Arakhadilem ande Sajonia, ke mai anglal sas e Republica Democratica Alemana (RDA). Amende khere savorhe kamasas amen ai murhe dada sikade man lashe dieli ai sar te traiu vorta. Sar e RDA sas iek them comunista, le manush anda Sajonia nas lenge te aven lenge iek religion. Me chi pakiavas ando Del, 18 borsh lem man pala dui ginduria: simas ateo ai comunista.

O Comunismo phenel ke savorhe trobus te avas iek fialo ai godo sas mange drago. Gindivas ke trobunas te den ai te ulaven le love ai le prame ka sa le manush, ai gadia nas te aven chorhe ai barvale. Pala godo, astardem te kerau buki ande iek organizacion ternengi comunista. Kana simas 14 borshengo kerdem lentsa buki te avel mai shukar e Phuv, lasas le rhartii kai shudenas le manush ai lasharasas le te usinpe pale. Le manush anda Aue naisisarde mange pala e lashi buki kai keravas, ai phende ke simas iek ejemplo le kolavrenge. Makar simas terno, prinzhardem ka uni manush kai ningerenas murho them. Gindivas ke zhavas pe iek lasho drom ai ke mai angle sas te zhal mange mai mishto.

Ando 1989 pelias o zido anda o Berlin ai vi o Comunismo kai sas ande Europa del Este. Aliardem man demas dukhado, ai dem po gor ke von kerde but dieli kai nas vorta. Iek ejemplo si ke nas lashe le manushentsa kai chi lenaspe pala o Comunismo. Numa, sostar kerenas gadia? Chi sikavel o Comunismo ke sam savorhe sa iek fialo? Si o Comunismo iek gindo kai nashtil te zhal angle? Sa godo diliarelas murho shero.

Akana kamavas te kerau aver dieli, sas mange drago e muzika ai te forbou. Pala godo, gelem te estudiu ande iek escuela ai kamavas te zhau ande universidad te mai sikiuau muzika ai te forbou sa murho traio. Meklem sa le lashe dieli kai sikade man murhe dada. Ankliavas bute zhuvliantsa. Kamavas te kerau so me kamavas. Numa chi e muzika, chi kana forbovas ai chi o traio kai sas man delas man e pacha, ai godo dikhiolas ande so forbovas. Pala godo pushavas man, sar sas te aven le giesa mai angle? Ai pala soste trais?

Sas bari prama mange kana arakhlem so pushavas man. Iek gies kana simas ande escuela ashundem uni manushen kai denas duma pal dieli kai si te aven ai beshlem te ashunau. E Mandy *, kai sas marturo le Jehovaski ai sas mashkar lende, phendias mange: “Andreas, te kamesa te arakhes sa le suaturia kai pushes tu pa o traio ai pal giesa kai si te aven, trobus te dikhes so mothol e Biblia”.

Chi pakiaiem but so phenelas, numa kamavas te zhanau so mothol e Biblia. E Mandy sikadias mange o kapitulo dui anda o Daniel ai plachaias man but so sikadias mange. Kotse si iek profesia kai del duma pa uni bare amperetsii la lumiake kai uni anda lende sas te aven zhi agies. Polme e Mandy sikadias mange aver profesii kai denas duma pa so si te avel mai angle le manushentsa. Gadia arakhlem so pushavas man. Numa, katar aven gadala profesii? Kon phendias chachimasa so sas te avel mai angle? Sikavel godo ke si iek Del?

E Mandy andias ka o Horst ai e Angelika, von sas ansurime ai sas marturia le Jehovaske. Von azhutisarde man te aliarau so phenel e Biblia. Kotse dem po gor ke numa le Marturia den duma pa o anau le Devlesko ai azhutin le kolavren te prinzharen les (Salmo 83:18; Mate 6:9). Sikilem ke o Jehova shinavel amenge ke shai trais siempre ande iek shukar Paraiso pe Phuv. O Psalmo 37:9 (E Nevi Viasta ai o Psalmo) phenel: “Godola kai azhukeren ande o Baro Del avela lengo o them”. Plachaias man but te zhanau ke sa le manush kai lenpe pala so phenel o Jehova shai len so vo shinavel lenge.

Nas ushoro mange te parhuvau murho traio ai te lau man pa so phenel e Biblia. Pala sa so lem kana forbovas ai keravas muzika, gindivas man mai baro katar le kolaver manush. Pala godo, trobusardem te sikiuau sar te na gindiu man bari diela, trobuvas te avau lasho anda o ilo. Sas pharo mange te mekau le prame zhungale kai keravas. Naisiu ka o Jehova ke azhukerel, aliarel ai kamel but le manushen kai thon anda pengi zor te keren so sikavel e Biblia.

Le pervo 18 borsh anda murho traio, chi pakiavas man ando Del ai lavas man pala so phenel o Comunismo. De kotsar zhi akana e Biblia azhutisardias man te parhuvau murho traio. Sikadias man soske te traiu ai chi gindiu man but andel dieli kai si te aven. Ando 1993 boldilem sar marturo le Jehovasko ai ando 2000 ansurisailem iekha zhuvliasa kai bushelpe Tabitha, voi pakialpe ando Del sar mande. Le dui thas sa anda amari vriama te sikavas kal manush te prinzharen so phenel e Biblia. But anda godola manush chi pakianpe ando Del ai lenpe pala o gindo comunista sar me gindivas. Akana sim defial barikano ke shai azhutiu ka but manush te prinzharen ka o Jehova.

Ka murhe dada nas lenge drago te dau man le marturentsa le Jehovaske. Polme dikhle ke sa gadala prame kerde mange mishto. Akana sim defial barikano sostar murhe dada estudin e Biblia ai kidenpe le marturentsa le Jehovaske.

E Tabitha ai me thas amendar te las opre so phenel e Biblia pal ansurime ai godo kerel amen defial barikane. Iek prama kai phenel si ke trobus te respetis amen ai te avas chache. Amen keras gadia ai zuriavol amaro kamlimos (Zhiduvuria 13:4).

Agies chi jal man gadia but e briga pal dieli kai avena mai angle. Akana sim ande iek bari familia katar le marturia le Jehovaske anda sa e lumia. Katse sam savorhe iek fialo, vareso kai kamlem sa murho traio.