1, 2. a) ¿Imamandata crinchi Diospa Reino Diospa munaita pactachinata? b) Efesios 2:12​pi nishca shinaca, ¿imashinata Jehová Dios rurashca pactocunaca ñucanchita ayudan? (Callari dibujota ricupangui.)

TESTIGO DE JEHOVACUNACA cushijushpami gentecunamanga villanchi, Diospa Reinollami tucui llaquicunata tucuchinga nishpa. Shinapash ¿Taita Diospa Reino cierto mandanataca crinchichu? ¿Taita Diospa munai pactarinataca crinchichu? ¿Imamandata Taita Diospa Reino mandanataca tucui shunguhuan crina capanchi? (Heb. 11:1.)

² Jehová Diosca pai agllashca reyta paipa Reinopi mandachun churashpami, paipa munaitapash pactachinga, Pailla mandana cashcatapash ricuchinga. Shinaca Diospa Reinopica ¿pita mandanga? ¿Picunata Jehová Dios agllashca reyhuanga mandanga? ¿Picunatata mandanga? Jehová Diosca paipa Reino ciertopacha tiajta crichunmi ari nishcacunata o pacto nishcacunata rurarca. Chai pactocunataca Jehová Dios, o paipa Churi Jesusmi rurarca. Chai pactocunata yarinami, Jehová Diospa munai pactarinata crichun, paipa Reino ciertopacha mandanata crichunbash ayudanga (Efesios 2:12, liingui).

3. Cai temapipash shamuj temapipash ¿imatata yachajupashun?

 ³ Bibliapica Diospa Reinopi Jesús mandanata ricuchingapami 6 pactocunamanda parlan. Chai 6 pactocunaca ¿maijanda can? 1) Abrahanhuan Rurashca Pacto, 2) Moisesman Leyta Cushca Pacto, 3) Davidhuan Rurashca Pacto, 4) Melquisedec Sacerdoteshna Tucuchun Pacto, 5) Mushuj Pacto, 6) Diospa Reinopi Mandangapaj Pacto. Cai pactocunata asha asha yachajushpami Diospa Reinomanda ashtahuan intindishun. Shinallata gentecunapapash, cai Alpapipash Jehová Diospa munai pactarinatami yachajushun ( “Taita Diosca ¿imashinata paipa munaita pactachinga?” nishca recuadrota página 15​pi ricupangui).

4. Génesis libropi nishca shinaca ¿ima quimsa cosascunatata Jehová Diosca pactachingapaj munarca?

⁴ Jehová Diosca gentecuna causachunmi cai Alpataca rurarca. Chai jipaca Jehová Diosca, Adanda paiman rijchata rurangapami munarca. Shinallata ashtaca ali gentecuna mirashpa, cai tucuilla Alpata shuj juyailla paraisota rurachunmi munarca. Ashtahuangarin, ali yachaita nali yachaita cuj yuramanda gentecuna japishpa micuchunbash na munarcachu (Gén. 1:26, 28; 2:16, 17). Cai quimsa cosascunahuanmi Jehová Diosca gentecuna imashina causachun munashcata, cai Alpapash imashina tucuchun munashcata ricuchijurca. Shinaca ¿imamandata pactocunata rurana minishtirirca?

5, 6. a) Taita Diospa munai ama pactarichun munashpaca ¿imatata Diabloca rurarca? b) Jardín de Edenbi Diablo juchachijpica ¿imatata Jehová Diosca rurarca?

⁵ Diabloca Taita Diospa munai pactarichunga na munarcachu. Ashtahuangarin gentecunapash Taita Diosta na cazuchun munashpami, Evataca na japinachu canguichi nishca yuramanda micuchun umachirca (Gén. 3:1-5; Apoc. 12:9). Shinami Diabloca, Taita Diosca mandana derechotaca na charinllu nishpa juchachirca. Jipa huatacunamangarin, gentecunatapashmi Diabloca juchachirca, gentecunaca bendiciachun munashpallami Taita Diostaca sirvin nishpa (Job 1:9-11; 2:4, 5).

⁶ Jardín de Edenbi Diablo juchachijpica ¿imatata Jehová Diosca rurarca? Jehová Dios munashpaca Diablotapash Adanda Evatapash tucuchinmanllami carca. Shinapash, Adanba huahuacuna mirashpa cai Alpata jundachina munaica na pactarinmanllu carca. Chaimandami Jehová Diosca paicunata chaipillata tucuchinapa randica shuj profeciata jardín de Edenbi nirca. Chai profeciami, Diospa munai ciertopacha pactarinata ricuchijurca (Génesis 3:15, liingui).

7. Jardín de Edenbi profeciaca ¿imatata culebramandapash paipa miraimandapash villarca?

⁷ Jehová Diosca jardín de Edenbi profeciata nishpami culebratapash paipa miraitapash tucuchinata parlarca. Culebra nishpaca Diablomandami parlajun. Cutin, culebrapa mirai nishpaca Jehová Dios na mandachun munajcunamandami parlajun. Huarmipa miraitaca Jehová Diosca nircami, canmi na cazungapaj munajcunataca tucuchingui nishpa. Shinaca jardín de Edenbimi Jehová Diosca villachirca Diablotapash, paipa culpamanda tiashca nali ruraicunatapash tucuchinata. Shinallata chai profeciami Jehová Diospa munai imashina pactarinatapash villachirca.

8. Génesis 3:15​pi huarmimanda, paipa miraimandapash ¿imatata yachajupashcanchi?

⁸ Génesis 3:15​pi nishca shinaca huarmipa miraimi culebrapa o Diablopa umata saruna carca. Huarmipa miraica ¿pita cana carca? Imashinami Diabloca na ricunalla espíritu can, shinallatami huarmipash, huarmipa miraipash na ricunalla cana carca (Heb. 2:14). Jardín de Edenbi profeciata nishca punllamandaca Diablopa miraica ushashcatami mirashpa catirca. Shinapash huarmipa mirai pi  cashcataca na yacharircachu. Casi 4 mil huatacuna jipami Jehová Diosca tauca pactocunata nishpa huarmipa mirai pi cashcata, Diablotapash paipa nali rurashcacunatapash tucuchinata villashpa catirca.

9. Abrahanhuan Rurashca Pactoca ¿ima horata pactari callarirca?

⁹ Jardín de Edenbi profeciata nishca punllamanda casi 2 mil huatacuna jipami, Jehová Diosca Abrahandaca Ur llactamanda llujshishpa Canaán alpacunaman ri nishpa mandarca (Hech. 7:2, 3). Abrahandaca nircami: ‘Canba llactamanda, canba familia puramanda, canba taitapa huasi ucupuramandapash llujshishpa, ñuca ricuchina llactaman rilla. Chaipimi canba miraimandaca, shuj jatun llactata rurasha. Candaca bendiciashpami, canba shutitapash jatunyachisha. Canmandami bendiciai tucunajunga. Canda bendiciajcunataca bendiciashami. Canda ima llaquipash japishpaca alichari canman nijcunataca, paicunatapashmi llaquichisha. Canmandami cai pachapi causanajuj tucuilla familiacunaca bendiciai tucunga’ nishpa (Gén. 12:1-3). Chai shimicunata nishpami Jehová Diosca Abrahanhuan pactota rurajurca. Ima punlla chai pactota rurashcataca na yacharinllu. Shinapash, Jesús shamungapaj 1943 huatacuna faltajuj punllacunapimi, chai pactoca pactari callarirca. Chai punllacunapica Abrahanga 75 huatacunatami charirca. Paica Harán llactamanda llujshishpami Éufrates yacucunata yalirca.

10. a) ¿Imashinata Abrahanga Jehová Diospi tucui shunguhuan crishcata ricuchirca? b) Huarmipa miraimanda parlashpaca ¿imatata Jehová Diosca villarca?

¹⁰ Jehová Diosca cutin cutin parlashpami paipa nishcacuna imashina pactarinata Abrahanmanga asha asha villarca (Gén. 13:15-17; 17:1-8, 16). Shuj punllacarin, Jehovapa nishcacunata crishpami Abrahanga paipa churita Jehovaman cuni nishpa huañuchigrijurca. Chaita ricushpami  Jehová Diosca, paipa shimicunata Abrahán ashtahuan crichun juramentushpa shuj shimicunatapash nirca (Génesis 22:9-12, 15-18 *). Abrahanman nishca shimicuna pactari callarijpimi Jehová Diosca Abrahanmanga villarca, huarmipa miraica canmandami shamunga, chai miraica ashtacacunami canga, paicunami mandanga, contracunata tucuchinga, ashtahuangarin paicunamandami ashtaca gentecunaca bendiciai tucunga nishpa.

11, 12. a) Bibliapica ¿imashinata ricuchijun Abrahanhuan Rurashca Pactoca jipa punllacunapipash pactarina cashcata? b) Abrahanhuan Rurashca Pactoca ¿imashinata ñucanchitapash ayudan?

¹¹ Abrahanhuan Rurashca Pacto pactarijpimi Abrahanba huahuacunaca Canaán alpacunapi causarca. Shinapash Bibliapi nishca shinaca, Abrahanhuan Rurashca Pactomandaca shuj bendiciongunapash tianarami carca (Gál. 4:22-25). Apóstol Pabloca yachachircami, Jesusmi Abrahanba miraipa ashtahuan importante parte can nishpa. Shinallata nircami: ‘Cristopa cashpaca, Abrahanba miraicunami canguichi. Shina cashpami Dios carashapachami nishcataca japigrinapacha canguichi’ nishpa. Shinaca Jesucristopa caimandami 144 mil ungidocunapash Abrahanba mirai can (Gál. 3:16, 29; Apoc. 5:9, 10; 14:1, 4). Cutin, Génesis 3:15 profeciapi huarmica ¿pita can? Jehová Diosta jahua pachapi ali sirvijcunami can. Paicunatami Bibliapica ‘jahua pachamanda Jerusalén’ nin (Gál. 4:26, 31). Abrahanhuan Rurashca Pactopi nishca shinaca, huarmipa miraimandami cai Alpapi llactacunaca bendiciai tucuna carca.

¹² Abrahanhuan Rurashca Pactomi Diospa Reino ciertopacha mandanata crichun ayudan. Shinallata chai pactomi Jesuspash paihuan mandangapaj rinacunapash Diospa Reinota chasquichun ñanda pascashpa saquin (Heb. 6:13-18). Shinapash Abrahanhuan Rurashca Pactoca ¿mashna tiempotata parana carca? Abrahanhuan rurashca pactoca Jesús mandashpa Diospa tucui contracunata tucuchingacaman, cai Alpapi tucui familiacuna bendiciai tucungacamanmi parana can (1 Cor. 15:23-26). Ashtahuangarin, Abrahanhuan Rurashca Pacto ima horacamanbacha parana cashcata parlashpami Génesis 17:7​pica nin: ‘Canba cati miraicunacaman’ o para siempremi tianga nishpa. Shinapash ¿imamandata chai pactoca para siempre tiana can? Chai punllacunapi causajcunaca para siempremi bendiciongunata chasquinga. Imashinami ricupanchi, Abrahanhuan pactota rurashcamandami Jehová Diosca paipa munaita pactachishpa cai Alpapica ali gentecunatalla mirachun saquinga (Gén. 1:28).

13, 14. Davidhuan Rurashca Pactoca ¿imatata yachachin?

¹³ Jardín de Edenbi profeciapash, Abrahanhuan Rurashca Pactopash Jehová Dios paipa leycunata pactachishpa mandanatami ricuchijun. Jesuspash Diospa Reinopi mandashpaca Jehová Diospa leycunata pactachishpami mandanga (Sal. 89:14). Diospa Reinopi mandajcunaca na ima horapash nalicuna tucungachu. ¿Imashinata yachanchi? Chaita yachangapaca shuj pactomandapash yachajushunchi.

¹⁴ Cunanga Israel llactapa rey Davidhuan Rurashca Pactomanda yachajushun (2 Samuel 7:12, 16, liingui). Jehová Diosca Davidmanga villarcami, ñuca agllashca Mesiasca canba familiamandami shamunga nishpa (Luc. 1:30-33). Shinami Jehová Diosca Mesías maijan familiamandapacha shamunata ashtahuan ali intindichirca. Ashtahuangarin Jehová Diosca nircami, ‘mandanata japingapaj shamujmi’ ñuca Reinopica mandanga nishpa (Ezeq. 21:25-27). Jehová  Diosca rey Davidpa familiamanda llujshishca Jesustami mandachun churanga. Shina rurajpimi rey Davidpa miraica ‘causaita causaicaman’ mandajunga. Imashinami Indica na tucurin, shinallatami Jesuspa mandanaca na tucuringa (Sal. 89:34-37). Jesús mandashpaca ima horapash na huaglishpami aliguta mandanga, unai unaicamanmi bendicianga.

15 Melquisedec Sacerdoteshna Tucuchun Pactopi nishca shinaca ¿imashinata huarmipa miraica gentecunata ayudana carca?

¹⁵ Abrahanhuan Rurashca Pactopash Davidhuan Rurashca Pactopash huarmipa mirai Diospa Reinopi mandanatami ricuchijurca. Shinapash tucuilla gentecunata ayudangapaca aliguta mandashpapash sacerdote canami minishtirijurca. Huarmipa mirai sacerdote cuenda ayudajpillami gentecunaca juchamanda salvarita ushana carca. Shinallata sacerdote cuenda ayudajpillami gentecunaca cai Alpapi Jehovata sirvijcunahuanbash jahua pachapi sirvijcunahuanbash shujlla familia cuenda tucuita ushana carca. Chaimandami Jehová Diosca Melquisedec Sacerdoteshna Tucuchun Pactota rurarca.

16, 17. ¿Imamandata Jesusca Melquisedec sacerdoteshna cana carca?

¹⁶ Jehová Diosca Davidman villashpami Jesushuan pactota ruranata ricuchirca. Shinapash Jesushuan rurashca pactoca ¿imapata cana carca? 1) Taita Diospa ‘ali ladopi tiarishpa’ contracunata mishangacaman shuyachunmi cana carca, 2) ‘causaita causaicaman Melquisedec [sacerdoteshna] tucuchunmi’ cana carca (Salmo 110:1, 2, 4, liingui). Shinapash ¿imamandata Jesusca ‘Melquisedec’ sacerdoteshna cana carca? Israelitacuna nara Canaán alpacunaman yaicujpica Salem llactamanda rey Melquisedecmi ‘jahua pachapi tiajuj Taita Diospa’ sacerdote carca (Heb. 7:1-3). Melquisedectallami Jehová Diosca rey cachunbash sacerdote cachunbash agllarca. Paishnallaca pipash na tiarcachu. Chaimandami Melquisedectaca causaita causaicaman sacerdotemi can nin.

¹⁷ Melquisedec Sacerdoteshna Tucuchun Pactota rurashcamandami Jehová Diosllata Jesustaca agllarca sacerdote cachun. Chaimandami Jesustaca ‘causaita causaicaman Melquisedec [sacerdote]’ nin (Heb. 5:4-6). Melquisedec Sacerdoteshna Tucuchun Pactomi ricuchijun, Jehová Diosca Jesusta mandachun churashpa paipa munaita gentecunapapash cai Alpapipash pactachinata.

 18, 19. a) Cai temapi yachajushca pactocunaca ¿imashinata Diospa Reino ciertopacha mandanata ricuchin? b) Shamuj temapica ¿imatata yachajupashun?

¹⁸ Cai temapi pactocunaca Diospa Reinopi Jesús mandanata, Diospa Reino ciertopacha mandanatami yachachin. Jehová Diosca jardín de Edenbi profeciata nishpami nijurca, huarmipa miraihuanmi gentecunataca ñuca munashcashna causachun ayudasha, cai Alpapash ñuca munashcashnami tucunga nishpa. Abrahanhuan Rurashca Pactoca Jesuspash ungidocunapash huarmipa mirai cashcata, paicuna Diospa Reinota chasquinatami ricuchijun.

¹⁹ Cutin Davidhuan Rurashca Pactoca huarmipa mirai, Jesús maijan familiamandapacha llujshina cashcatami yachachijurca. Shinallata Davidhuan Rurashca Pactomi cai Alpata unai unaicaman Jesús mandana cashcata ricuchijurca. Melquisedec Sacerdoteshna Tucuchun Pactoca huarmipa mirai sacerdote cana cashcatami yachachijurca. Shinapash gentecuna jucha illaj cachunga ¿picunapashta reycuna, sacerdotecuna tucuna carca? Chaitaca shamuj temapimi yachajupashun.