SAR SAS MURHO TRAIO:

Barilem ando Warialda (Nueva Gales del Sur). Ande kako foro tsinorho si but bakrorhe ai gurumnia, ai barion sumuntsi, si defial vuzho ai nai chorimos.

Sim o mai baro anda 10 shave, pala godia astardem te kerau buki kana sas man 13 borsh te azhutiu murha familia. Sar chi getosardemas e escuela astardem te kerau buki andel khera bare kai si ando kimpo. Kana sas man 15 borsh keravas so phenenas mange ai vi sikavavas le grasten te shai anklias pe lende te keras buki.

Kacha buki sas la dieli lashe ai dieli chorhe. Sas mange drago e rig kai simas ai so keravas. De riate beshavas pasha e iag, dikhavas o shenuto ai le cheraia ai aliaravas e shukar barval ai e sung anda o kimpo. Gindivas ke varekon trobusardias te kerel kakala shukar prame. Numa simas pasha manush kai nas lashe, anda e buki. Phenenas lazhave ai penas but tsigeri, pala godia vi me astardem te kerau godola dieli.

Kana sas man 18 mukisailem ando Sydney. Kamlem te zhau ando ejercito numa chi mekle man ke chi getosardem e escuela. Beshlem iek borsh ande godo foro, pala godia astardem te kerau buki. Kotse sas e pervo data kai dem duma le marturentsa le Jehovaske. Akharde man te zhau lentsa kai kidenpe ai dem po gor ke phenenas o chachimos.

Numa ande tsirha vriama amboldem palpale ando kimpo. Beshlem ando Goondiwindi (Queensland). Kotse astardem te kerau buki, ansurisailem ai, astardem te piau pimos.

Murha rhomniasa sas amen dui shave. Kana arakhadile astardem te gindiu sar traivas, serdem mange so ashundem ande godo chidimos ando Sydney ai alosardem te kerau vareso.

Arakhlem iek purai revista La Atalaya. Kotse sas ramome e vulitsa anda o kher Betel katar le marturia le Jehovaske anda e Australia, ai ramosardem lenge. La vriamasa areslo ka murho kher iek lasho ai dragostoso Marturo, ai astardem te sikiuau pa e Biblia lesa.

SAR E BIBLIA PARHUDIAS MURHO TRAIO:

Kana mai sikiuavas pa e Biblia mai davas po gor ke trobuvas te parhuvau murho traio. Iek texto kai chitosardem areslo chachimasa ande murho ilo: 2 Korintiana 7:1 kai phenel amenge ke trobus te vuzharas amen katar sa so meliarel o stato.

Alosardem te na mai piau but pimos ai le tsigeri. Nas vushoro ke sas vareso kai keravas de dumut. Numa kamavas te traiu sar kamelas o Del. Azhutisardias man so phenel  Romanuria 12:2: “Na len tume pala traio kadala lumiako, numa meken le Devles te parhuvel tumen sa vi tumari goji”. Dem po gor ke te parhuvau so keravas trobuvas te parhuvau murho gindo ai te dikhau kakala dieli sar dikhel len o Del: sar vareso nasul. Shai parhudem pala leski zor.

Numa e prama mai phari sas, te mekau te phenau lazhave. Zhanavas so phenel e Biblia ando Efisiana 4:29: “Na mothon chi iek zhungali vorba”, numa te parhudiuvau trobusardias te nakhel but vriama. Azhutisardias man but te dau man gogi so phenel Isaías 40:26. Kako verseto phenel pal cheraia: “Vazden tumare iakha opre karing o cheri ai dikhen. Kon kerdias sa kakala prame? Si godo kai kerel te anklen sar iek ejercito, zhinel len iek po iek ai akharel len ka suako pe pesko anau. Leski bari putiaria chi getol, ai leski zor si defial bari ke chi iek anda lende jasarelpe”. Te avela ke o Del sas les e zor te kerel o universo —kai sas mange drago te dikhau—, shai de las man e zor te parhudiuvau ai te kerau so si leske drago. Pala e zor kai dias man o rhugimos meklem te phenau lazhave.

SAVO LASHIMOS LEM:

Kana keravas buki ando kimpo andel khera bare, nas but manush te dau duma. Numa so sikilem ande suako chidimos katar le marturia le Jehovaske azhutisardias man te dau duma mishto le kolavrentsa ai te phenau le lashe viesti pa e amperetsia le Devleski (Mate 6:9, 10; 24:14).

De uni borsh sim phuro anda iek congregacion. Si vareso defial shukar te azhutiu ka murhe phral anda o pakiamos.

Naisiu ka o Jehova kai meklias ke iek manush sar mande —kai chi gelo but ande escuela— te sikiol pa leste (Isaías 54:13). Zhanau ke si chachimos so phenel Proverbios 10:22: “O suntsimos katar o Jehova si so anel barvalimos”.