XIDONDZRO 21
Xana Madzrungula Lamanene Ma Zrezriwa Hi Ndlela Yini?
Ku nga li khale, Yehovha a ta tizrisa Mfumu wake akuva a helisa swikazratu swezru hinkwaswu. Ndzrava leyo i ya lisima swinene lakakuva hinkwavu va fanela ku yi tiva. Yesu a lelete vadondzrisiwa vake akuva va byela vhanu ndzrava leyo! (Matewu 28:19, 20) Xana Timboni ta Yehovha ti swi yentxisa kuyini leswi Yesu a ti zrumiki swone?
1. Xana a tsralwa dzra Matewu 24:14, dzri hetiseka hi ndlela yini a nkameni wezru?
Yesu a te: “Madzrungula lamanene ya Mfumu ma ta zrezriwa a misaveni hinkwayu.” (Matewu 24:14) Timboni ta Yehovha ti nyonxa swinene hi ku hlengela a ntizrweni lowu wa lisima. Hi zrezra madzrungula lamanene a misaveni hinkwayu hi tindzrimi leti tlulaka 1.000! Ntizro lowu lowukulu, wu djula ku tikazrata swinene ni nhleleko. A swi nge na ku koteka ku wu yentxa na hi nga pfuniwi hi Yehovha.
2. Hi tikazrata hi ndlela yini akuva hi zrezrela vhanu?
Hi zrezra kwini na kwini lomu vhanu va kumekaka kone. Ku fana ni vakriste va khale, hi zrezra a “tindlwini” kumbe hi muti ni muti. (Amintiṛo 5:42) Hi ku tizrisa yentxela ledzri, hi kota ku kuma vhanu vanyingi lembe ni lembe. Leswi vhanu va nga kumekiki makaya minkama hinkwayu, hi zrezra a mimbangwini yinyingi ya le livaleni. Minkama hinkwayu hi djuletela mikhandlu ya ku byela van’wana hi Yehovha ni leswi a taka swi yentxela vhanu.
3. I mani lweyi a fanelaka ku zrezra madzrungula lamanene?
Vakriste hinkwavu va ntiyiso va fanela ku zrezra madzrungula lamanene ka vhanu. Ntizro lowu hi wu nyika lisima. Hi zrezra hi lani hi nga kotaka ha kone hikusa ha swi tiva leswaku leswo swi nga huluxa wutomi bya vhanu. (Dondzra 1 Timoteo 4:16.) A hi holi mali hi ntizro lowu, hikusa Bibele dzri li: “Mi yamukeli mahala, nyikani mahala.” (Matewu 10:7, 8) A hi hikwavu lava yamukelaka dzrungula dzrezru, kambe nambitanu hi tama hi zrezra hikusa loko hi yentxa leswo hi va na hi yingiseta Yehovha hi tlhela hi mu nyonxisa.
KELISISA
Vona leswi yengetelekiki mayelanu ni ndlela leyi Timboni ta Yehovha ti zrezraka ha yone a misaveni hinkwayu. Nakone vona ndlela leyi Yehovha a hi pfunaka ha yone.
Ku zrezra a misaveni hinkwayu: A) Costa Rica, B) Estados Unidos, C) Benin, D) Tailândia, E) Yap, F) Suécia
4. Hi tikazrata ngopfu akuva hi zrezrela vhanu hinkwavu
Timboni ta Yehovha ti tikazrata ngopfu akuva ti zrezra madzrungula lamanene hinkwaku lomu vhanu va kumekaka kone. Vonani VHIDIYU, mi gama mi bulisana hi swivutiso leswi landzrelaka.
-
I yini leswi swi ku nyonxisaka ka hinkwaswu leswi Timboni ta Yehovha ti swi yentxaka akuva ti zrezra?
Dondzrani Matewu 22:39 ni Ba-le-Roma 10:13-15, mi gama mi bulisana hi swivutiso leswi landzrelaka:
-
Xana ntizro wezru wa ku zrezra wu swi kombisisa kuyini leswaku ha va zrandzra vhanu?
-
Xana Yehovha a titwisa kuyini hi lava va zrezraka madzrungula lamanene?—Vonani ndzrimana 15.
5. Hi tizrisana na Xikwembu Nkulukumba
Ku ni swinyingi leswi hi kholwisaka leswaku Yehovha a kongomisa ntizro wezru. Hi xikombiso, makwezru lweyi a vitaniwaka Paul, a a li ntizrweni wa ku zrezra hi muti ni muti a Nova Zelândia ni nhlikanhi. Hi loko a kuma wansati wa kukazri lweyi a mixweni ka kone hi siku dzrodzro, a a khongote ka Xikwembu Nkulukumba. A tizrise vito dzra Xikwembu Nkulukumba a kombela leswaku a yendzreliwa hi mhunu. Paul a li: “A ntsrhaku ka mawora mazrazru, ni gongondzre xipfalu xake.”
Dondzrani 1 Ba-le-Korinte 3:9, mi gama mi bulisana hi xivutiso lexi landzrelaka:
-
Xana mimfambu ya ku fana ni lowu yentxekiki a Nova Zelândia, yi swi kombisa hi ndlela yini leswaku Yehovha a kongomisa ntizro wa ku zrezra?
Dondzrani Amintiṛo 1:8, mi gama mi bulisana hi xivutiso lexi landzrelaka:
-
Ha yini hi djula mpfunu wa Yehovha akuva hi zrezra?
A wu swi tiva?
Vhiki ni vhiki ka ntlhanganu wa xikazri ka vhiki, hi dondzra tindlela leti hi zrezraka ha tone. Loko u same u kumeka ka wun’we wa mintlhanganu yoleyo, u yi vonise kuyini dondzro leyi nyikeliwiki?
6. Hi yingiseta xileleto xa Xikwembu Nkulukumba xa kuva hi zrezra
A nkameni wa vapostola, vakaneti va dzringise ku yimisa valandzreli va Yesu akuva va nga zrezri. Vakriste va ku sungula va lwele mfanelo yavu ya ku zrezra hi ku ‘tiyisa evhangeli’ hi ku ya hi nawu. (Ba-le-Filipi 1:7) Timboni ta Yehovha ti yentxa hi lani ku fanaka a masikwini yezru. a
Dondzrani Amintiṛo 5:27-42, mi gama mi bulisana hi xivutiso lexi landzrelaka:
-
Ha yini hi nga fanelanga ku yima ku zrezra?—Vona tindzrimana 29, 38 ni 39.
VAN’WE VA VUTISA LESWI: “Ha yini Timboni ta Yehovha ti famba hi muti ni muti?”
-
A wu ta hlamulisa kuyini?
NKATSRAKANYU
Yesu a zrume valandzreli vake ku zrezra madzrungula lamanene ka vhanu hinkwawu. Yehovha a pfuna vhanu vake ku yentxa ntizro lowu.
Mpfuxeto
-
Xana madzrungula lamanene ma zrezriwa hi ndlela yini a misaveni hinkwayu?
-
Xana ntizro wezru wa ku zrezra wu swi kombisisa kuyini leswaku ha va zrandzra vhanu?
-
Xana u yanakanya leswaku a ntizro wa ku zrezra wu nga hi tisela ku nyonxa? Ha yini?
HANDZRISISA
Vona ndlela leyi Timboni ta Yehovha ti zrezraka ha yone a madoropeni lamakulu.
Tsima Dzra Ku Hlawuleka Dzra Ku Zrezra Ka Madoropa Lamakulu A Paris (5:11)
Xana Timboni ta Yehovha ti yentxa yini akuva ti zrezrela vahlapfa?
Margarita a hete nkama wunyingi na a zrezra madzrungula lamanene. Ha yini ku yentxa leswo swi mu yentxe a nyonxa?
Vona ndlela leyi swiboho swa lisima swa matribunali swi pfunisiki ha yone ka ntizro wa ku zrezra.
a Xikwembu Nkulukumba hi yene a hi zrumiki ku zrezra, xileswo a hi vileli mpfumelelo wa wuhosi bya vhanu akuva hi zrezra madzrungula lamanene.
