Nzoni tënë ayeke nyen?

“Nzoni tënë . . . ”​—MATTHIEU 24:14.

A LINGBI aChrétien afa “nzoni tënë ti royaume” na sarango tënë ni na amba ti ala nga na fango na ala so Royaume ayeke mbeni ngorogbia so ayeke komande ande sese kue na lege ti mbilimbili. Ye oko, na yâ ti Bible a sara nga kusala na tënë “nzoni tënë” na ambeni lege nde. Na tapande, na yâ ti Bible a sara tënë ti ‘tënë nzoni ti salut’ (Psaume 96:2); “nzoni tënë ti Nzapa” (aRomain 15:16) nga “nzoni tënë na ndo ti Jésus Christ”.​—Marc 1:1.

Na nduru tënë, nzoni tënë andu atâ tënë kue so Jésus atene na so adisciple ti lo asû na mbeti. Kozoni si Jésus ague na yayu, lo mû yanga na adisciple ti lo lo tene: “Tongaso ala gue, ala sara si azo na popo ti amara kue aga adisciple. Ala batize ala na iri ti Babâ, na ti Molenge na ti yingo vulu. Ala fa na ala ti bata aye kue so mbi mû yanga na ala ti sara.” (Matthieu 28:19, 20). Ni la, kusala ti atâ Chrétien ayeke gi pëpe sarango tënë ti Royaume na azo, me a lingbi ala sara nga ngangu ti sara si azo aga adisciple.

A-eglize ayeke sara kusala so tongana nyen? Azo mingi ahinga pëpe ye so a iri ni Royaume, ye so asara si ala lingbi pëpe ti fa ye nzoni na ndo ni na amba ti ala. Nde na so, ala yeke fa atënë so asara si azo aduti nzoni, atënë tongana pardon ti siokpari nga na mango na bê na Jésus. Ala yeke gi nga ti wara gbâ ti azo na lege so ala yeke sara si fini ti azo ni aga nzoni nga ala yeke leke ahôpital, a-ekole nga na ada teti awayere. Atâa so na lege ti aye so ala sara si wungo ti azo so ague na eglize ague na li ni, ala sara pëpe si azo aga atâ Chrétien so ayeke sara ngangu ti sara ye alingbi na ye so Jésus afa.

Mbeni wandara ti Bible atene: “Mingi ti e akota zo ti eglize e hinga so a yeke ti e ti sara si azo aga adisciple wala ti fa na ala tongana nyen ti mû peko ti Jésus nga ti fa na ala aye kue so Jésus afa. . . . Biani, aye so Jésus afa na ndo ti tënë so ayeke polele. Me a yeke e la e sara pëpe ye so lo fa. E sara ngangu pëpe ti sara ye alingbi na ni. A yeke mo bâ mo tene e hinga pëpe tongana nyen ti sara ni.”

Legeoko nga, mbeni gingo nda ti ye na ndo ti aCatholique ti Amerika afa so tongana a mû aCatholique 100, ala 95 ayeda so fango nzoni tënë ayeke mbeni ye so a lingbi ala sara ni ti fa mabe ti ala. Ye oko, mingi ti ala abâ so nzoni lege ti sarango ni ayeke pëpe sarango lisoro na ndo ni, me a yeke sarango ye na fini ti ala na mbeni lege so aduti mbeni tapande teti azo. Mbeni oko ti azo so a hunda ala atene: “Fango nzoni tënë ayeke nde mingi na tenengo gi tënë na ndo ni. A lingbi sarango ye ti e afa na azo Nzoni Tënë ni.” Mbeti-sango (U.S. Catholic), so abâ lege ti gingo nda ti ye so, atene so azo mingi ayeke nduru pëpe ti fa tënë ti mabe ti ala na azo ngbanga ti “atënë so asigigi ade ti ninga pëpe na ndo ti aye ti sioni so akota zo ti a-eglize asara, aye so andu langongo na akete molenge. Nga ala yeke nduru pëpe ti fa atënë ti mabe ti ala ngbanga ti afango ye ti eglize so ala mä tere dä pëpe.”

Na mbeni ndo nde, mbeni kota-bua ti Eglize Méthodiste adema tere ti lo ndali ti so yâ ti a-eglize ti lo akangbi nga li ti azo ni aga kirikiri, ala yeke na ngangu mbeni pëpe ti sara kusala ti ala nga ala yeke sara ye tongana tanga ti azo kue. Na ngonzo lo hunda lo tene: “Azo wa la a mû na ala kusala ti fango nzoni tënë ti Royaume? Nga azo wa la ayeke sara ni na ndembe so?”

Kota-bua ni akiri tënë na hundango ndo ti lo ni pëpe. Me kiringo tënë ni ayeke dä. Mo yeke wara ni na yâ ti article ti peko.

[Kete tënë na lembeti 6]

Nzoni tënë andu Royaume ti Nzapa nga salut so zo ayeke wara na mango na bê na Jésus Christ