Ka dinako tse ding re ka ikutlwa eka re ke ke ra kgona ho thusa motswalle wa rona ya nang le kgatello ya maikutlo. Empa ho na le dintho tseo re ka di etsang ho bontsha hore re a mo tsotella. Re ka etsang?

‘Potlakela ho utlwa.’​—JAKOBO 1:19.

Ntho e nngwe e ka thusang motswalle wa hao haholo ke hore o mo mamele ha a batla ho bua. Hape o se ke wa nahana hore o lokela ho araba ntho e nngwe le e nngwe eo a e buang. Mo tiisetse hore o mo mametse ha a ntse a bua le hore o a mo tsotella. Leka ho utlwisisa ka moo a ikutlwang ka teng mme o se ke wa mo ahlola. Hopola hore ka dinako tse ding a ka bua dintho tseo a ka ikwahlaelang tsona ha morao.​—Jobo 6:​2, 3.

“Le tshedise ba nyahameng.” ​—1 BATHESALONIKA 5:14.

Motswalle wa hao a ka ikutlwa a tshwenyehile kapa a ikutlwa a se na thuso. A ka kgothatswa le ho matlafatswa ke ho tseba hore o a mo tsotella le haeba o sa tsebe hore na o lokela ho reng ho yena.

“Motswalle wa nnete o lerato ka dinako tsohle.”​—DIPROVERBIA 17:17.

Thusa motswalle wa hao. Ho ena le ho nahana hore o se o tseba hore na o ka mo thusa jwang, mo botse hore na o ka mo thusa ka eng. Haeba motswalle wa hao a thatafallwa ke ho hlalosa hore na o ka mo thusa ka  eng, o ka nna wa mo botsa hore na a ka se thabele hore le ke le hahlwe ke moya. O ka thusa motswalle wa hao ka ditsela tse ding. O ka tsamaya le yena ho ya mabenkeleng, wa mo hlwekisetsa ntlo kapa wa mo etsetsa ho hong.​—Bagalata 6:2.

“Le mamelle.”​—1 BATHESALONIKA 5:14.

Ka dinako tse ding ho ka ba thata hore motswalle wa hao a bue. Nakong eo a batlang ho bua, mo kgodise hore o tla mo mamela. Motswalle wa hao a ka etsa kapa a bua dintho tse ka o utlwisang bohloko ka lebaka la bokudi ba hae. A ka etsa qeto ya ho tlohela ho etsa dintho tseo le neng le dumellane ka hore le tla di etsa kapa a ikutlwa a batla ho ba mong. Eba le mamello ha o ntse o mo thusa.​—Diproverbia 18:24.

Farrah a eo motswalle wa hae a sa kgoneng ho laola tsela eo a jang ka yona, a tshwenyehang haholo le ya nang le kgatello ya maikutlo o re: “Ke etsa bonnete ba hore motswalle wa ka o a phutholoha ha a bua le nna. Le hoja ke se na tharollo ya mathata a hae, ke leka ho mo mamela ha a bua. Ka dinako tse ding o hloka motho ya ka mo mamelang e le hore a be betere.”

Ha-eun ya nang le kgatello ya maikutlo o re: “E mong wa metswalle ya ka o mosa mme o dula a bua dintho tse nkgothatsang. O ile a mmemela dijong. O ne a bontsha hore o a nkgathalla mme ke ile ka nolofallwa ke ho mo bolella ka moo ke ikutlwang ka teng. Ke ile ka kgothala haholo.”

Jacob eo mosadi wa hae a nang le kgatello ya maikutlo o re: “Ke ha bohlokwa ho ba le mamello. Ha mohatsaka a entse ntho e nkgopisang, ke a hopola hore ke bokudi ba hae bo etsang hore a itshware ka tsela ena. Ka hoo ha ke mo kwatele, ho ena le hoo ke a mo nahanela.”

Enrico ya nang le bothata ba ho tshwenyeha haholo o re: “Mosadi wa ka ke motho ya ntshehetsang le ya nkgothatsang. Ha ke ikutlwa ke tshwenyehile haholo, ha a nqobelle ho etsa dintho tseo ke sa batleng ho di etsa. Seo se bolela hore ka dinako tse ding ha a etse dintho tseo a neng a ka thabela ho di etsa. Ke motho wa bohlokwa haholo ho nna hobane ke motho ya fanang ebile o nahanela batho ba bang.”