1, 2. a) Huata 33, Pentecostés fiesta punllapica ¿imata tiai callarirca? b) ¿Picunata Diospa Israel mushuj llacta tucurca? (Callari dibujota ricupangui.)

HUATA 33, Pentecostés fiesta punllapimi Jehová Diosca paipa espíritu santota cushpa paipa mushuj Israel llactata agllarca. Chaitami Diospa Israel nin (Gál. 6:16). Chai punllamandami Diospa Israelpi cangapaca Abrahanba punllacunapishna circuncisionda ruranataca jaricunaca ñana minishtirca. Apóstol Pablo nishca shinaca, ‘shungupimi circuncisionda rurana’ carca (Rom. 2:29).

² Callaripica Jesuspa apostolcunami Diospa Israel carca. Jipamanga Jerusalén huasipi 100 yali tandanajushcacunapashmi Diospa Israel tucurca (Hech. 1:12-15). Jehová Diosca paicunaman espíritu santota cushpami paicunataca huahuacunatashna chasquirca (Rom. 8:15, 16; 2 Cor. 1:21). Espíritu santota cushpami Jehová Diosca Jesuspa ninan valishca causaita gentecunamanda chasquishcata, Moisesman Cushca Leyta huashaman saquishpa Mushuj Pacto tiai callarishcata ricuchijurca (Luc. 22:20; Hebreos 9:15, liingui). Shinami ungidocunaca Diospa Israel tucurca. Ashtahuangarin, Jehovapa espíritu santota chasquimandami paicunaca ‘Taita Diospa juyailla rurashcacunataca’ shuj shuj shimicunapi villachi usharca (Hech. 2:1-11).

3-5. a) Pentecostés fiesta punllapica ¿imatata apóstol Pedroca judiocunataca nirca? b) Diospa Israelca ¿imashinata mirashpa catirca?

³ Jehová Diosca judiocunapash, judío cuenda causajcunapash Jesusta catij congregacionbi cachun munashpami, paicunaman villachichunga apóstol Pedrota agllarca. Chaimandami Pentecostés fiesta punllapica na manllashpa apóstol Pedroca judiocunamanga villachirca, cangunallata huañuchishca Jesustaca cangunata ‘Mandaj cachunbash, Quishpichij Cristo cachunbashmi’ chasquina canguichi nishpa. Shina nijpimi judiocunaca ¿imatata rurashunyari nirca? Chaimi apóstol Pedroca nirca: ‘Ninanda llaquirishpa Diospaman tigrarichi. Tucuicuna Jesucristopa shutipi bautizarichi. Shina rurajpimi Diosca cangunapa juchacunata anchuchishpa, paipa jucha illaj espirituta cangunaman caramunga’ nishpa (Hech. 2:22, 23, 36-38). Shinami chai punllapillata casi tres mil gentecuna Diospa Israel mushuj llacta tucurca (Hech. 2:41). Apostolcuna cushijushpa villachinajujpimi ashtacacunaca Jesusta cati callarirca. Shinami Diospa Israelca ashtahuan mirajurca (Hech. 6:7).

⁴ Jipamanga Samaria llactamanda gentecunamanbash Jesusta catijcuna villachijpimi ashtacacuna bautizarirca. Shinapash paicunaca na chai ratochu espíritu santota chasquirca. Chaimandami chai punllacunapi Jerusalenbi cuerpo gobernanteca Pedrotapash Juandapash chai mushuj huauquicunata ricugripaichi nishpa cacharca. Paicuna chayashpa ‘uma jahuapi maquita churashpa mañajpimi’ chai mushuj huauquicunaca ‘Diospa jucha illaj espirituta chasquirca’ (Hech. 8:5, 6, 14-17). Shinami samaritanocunapash Diospa Israel tucurca.

⁵ Huata 36​pica shuj llactamanda gentecunapash paipa Israel tucuchun munashpami Jehová Diosca Roma llactapi soldadocunata mandaj Cornelioman, paipa familiacunaman, paipa rijsicunamanbash villachichun apóstol Pedrotaca agllarca (Hech. 10:22, 24, 34, 35). Bibliapica ninmi: ‘Pedro villajujpillatami uyajcunapaman Diospa jucha illaj espíritu shamurca. Pedrohuan shamushcacuna, circuncisión nishcata rurashcacunaca, Diosca na israelitacunamanbash paipa espirituta talinshna cachamujta ricushpami, ninanda manllarinajurca’ nishpa (Hech. 10:44, 45). Chai punllamandami circuncisionda na rurashca shuj llactamanda gentecunapash Diospa Israelpi caita usharca.

6, 7. a) Jesusta catijcunaca ¿imashinata ricuchirca Taita Diospa shutita apaj llacta cashcata? b) ¿Maicamanda villachirca?

⁶ Huata 49​pi cuerpo gobernantepa shuj tandanajuipimi discípulo Santiagoca nirca: ‘Taita Diosca na israelitacunatapash paipa [“shutita apaj llacta”, NM ] tucushpa causachun imashina agllai callarishcatami, Simón Pedroca ña villarca’ nishpa (Hech. 15:14). Imashinami ricunchi, judiocunapash na judiocunapashmi Taita Diospa shutita apaj llacta caita usharca (Rom. 11:25, 26a). Jipamanga apóstol Pedroca escribircami:  ‘Pundaca na Taita Diospa llacta carcanguichichu. Cunanga Taita Diospa llactami canguichi’ nishpa (1 Ped. 2:10, NM ). Chai mushuj llactaca ¿imatata rurana carca? Chaita yachachunmi apóstol Pedrollata nirca: ‘Cangunaca Dios agllashca miraicuna, jatun Mandajpa curacuna, jucha illaj llacta cachun Taita Dios randishcacunami canguichi. Taita Dios juyailla rurashcacunata villachun agllashcacunami canguichi. Paillatami cangunataca yanapi causanajushcamanda paipa juyailla michaman llujshichun cayarca’ nishpa (1 Ped. 2:9). Shinaca, Diospa Israelca na manllashpami Jehová Dioslla mandaj cashcata, paipa shutimandapash villachina carca.

⁷ Imashinami punda Israel llactataca ‘paipalla cachun, paimanda villachun’ Jehová Diosca agllarca, shinallata rurachunmi mushuj Israeltapash agllarca (Is. 43:21). Paicunaca na manllashpami gentecunamanga villachirca, canguna mañanajuj dioscunaca yanga dioscunami can, Jehová Diosllami ciertopacha Taita Dios can nishpa (1 Tes. 1:9). Paicunami ‘Jerusalenbi, tucui Judea llactapi, Samaria llactapi, cai pacha tucuri manñacaman’ Jehová Diosmandapash Jesusmandapash villachinajurca (Hech. 1:8; Col. 1:23).

8. Apóstol Pabloca ¿imatata advirtirca?

⁸ Apóstol Pablopash Diospa Israelcunapuramandami carca. Chaimandami yanga dioscunata adoraj yachaj tucushcacunamanga na  manllashpa villachirca: ‘Cai pachatapash, cai pachapi tucui ima tiashcatapash, jahua pachatapash’ ruraj Jehová Diosmi ciertopacha Taita Dios can nishpa (Hech. 17:18, 23-25). Congregaciondapash advirtishpami apóstol Pabloca nirca: ‘Ñuca rijpica millai atujcuna yaicunshnami cangunataca tucuchinajunga. Cangunapuramandallatami jatun nalita rimaj runacuna jataringa. Jesusta catijcuna paicunata catichunmi, chashna runacunaca jataringa’ nishpa (Hech. 20:29, 30). Shinami, apostolcuna nara huañujpillata congregacionmanda caruyashpa pandata yachachijcunaca ricuri callarirca (1 Juan 2:18, 19).

9. Apostolcuna huañushca jipaca ¿imata Diospa llactahuanga pasarca?

⁹ Apostolcuna huañushca jipaca congregacionmanda caruyashpa pandata yachachijcuna ushashcata mirajpimi, Jesusta catinchi nij tucuj religiongunaca ricuri callarirca. Taita Diospa “shutita apaj llacta” canapa randica, Bibliamandapash Taita Diospa shutita anchuchishpa, yanga dioscunata adoraj religiongunapa nali costumbrecunatapashmi catishca. Ashtahuangarin llullacunata yachachishpa, Taita Diosmandami guerracunata ruranchi nishpa, huainayana juchapi urmajpipash na imatapash rurashpami Taita Diostaca pingaichishca. Chaimandami ashtaca huatacunataca huaquingunalla cai Alpapica Jehová Diosta sirvinajurca. Chai tucui huatacunapica paipa shutita apaj llactaca nara cutin ricuchircachu.

10, 11. a) ¿Imamandata Jesusca ali trigo jihuamandapash nali jihuamandapash parlarca? b) ¿Imashinata Jesuspa shimicunaca 1914 huata jipa pactarirca?

¹⁰ Congregacionmanda caruyashpa panda yachachijcuna mirashpa ali religionda na rijsichun saquina punllacunamanda parlashpami Jesusca nirca: ‘Tucuilla puñunajungacamanmi’ ali trigo muyuta tarpushca pambapica nali jihuata Diabloca tarpunga. Shinapash nali jihuapash trigopash ‘cai pacha tucurimui’ punllacunacamanmi igual viñanga nishpa. Jesús nishca shinaca, ali trigo muyuca ‘Diospa Reinopa huahuacunami’ can. Nali jihuaca ‘Diablopa huahuacunami’ can. Tucurimui punllacunapimi ali trigo muyuta tarpujca, cozechaj angelcunataca nali jihuamanda shicanyachishpa ali trigota tandachichun cachanga (Mat. 13:24-30, 36-43). Shinaca ¿imashinata Jesuspa shimicunaca pactarirca? ¿Imashinata  Jehová Diospa llactaca cai Alpapi cutin ricuri callarirca?

¹¹ Tucurimui punllacunaca 1914​pimi callarirca. Chai punllacunapica casi 5 mil ungidocunallami cai Alpapica tiarca. Shinapash Babilonia shuti jatun pueblopa o panda religiongunapa panda yachachishcacunahuanmi huatashcashna carca. Chaimandami Jehová Diosca 1919 huatapi ungidocunataca Babiloniapa panda yachachishcacunamanda cacharichirca. Shina rurajpimi maijanguna ali trigoshna Jesusta ali catinajujta, maijanguna nali jihuashna Jesusta nali catinajujtaca ricunalla carca. Profeta Isaías nishca shinaca chai punllacunapimi Jehová Diosca paipa llactata cutin tandachi callarirca. Isaías 66:8​pica ninmi: ‘¿Shuj punllapillachu cai pachataca ungushca? ¿Shuj viajepillachu shuj llactaca ungushca? Sión shuti urcuca unguna nanai japijpimi huahuacunata ungurca’ nishpa. Cai textopi Sión nishpaca, jahua pachapi angelcunamandami parlajun. Ungidocuna cutin cai Alpapi ricuri callarijpimi Sionga huahuata ungunshna Diospa llactata ungurca.

12. ¿Imashinata ungidocunaca Jehovapa shutita apaj llacta cashcata ricuchishca?

¹² Ali trigoshna ungidocunaca apostolcunapa punllacunapi Jesusta catijcunashnami Jehová Diosmanda villachinajushca (Isaías 43:1, 10, 11, liingui). Jehová Diosmanda villajcuna caimandami aliguta causanajun, ‘ali villaicunatapash tucui llactacunapi causajcuna yachachun’ villachinajun (Mat. 24:14; Filip. 2:15). Shinami ashtaca ashtaca gentecunata Jehová Diospa ñaupajpi ali ricurichun ayudanajun (Daniel 12:3, liingui).

13, 14. a) Jehová Dios chasquichun munashpaca ¿imatata na Diospa Israelpura cashpaca rurana can? b) ¿Maijan ishcai profeciacunata ashtaca gentecunapash quimirinata ricuchin?

¹³ Imashinami ñaupa temapi ricurcanchi, shuj llactamanda gentecuna cashpapash Israel llactahuan tandanajushpa adorajpillami Jehová Diosca chasquin carca (1 Rey. 8:41-43). Cunan punllacunapipash Jehová Dios chasquichun munashpaca ali trigoshna ungidocunahuanmi  tandanajushpa Jehová Diostaca adorana canchi.

¹⁴ Diospa agllashca llactaman ashtaca gentecunapash quimirinataca ishcai profeciacunami ricuchijun. Pundapica profeta Isaiasca nircami: ‘Ashtaca gentecunami cashna nishpa shamunajunga: “Shamuichi, Mandaj Diospa urcuman vichai rishunchi. Jacobopa Taita Diospa huasiman jacuchi. Chaipimi pai munashcashna causanata yachachinga. Chaita yachajushpami paipa ali ñangunata cati ushashun” ninajungami. Sion pueblomandami mandashca shimicuna llujshinga. Jerusalenmandami Mandaj Diospa Shimica llujshinga’ nishpa (Is. 2:2, 3). Profeta Zacariaspash nircami: ‘Ashtaca gentecunapash, ninan ushaita charij llactacunapi causajcunapashmi tucuita Mandaj Diosta Jerusalenbi mascangapaj, alita rurapai nishpa mañangapaj shamunajunga’ nishpa. Chai gentecunataca ‘shuj llactacunamanda shuj shuj rimaita rimaj chunga runacunashnami, Judá llactamanda runapa o Diospa Israeltaca jahualla churajushcapi charirishpa ninajunga: “Ñucanchipashmi cangunahuan ringapaj munapanchi. Taita Diosca cangunahuan cajtami yachapanchi”’ nishpa (Zac. 8:20-23).

15. ‘Shuj llamagucuna’ nishcacunaca ¿imashinata ungidocunahuan tandanajushca?

¹⁵ ‘Shuj llamagucuna’ nishcacunaca ungidocunahuan tandanajushpami Diospa Reinomanda ali villaicunata villan (Mar. 13:10). Paicunaca Diospa llactahuan tandanajushpami ‘shujlla corralshna’ tucushpa shujlla ‘ali michij’ Jesusta catinajun (Juan 10:14-16, liingui).

16. ‘Ninan Manllanai Jatun Llaqui Punllacuna’ tucuri callarichunga ¿imatata Jehová Diosca ruranga?

¹⁶ Babilonia shuti jatun pueblo tucuchi tucushca jipaca Jehovapa llactaca shuj jatun llaquipi cashpami Jehová Dios difindichun minishtinga. Jehová Dios agllashca tiempopimi cai Alpapica Jehová munashcashna huaquin cosascuna pasashpa, paipa llactata atacai callaringa. Chaipimi ‘Ninan Manllanai Llaqui Punllacuna’ tucuri callaringa (Mat. 24:21; Ezeq. 38:2-4). Jehovata sirvijcunata Gog nishca llaquichi callarijhuanmi Jehová Diosca Gogtapash paipa catijcunatapash tucuchishpa paipa llactataca salvanga (Ezeq. 38:10-12). Chaipimi Jehová Diosca pailla mandana cashcata ricuchishpa paipa shutitapash tucui llullacunamanda limpianga. Jehová Diosllatami nin: ‘Ashtaca llactacunapi causajcunapa ñavipimi rijsi tucushca casha. Shinami ñucataca, Mandaj Dios cajta yachanajunga’ nishpa (Ezeq. 38:18-23).

17, 18. a) Jehovapa llactata Diablo llaquichingapaj munajpica ¿imatata Jehová Diosca ninga? b) Jehová Dios cuidachun munashpaca ¿imatata rurana capanchi?

¹⁷ Jehovapa llactata Diablo atacajpica Jehová Diosca paipa sirvijcunataca ningami: ‘Ñuca llactalla, cangunaca ucunaman yaicushpa punguta vicharichi. Fiñashcata yalichingacaman ashaguta pacajuichi’ nishpa (Is. 26:20). Chai llaqui punllacunamanda salvaringapaca Jehová Diospa instrucciongunatami catina canchi. Isaías 26:20​pi “Ucucuna” nishpaca tal vez congregaciongunamandami parlajunga.

¹⁸ Shinaca ‘Ninan Manllanai Llaqui Punllacunamanda’ salvaringapaj munashpaca Jehová Dios cai Alpapi paipa llactata charijta, chai llactata congregaciongunapi organizashpa charijujtami intindina canchi. Chaita ali intindishpami congregacionmandaca na caruyana canchi. Salmistashna tucui shunguhuan crishpami nina canchi: ‘Quishpirinaca, Mandaj Diosmandami shamun.’ Paipa ‘agllashcacunaca bendiciai tucungami’ nishpa (Sal. 3:8).