YE SO ASARA SI AMBENI ZO AYEKE NA KITE: Mbeni gingo nda ti ye so a sara ni ade ti ninga ape afa so gi na ndo so sese ti e ayeke dä na yâ ti dunia, ambeni sese milliard 100 tongaso ayeke nga dä. Na bango dunia so akono mingi so, azo mingi ayeke hunda tere ti ala, atene: ‘Nzapa so ngangu ti lo ahon angangu kue nga so asara aye kue, eskê lo bezoin ti bâ ye so azo so ayeke nga kota ape ayeke sara na ndo ti sese so?’

YE SO BIBLE ATENE: Nzapa amû gi na e Bible na lo zia e gi tongaso ape, ên-ën. Jéhovah * wani atene: “Fade Mbi wa mo, na lê ti Mbi angbâ na ndo mo.”—Psaume 32:8.

Bâ tapande ti Agar, mbeni wali ti Égypte na ngoi ti Abraham ândö. Agar akpe lo hon na yando ndali ti so lo ne wa ti lo Sara ape, ni la si Sara atomba lo. So Agar asara faute awe so, Nzapa ayeke zia gi lo tongaso? Bible atene: “Ange ti L’Éternel awara lo.” Ange ni adë bê ti Agar, lo tene: “L’Éternel amä ye ti vundu ti mo awe.” Na pekoni Agar atene na Jéhovah, lo tene: “Mo yeke Nzapa so abâ ndo.”—Genèse 16:4-13.

Nzapa ayeke bâ nga ndo na ndo ti mo kue. Na tapande, nzoni mama ayeke zia lê ti lo mingi na ndo ti akete molenge ti lo, ndali ti so tongana molenge ade kete, lo bezoin ti tene babâ na mama ti lo abâ ndo na ndo ti lo. Legeoko nga, Nzapa ayeke zia lê ti lo mingi na ndo ti e na ngoi so e yeke na yâ ti vundu nga ye ti sioni alingbi ti wara e hio. Jéhovah atene: “Mbi duti na ndo ti nzoni-kue so ayeke na nduzu ahon kue, na Mbi duti nga na tere ti zo so yingo ti lo ayeke na vundu, na lo yeke na tâ be-ti-molenge, ti kiri ngangu na yingo ti zo so ayeke na tâ be-ti-molenge, na ti kiri ngangu na bê ti zo so yingo ti lo ayeke na vundu.”—Ésaïe 57:15.

Me, peut-être mo hunda tere ti mo, mo tene: ‘Na lê ti Nzapa, mbi yeke tongana nyen? Na bango gi mbi, lo yeke tene so mbi yeke zo tongaso? wala lo hinga ye so ayeke na gbe ti bê ti mbi biani?’