1, 2. a) Quishpichi tucungapaca ¿imatata rurana capanchi? b) Para siempre causangapaj munashpaca ¿pipa ejemplotata catina capanchi?

JESUSTA cati callarishpaca maimanbash viaje rijuj cuendami canchi. Chai viaje tucurijpica para siempre causaitami chasquishun. Chaimandami Jesusca nirca: “Tucurimuicaman, llaquicunata apajcunallami quishpichi tucunga” nishpa (Mat. 24:13). Shinapash quishpichi tucungapaca, cai mundopa nali causai tucuringacaman o ñucanchi huañungacamanmi Jehová Diosta cazuna canchi, cai mundopipash na chapurinachu canchi (1 Juan 2:15-17). Shinaca para siempre causaita japichunga ¿imata ayudanga?

² Para siempre causaita japi ushangapaca Jesuspa ejemplotami catina canchi. Bibliata yachajushpami Jesusta ali rijsinchi, juyanchi, paipi feta charinchi (1 Pedro 1:8, 9, liingui). Apóstol Pedropash Jesuspa ejemplota aliguta catichunmi animarca (1 Ped. 2:21). Jesuspa ejemplota ali catishpaca para siempre causaitami  japi ushashun. * Yalishca temapica Jesús cuenda humilde canata, ninanda llaquinatami yachajurcanchi. Cutin cai temapica Jesús cuenda na manllanata, ali yuyaita charinatami yachajushun.

3. a) Manllaita na charijcunaca ¿imashinata can? b)  Ama manllachunga ¿imata ayudanga?

³ Manllaita na charijcunaca llaquicuna shamujpipash shinlli tucushpami aguantai ushan, alita ruranatapash na ladoman saquinllu. Na manllaimandami tranquilolla sintirishpa Jehová Diospi confiashpa llaquicunata aguantan. Ñucanchicunaca, Taita Diospa ñaupajpi ali ricurishpa catingapaj munaimandami gentecunata manllaimandallaca na imatapash ruranchi (1 Sam. 11:7; Prov. 29:25). Shamuj punllacunapi ali causai tianata yarishpami llaquicunapi cashpapash na yapata llaquirinchi (Sal. 27:14). Shinallata, shujcunata juyaimandami ñucanchi causai peligropi cajpipash paicunata ayudanchi (Juan 15:13). Ama manllachunga ¿imata ayudanga? Ama manllangapaca Jehová Diospi confiashpami paipa Churi Jesuspa ejemplotapash catina canchi (Sal. 28:7).

4. ¿Imashinata Jesusca 12 huatagucunatalla charishpapash na manllashcata ricuchirca? (Callari dibujota ricupangui.)

⁴ Jesusca 12 huatagucunatalla charishpapash na manllanllu carca. Shuj punllaca ‘Diospa huasi ucupi mandashca shimita yachachijcunapa chaupipimi’ paicunahuan parlashca tiajurca (Lucas 2:41-47, liingui). Chai yachachijcunaca Moisesman cushca Leytapash, judiocunapa costumbrecunatapash alipachami rijsin carca. Chai costumbrecunamandami judiocunaca Leypi mandashcataca na pactachi ushan carca. Jatun yachachijcuna cajpipash Jesusca na paicunata manllarcachu. 12 huatagucunatalla charishpapash Jesusca na chaishuj huahuacunashnachu carca. Chaimandami Jesús ali tapuicunata rurajpica, chai yachachijcunaca aliguta uyashpa pensarinajurca. Chai yachachijcuna pandachingapaj munashpapash na ushashcangachu. ¿Imamanda shina ninchi? Bibliapica ninmi, Jesús “aligutapacha yarishpa tigrachijpimi, tucuicuna manllarishpa uyanajurca” nishpa. Imashinami ricunchi, Jesusca na manllashpami Diospa Shimipi yachachishcacunamanda parlarca.

5. ¿Imashinata Jesusca na manllashcata ricuchirca?

⁵ Villachishpa purijushpapash Jesusca na manllanllu carca. Chaimandami chai punllacunapi yachachijcunataca, panda yachachishcacunahuanmi gentecunataca umachinajunguichi nishpa rimarca (Mat. 23:13-36). Nali ruraicuna paita huaglichichunbash Jesusca na saquircachu (Juan 16:33). Contracuna jarcajpipash villachinataca na saquircachu (Juan 5:15-18; 7:14). Ashtahuangarin ishcai viajetami Jehovapa huasipi jatushpa nalita ruranajujcunataca llujchishpa cacharca (Mat. 21:12, 13; Juan 2:14-17).

6. Último punllata cai Alpapi causajushpaca ¿imashinata Jesusca na manllashcata ricuchirca?

⁶ Jesusca llaquicunapi cashpapash na manllanllu carca. Cai Alpapi último punllata causajujpi imalla pasashcata ricushun. Jesusca Judas traicionanata ali yachashpapash Pascua micuita tucuchishca jipaca na manllashpami Judastaca nirca: “Can imata rurasha yajushcatapash, ucha pactachilla” nishpa (Juan 13:21-27). Getsemaní nishca jardinbi soldadocuna preso apangapaj rijpipash Jesusca na pacajurcachu. Paipa causai peligropi cajpipash,  paipa catijcunata ama llaquichichunmi ñucami Jesús cani nirca (Juan 18:1-8). Chai punllacunapi sumo sacerdoteca imatapash nij tucushpami Jesustaca huañuchingapaj munajurca. Shinapash Jesusca na manllashpami judiocunata mandajcunapa ñaupajpica nirca, ñucami Cristo cani, ñucami Taita Diospa Churipacha cani nishpa (Mar. 14:60-65). Ashtahuangarin huañungacaman Taita Diosta cazuimandami ña huañugrijushpaca ‘tucuitami pactachircani’ nishpa tucurirca (Juan 19:28-30).

7. a) Joven, testigo de Jehová caimandaca ¿imashinata sintiripangui? b) ¿Imashinata na manllashcata ricuchi ushapangui?

⁷ ¿Imashinata jovengunaca escuelapi, colegiopi cashpapash na manllashcata ricuchi ushan? Jovenguna, cangunapa cumbacuna o shuj gentecuna burlarijpipash testigo de Jehovami cani ninataca na manllanachu capanguichi. Ashtahuangarin testigo de Jehová caimandaca jariyashcami cana canguichi (Salmo 86:12, liingui). Huaquin profesorcunaca evolución nishcapi crichunmi tal vez munanga. Shinapash cangunaca, Bibliapi yuyaicunata chimbapurashpami Taita Dios tucuita rurashcata yachajushcanguichi. Imamandata Taita Dios tucuita rurashcata cringui nijpica El origen de la vida. Cinco cuestiones dignas de análisis nishca folletohuanmi intindichita ushapanguichi (1 Ped. 3:15). Shina rurashpami, Biblia imata yachachijta na manllashpa parlashcamanda ninanda cushijunguichi.

8. ¿Imamandata na manllashpa villachina capanchi?

⁸ ¿Imashinata villachijushpapash na manllashcata ricuchinchi? Jesusta catijcunaca Jehová Dios ushaita carashcamandami na manllashpa villachishpa catina canchi (Hech. 14:3, NM ). Shinapash ¿imamandata na manllashpa villachina canchi? Pundapica Diospa Shimimandami yachachinchi. Diospa Shimica nimamanda na llullanllu (Juan 17:17). Shinallata ‘Taita Diosta ayudajcunami’ canchi. Jehovapa espíritu santo ayudajpimi villachinajunchi (1 Cor. 3:9; Hech. 4:31). Ashtahuangarin villachishpami Jehovatapash shuj gentecunatapash juyashcata ricuchinchi (Mat. 22:37-39). Manllaita na charishpaca, gentecuna panda yachachishcacunamanda cacharirichunmi Bibliamanda yachachishun (2 Cor. 4:4). Gentecuna na uyangapaj munajpipash, burlarijpipash, catiriashpa llaquichijpipash Diospa Shimitaca villachishpa catishunmi (1 Tes. 2:1, 2).

9. Llaquicunapi cashpapash ¿imashinata na manllashcata ricuchishun?

⁹ ¿Imashinata llaquicunapi cashpapash na manllashcata ricuchishun? Jehová Diospi confiajpica paillatami llaquicunata aguantachun ayudanga. Ñucanchi juyashca familiacuna huañujpi ninanda llaquirishpapash paicuna causarinata yachashpami ‘tucuipi cushichij Taita Diospa’ ayudata mascanchi (2 Cor. 1:3, 4; 1 Tes. 4:13). Huaquinbica imapash accidenteta charishpa o imapash nali ungüi japijpichari ninanda llaquirinajunchi. Shina llaquirinajushpapash yahuarta na chasquinachu canguichi nishpa Jehová Dios mandashcataca siempremi cazunchi (Hech. 15:28, 29). Ñucanchi ‘shungullata nalimari cangui’ nijujpi ninanda llaquirijushpapash Jehová Dios ayudanata ali yachashpami ñaupaman catinchi (1 Juan 3:19, 20; Sal. 34:18). *

10. a) Ali yuyaita charijca ¿imatata ruran? b) Jesusta catijcunaca ¿imashinata ali yuyaita charishcata ricuchin?

¹⁰ Ali yuyaita charijca ima ali cajta, ima nali cajta ricushpami alita ruranata agllan (Heb. 5:14). Jesusta catijcunaca ima decisionda rurana cashpapash Jehovapa ñaupajpi ali ricurinatami mascan. Chaimandami imata parlashpa, imata rurashpapash shujcunata llaquichingapaca na munan. Ashtahuangarin, shujcunata siempre animangapami munan (Prov. 11:12, 13). Shinallata, ‘na ñapash fiñarinllu’ (Prov. 14:29). Ashtahuangarin ima decisionda rurana cashpapash ‘paipa causaipi alichiringapami’ catina ñandalla recto catin (Prov. 15:21). Shinaca ali yuyaita charingapaca ¿imatata rurana canchi? Ali yuyaita charingapaca Bibliamanda yachajushpami, imata yachajushcata pactachina canchi (Prov. 2:1-5, 10, 11). Ashtahuanbachaca ali yuyaita charij Jesuspa ejemplotami catina canchi.

11. ¿Imashinata Jesusca ali yuyaita charishcata ricuchirca?

¹¹ Jesusca imata parlashpa, imata rurashpapash ali yuyaita charishcatami ricuchirca. ¿Imashinata parlarca? Jesusca ‘uyanaita, juyaillagutami’ villachin carca. Chaimandami gentecunaca alicachishpa uyan carca (Luc. 4:22; Mat. 7:28). Gentecunaman villachijushpaca Bibliamanda liishpa, uyachishpami intindichin carca. Maijan textota liina cashcatapash alimi yachan carca (Mat. 4:4, 7, 10; 12:1-5; Luc. 4:16-21). Causarishca jipaca, paipa ishcai catijcuna Emaús llactaman rinajujpi Jesús ricurishpami ‘Dios escribichishca Shimipi tucui ima nijushca’ paipi imashina pactarijushcata intindichirca. Jesús parlashpa shungu ucucaman chayajta intindichishcajpimi paipa catijcunaca nirca: ‘Dios escribichishca Shimiguta ñucanchiman villashpandi shamujushpaca ñucanchi shungupi aligutapacha yarijtami rimarca’ nishpa (Luc. 24:27, 32).

12, 13. Bibliapica ¿imashinata ricuchin Jesusca na ñapash fiñarij cashcata, shujcunata intindij cashcatapash?

¹² Jesusca paipa ruraicunahuanbash ali yuyaita charishcatami ricuchirca. ‘Na ñapash fiñarinllu’ carca (Prov. 16:32). Tranquilomi carca (Mat. 11:29). Paipa catijcuna cutin cutin pandarijpipash alimodosmi ayudan carca (Mar. 14:34-38; Luc. 22:24-27). Yangamanda nali tratajpipash na culiranllu carca (1 Ped. 2:23).

¹³ Jesusca alimi gentecunataca intindin carca. Shuj ejemplota ricupashun. Shuj punllaca yahuar shamujuj ungüita charij huarmigumi ashtaca gentecunapi chapurishpa Jesuspa ropata tacarishcandi jambirirca (Marcos 5:25-34, liingui). Leypi nishca shinaca chai nali ungüita charimandaca mapami carca, na pitapash tacarinachu carca (Lev. 15:25-27). Jesusca Leypi shina nijujta yachashpapash shujcunata llaquishpa juyana, Diospi ali crina ashtahuan minishtirishca cashcata intindishpami chai huarmigutaca na rimarca (Mat. 23:23). Chaipa randica chai huarmiguta intindishpami nirca: “Ñuca huahualla, ñucata tucui shunguhuan crishpami quishpirishcangui. Cunanga, ninanda cushijushpa rilla. Astinshna llaquichijuj chai nanaica, cutinga na llaquichingachu” nishpa. Imashinami ricunchi Jesusca alipacha ejemplotami saquishca.

14. a) Jesusca ¿imatata pundapi churan carca? b) Paiman mingashcataca ¿imashinata Jesusca pactachirca?

¹⁴ ¿Imatata pundapi churarca? Jesuspaca villachinami ashtahuan minishtirishca carca (Luc. 4:43). Chaimandami ima decisionda rurajushpapash villachinata pundapi churan carca. Shujcunaman yachachinatapash pundapi churashpami minishtirishcacunahuanlla causanata agllarca (Luc. 9:58). Pai huañushca  jipapash yachachishpa catichunmi, paipa catijcunataca aliguta yachachishpa saquirca (Luc. 10:1-12; Juan 14:12). Ashtahuangarin, ultimocamanmi ayudasha nishpami paipa catijcunataca cushichirca (Mat. 28:19, 20).

15. ¿Imashinata parlashpapash ali yuyaita charishcata ricuchinchi?

¹⁵ ¿Imashinata parlajushpapash ali yuyaita charishcata ricuchi ushanchi? Ali yuyaita charishcata ricuchingapaca imata parlashpapash ñucanchi huauquipanicunata cushichinami canchi. Imapash nalicunata nishpa paicunata llaquichinamandaca jarcarinami canchi (Efes. 4:29). Villachijushpapash ‘cachihuan mishquichishcashnami’ ashaguta trancarishpa aliguta parlana canchi (Col. 4:6). Nara villachishpallatami gentecunaca imatashi minishtijun, imatashi uyangapaj munanga nishpa pensarina canchi. Cushilla parlajpica gentecunaca uyangapaj munanmi, huaquinbicarin ima llaquicunata charishcatapash na pacashpami parlan. Ashtahuangarin Bibliapi yuyaicuna gentecunapa causaita cambiangapaj poderta charijpimi, ñucanchi crishcacunamanda parlana cashpaca Bibliapi textocunata ricuchishpa parlanchi (Heb. 4:12).

16, 17. a) ¿Imashinata ali yuyaita charishcata ricuchinchi? b) Shujcunata intindijcunaca ¿imashinata can? c) ¿Imashinata villachinata ñucanchi causaipi pundapi churashcata ricuchinchi?

¹⁶ ¿Imashinata shujcunata intindishcata ricuchinchi? Ali yuyaita charishpaca na ñapash fiñarishunllu (Sant. 1:19). Pipash imatapash nishpa llaquichijpica, imamandashi shina nirca o rurarca nishpa pensaringapami esforzarinchi. Shina rurashpami ‘fiñachijpipash’ perdonanchilla (Prov. 19:11). Shinallata, ñucanchi huauquipanicuna juchayucuna caimanda pandarijlla cashcata yarishpa o tal vez imapash problemacunapi cajta pensashpami shujcunata intindishcata ricuchinchi. Ashtahuangarin shujcunapa yuyaicunatapash respetashpami, ñucanchi pensashcatalla rurachunga na atichinchi (Filip. 2:4).

¹⁷ ¿Imatata pundapi churanchi? Diospa Shimimanda villachinaca shuj jatun bendicionmi can. Chaimandami villachinataca yaria causanchi. Villachinata yaria caimandami Jehovata sirvinata, minishtirishcacunahuanlla causanata pundapi churanchi. Shina causashpami cai pacha nara tucurijpillata tucui ñucanchi fuerzacunata, tiempota utilizashpa ashtahuan villachi ushashun (Mat. 6:33; 24:14).

18. Para siempre causaita chasquingapaca ¿imatata rurana capanchi?

¹⁸ Jesús imashina cashcata yarinaca alipachami cashca. Shinapash Jesuspa ejemplota ashtahuan aliguta catingapaca Jesusmandami ashtahuan yachajushpa catina capanchi. Jesuspa chaquita aliguta catishpallami Jehovaman ashtahuan quimirishpa para siempre causaitapash chasquishun.