Jesu o ile a re o tletse ho “fana ka moya wa hae ho ba thekollo e le phapanyetsano bakeng sa ba bangata.” (Mareka 10:45) O shwetse dibe tsa rona e le hore re fumane bophelo bo sa feleng.​—Johanne 3:16.

Kajeno ho phethahala boprofeta ba Bibele, ka ha re phela ‘dinakong tse mahlonoko tseo ho leng thata ho sebetsana le tsona,’ tse bontshang hore re phela “matsatsing a ho qetela” a lefatshe lena le tletseng bokgopo. (2 Timothea 3:1) Dintho tsena tse bohloko di tla fela ka ‘letsatsi la kahlolo le la timetso ya batho ba se nang bomodimo.’ (2 Petrose 3:3, 7) Empa batho ba ratang Modimo ba tla pholoha timetso eo mme ba fumane ‘bophelo bo sa feleng.’​—Matheu 25:46.

Batho ba dimillione ba tla tsoswa mme ba fumane bophelo bo sa feleng. Jesu o ile a bontsha hore tsoho ya bafu e ka kgoneha ha a ne a etetse motse wa Naine. Mora a le mong feela wa mohlolohadi o  ne a shwele mme Jesu o ile “a mo hauhela” yaba o a mo tsosa. (Luka 7:11-15) Hape, moapostola Pauluse o ile a re: “Ke na le tshepo ho Modimo . . . ya hore ho tla ba le tsoho ya ba lokileng le ba sa lokang.” Tshepo ena e tiileng e bontsha ka ho hlaka hore Modimo o rata batho.​—Liketso 24:15.

Batho ba dibilione ‘ba lokileng ba tla rua lefatshe, ba tla dula ho lona ka ho sa feleng.’ (Pesaleme ya 37:29) Ka nako eo, ba tla thaba le ho kgothatswa ke ho bona mantswe ao moapostola Pauluse a ileng a a ngola dilemo tse 2 000 tse fetileng a reng: “Lefu, tlholo ya hao e ho kae? Lefu, motsu wa hao o ho kae?” (1 Bakorinthe 15:55) Sera sa batho e leng lefu se tla be se fedisitswe!