Bible afa so a yeke na lege ni nga a yeke kota ye ti tene mbeni zo andoye terê ti lo, me a yeke nzoni lo sara ni ahon ndö ni ape. Mara ti ndoye tongaso, zo ayeke fa ni na lege so lo yeke bâ lege ti lo wani nzoni, lo yeke ne terê ti lo nga lo yeke bâ lo wani na nene ni (Matthieu 10:31). Bible agonda pëpe azo so apensé gï na ala wani nga lo hunda pëpe ti tene zo andoye terê ti lo ahon ndö ni.

Zo wa la e doit ti ndoye lo kozo?

1.   A yeke Nzapa la e doit ti ndoye lo kozo. Bible atënë so commandement so ahon atanga ni kue ayeke so atene: “Mo ndoye Jéhovah Nzapa ti mo na bê ti mo kue.”​—Marc 12:28-30; Deutéronome 6:5.

2.   Use commandement so ahon atanga ni kue ayeke so: “Mo ndoye mba ti mo tongana mo wani.”​—Marc 12:31; Lévitique 19:18.

3.   Bible amû mbeni commandement polele tongaso ape so atene na zo ti ndoye terê ti lo wani; me so a hunda ti “ndoye mba ti mo tongana mo wani” afa so a yeke na lege ni nga a yeke ye ti nzoni tongana zo aye terê ti lo ahon ndö ni ape nga lo bâ terê ti lo na nene ni ahon ndö ni ape.

Zo wa la Jésus andoye lo kozo?

 Jésus afa tongana nyen ti sara kangbi na popo ti ndoye so zo ayeke na ni ndali ti Nzapa, ndali ti amba ti lo nga ndoye so lo yeke na ni ndali ti lo wani; lo hunda nga na adisciple ti lo ti mû tapande ti lo.​—Jean 13:34, 35.

1.   Jésus andoye Jéhovah Nzapa kozo, na lo mû terê ti lo kue ti sara kua ti Nzapa. Lo tene: “Dunia ahinga so mbi ndoye Babâ, mbi yeke sara gï tongana ti so Babâ amû yanga na mbi ti sara.”​—Jean 14:31.

2.   Jésus andoye azo na lo fa ni na lege so lo mû na azo ni ye so ala yeke na bezoin ni juska ti mû même fini ti lo ndali ti ala.​—Matthieu 20:28.

3.   Jésus afa nga so lo ndoye terê ti lo wani, me lo sara ni ahon ndö ni ape. Lo fa ni na lege so lo mû kamême ngoi ti wu terê ti lo, ti te ye nga ti duti ndo oko na adisciple ti lo nga na azo so amû peko ti lo.​—Marc 6:31, 32; Luc 5:29; Jean 2:1, 2; 12:2.

Eskê tongana mo ndoye amba ti mo ahon mo wani ayeke sara si mo duti na ngia mingi ape wala mo bâ mo wani na nene ni mingi ape?

 Ên-ën, ndali ti so a créé e na image ti Nzapa, so kozo sarango ye ti terê ti lo ayeke ndoye (Genesis 1:​27; 1 Jean 4:8). Ye so aye ti fa so ti ndoye zo ayeke mbeni ye so ayeke na yâ ti terê ti e. Tâ tënë, a yeke nzoni e ndoye nga terê ti e, me e yeke duti na ngia mingi tongana Nzapa la e ndoye lo ahon tanga ti aye kue nga e gi ti sara nzoni mingi na amba ti e. Ndali ni la Bible atene: “Mungo ye na zo aga na ngia mingi ahon warango ye na tïtî zo.”​—Kusala 20:35.

Laso, azo mingi atene so ti tene zo aduti na ngia a yeke nzoni lo pensé na lo wani kozo si. Ti ala, ahon ti “ndoye amba ti ala”, ala “ndoye gï terê ti ala wani”. Me tongana ti so e yeke bâ laso, azo so ayeke na nzoni seni nga ala yeke na ngia ayeke azo so asara ye alingbi na wango ti ndara ti Bible so atene: “Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.”​—1 aCorinthien 10:24.