Xana ku ni leswi bihiki ka mintlangu ya ku Bedja hi mali?

LESWI VHANU VA SWI HLAYAKA.

Vhanu vanyingi va vona mintlangu ya ku Bedja hi mali, swanga ku hungata loku ku nga liki na nghozi, lexi xi djulekaka i kuva swi yentxiwa nawini ntsena. A mintlangu min’wana ya ku Bedja ya le nawini ya ku fana ni malotaria lama hambiwaka hi mfumu ma pswala mali leyi pfunaka xitsrhungu.

LESWI BIBELE DZRI SWI HLAYAKA.

Nambileswi Bibele dzri nga khaneliki yi ku kongoma hi mintlangu ya ku Bedja hi mali, hi kuma minsinya ya milawu leyi yi kongomisaka yi tlhela yi kombisa miyanakanyu ya Xikwembu Nkulukumba a mhakeni leyi.

A mintlangu ya ku Bedja hi mali i ku ganya mali leyi van’wana va yi luzaka leswo swi hambana ni nawu wa Bibele lowu wu liki ‘ti vonani nwi txhava ku felela (makwanga) hinkwawu. (Luka 12:15) Ku hlaya ntiyiso lexi xi susumetelaka mhunu ku tha mintlangu ya ku Bedja hi mali i ku navela kumbe makwanga. A tinhlengeletanu leti sunguliki mintlangu ya ku Bedja hi mali ti hlaya leswaku a vhanu va ta ganya mali yinyingi yi hala tlhelo va fihla leswaku ku ganya mali ka mintlangu leyi a swi nabyali. Hikusa va swi tiva leswaku ku navela ku va xipfundzri swi yentxa leswaku vhanu va bedja mali yinyingi ka mimbangu ya ku tlhela ka yone. A matsrhan’wini ya ku pfuna vhanu a ku va tingawula makwanga a mintlangu ya ku bedja hi mali yi tsrhivelela moya wa kuva vhanu va kuma mali hi ku nabyala.

A mintlangu ya ku Bedja hi mali yi yentxa leswaku vhanu va va ni makungu ya ku kokela kwavu: va ganya mali leyi vathi vambeni va yi luziki. Kambe a Bibele dzri kutxa leswaku ‘a mhunu a nga ti djulele swake ntsena, kambe mhunu man’wana ni mun’wana a a djulele van’wana leswi va fanekelaka.’(1 Ba-le-Korinte 10:24) Ka Dez wa milawu mun’we wu hlaya leswi:’U nga vi navela...nambi swa ku va swin’wanyana xa ntxhumu xa walekwenu.’(Eksoda 20:17) Na a lavisela ku ganya lweyi a thaka a yimela leswaku van’wana va luza mali akuva a ta kota ku ganya.

Bibele dzri hi ba ndleve leswaku hi nga vone djombo swa nga hlolana ledzri nga hi pfunaka ku ganya ka mintlangu leyo. A Israyele wa khale vhanu lava a va nga li na lipfumelo ka Xikwembu Nkulukumba va sungule ku bekisela ‘Gad atafula (xikwembu xa djombo).’ Xana Xikwembu Nkulukumba a a byi yamukela wugandzreli byolebyo? Xikwembu Nkulukumba a hlayi leswi ka vone:’Kambe nwi tizri leswi nga swa ku biha mahlweni yanga, kutani nwi ti langelile leswi dzri nga swi zrandzrikiki.’—Ezaya 65:11,12

I ntiyiso leswaku a matikweni mambeni, va tizrisa mali leyi yi ganyiwiki ka mintlangu ya djombo leyi yi nga nawini a kuva va seketela swikole ku hluvuka ka ecomomia ni mintizro yimbeni ya mfumu. Ku tizrisa mali yi ndlela leyo a yi txintxi ndlela leyi yi kumiwaka ya yone ku nga ndlela leyi yi ku kongoma yi kutxaka makwanga ku titiva ni ku hlohlotela miyanakanyu ya leswaku mhunu a nga kuma mintxhumu na a nga tizri.

’U nga vi navela . . . nambi swa ku va swin’wanyana xa ntxhumu xa walekwenu.—Eksoda 20:17

I yini leswi va ntsrovelaka swone lava va thaka mintlangu yaku Bedja hi mali

LESWI BIBELE DZRI SWI HLAYAKA.

A Bibele dzri hi ba ndleve swa ku ’lava va zrandzraka wupfundzri, va wela ndzringweni ni le ntlhan’wini, ni le ku naveleni loku nyingi loka vu singe, loku honaka, (1 Timoteo 6:9) A mintlangu ya ku bedja hi mali yi fambisana ngopfu ni makwanga, a makwanga ma hona la ka kuva Bibele dzri ma xaxameta ku n’we ni mahanyela man’wana lawa yi faneleke yi ma tingawula yi ku helela.—Ba-le-Efesa 5:3

Hi ku hlohlotela ku ganya mali yi ku nabyala, a mintlangu ya ku bedja yi byala ku zrandzra mali ntxhumu lowu Bibele dzri liki ‘I mutsru wa leswa ku biha hinkwaswu.’ Ku zrandzra mali swi nga kutxetela wutomi bya mhunu yi ku nabyala swi mu yentxa leswaku a hlatiyela ni ku hona lipfumelo dzrake ka Xikwembu Nkulukumba. Hi ku fanekisela loko Bibele dzri khanela yi lava va wongiwiki yi ku zrandzra mali dzrili swi fana ni loko‘ va titlhavi hi mahlomulo la manyingi.’—1 Timoteo 6:10

A makwanga ma tsrhika mhunu na a nga nyonxanga ma tlhela ma mu yentxa a nga heneliseki yi mali leyi a nga na yone. ‘Lweyi a zrandzraka mali, a nga ka a nga kolwesiwi hi mali; lweyi a zrandzraka wukosi, na yene a nga ka a nga kolwisiwi yi bindzru.’—Eklesiasta 5:10

Vhanu vanyingi lava va wongiwa ku tha mintlangu yaku Bedja hi mali va tshrubuli leswaku swi kazrata ngopfu ku tsrhika xihena lexo. Xikazratu lexo xa kumeka misaveni hinkwayu. Hi xikombiso ntsena a Estados Unidos, ku hlayiwa leswaku kolomu ka mamilhões ya vhanu swa va kazratela ku tsrhika ntlangu wa ku tha majogu ya djombo.

Bibele dzri li : ‘A pfindla ledzri kumiwaka hi ku hantla (makwanga) ku sunguleni, dzri nga ka dzri nga katekisiwi a ku heteleleni.’ (Amaproverbia 20:21) Lava va lawuliwaka hi mintlangu ya ku Bedja hi mali va hetelela va kumeka a swikwenetini leswikulu nambi kuva va heleliwa hi mali nakone vanyingi va hohlokeliwa hi mitxhatu va luza mintizro nambi hi vanghanu. Kambe ku tizrisa minsinya ya milawu ya Bibele swi nga mu pfuna mhunu kuva a tingawula swikazratu leswi tisiwaka yi mintlangu yaku bedja hi mali.

’Kambe lava va zrandzraka wupfundzri, va wela ndzringweni ni le ntlhan’wini, ni le ku naveleni loku nyingi loka vusinge, loku honaka, loku nyuvetelaka vhanu ku feni ni le ku suveni.’—1 Timoteo 6:9