BIBLE atene so ambeni gbako ayeke lani na Sese ti Zendo nga akeke “awu” mingi (1 aGbia 10:27; Jos. 17:15, 18). Ye oko, tongana azo ti dengo kite abâ so a buba agbako ni mingi, ala yeke hunda tere ti ala wala gbako ayeke lani biani na Israël.

Mbeni mbeti (Life in Biblical Israel) atene so “agbako ayeke lani mingi na Israël ahon ti laso.” Akeke ti pin (Pinus halepensis), akota keke so akugbe ni ayeke hule ka ape (Quercus calliprinos) nga na ambeni kota keke (Pistacia palaestina), ayeke lani mingi na ndo ti ahoto ti yâ ti kodoro ni. Na yâ ti Shéphélah, na ndo so akete hoto ayeke dä, a yeke wara nga gbâ ti akeke ti sycomore so afigue asigigi dä (Ficus sycomorus). Na ndo ni so, a yeke wara ahoto mbage na mbage nga na Ngu ti Méditerranée.

Mbeni mbeti (Plants of the Bible) atene so laso na Israël, ambeni ndo ayeke dä so keke ayeke na yâ ni encore ape. Raison ni ayeke nyen? Mbeti ni afa so ye ni akomanse kete kete, a tene: “Azo ayeke buba agbako ndali ti tënë ti yaka, ti batango anyama, ti lekengo ada nga ala yeke dë akeke ti tingo na wâ.”