Bibliapa yachachishcacuna
Taita Dios juzgana punllapica ¿imata pasanga?
Cai temapimi quiquin Bibliamanda charishca tapuicunata contestapanga. Munashpaca testigo de Jehovacunahuanmi caimanda ashtahuan yachajuita ushapangui.
1. Taita Dios juzgana punllaca ¿imata can?
Ashtaca gentecunaca Taita Diospa juzgana punllapica, cai dibujopi ricurinshnami canga yuyan. Paicunaca ashtaca millón gentecunapa almacuna Taita Diospa ñaupapi cieloman o infiernoman ringapaj juzgai tucuna cashcatami crin. Shinapash Bibliapica Taita Dios juzgana punllaca cai mundopi tiashca nalicunata tucuchingapaj cashcatami ricuchin (Salmo 96:13). Taita Diosca Jesustami juez cachun agllashca. Paimi cai alpapi ali causaigu tiachun ayudanga (Isaías 11:1-5; Hechos 17:31, liipangui).
2. Taita Dios juzgana punllapica ¿imata pasanga?
Adán runa Jehová Diosta na cazushcamandami Adanba tucui miraicunaca juchayucuna canchi. Shinallata shuj shuj llaquicunatapash charinchi, huañuitapash huañuna tucunchi (Romanos 5:12). Shinapash Adanba culpamanda huañushca tucui gentecunataca Jesusca causachingami. Apocalipsis libropica Jesús mil huatacunata mandajushpaca huañushca gentecunata causachinatami ricuchin (Apocalipsis 20:4, 11, 12, liipangui).
Causarishcacunaca paicuna nara huañushpallata rurashcacunamandaca na juzgai tucungachu. Ashtahuangarin Apocalipsis capítulo 20pi nishcashnaca mushuj rollocuna pascarishca jipa, chai rollocunapi nishcata cazushcata o na cazushcata ricushpami juzgai tucunga (Romanos 6:7, TNM). Apóstol Pabloca alita rurajcuna y nalita rurajcunapash causarishpami Taita Diosmanda yachajuna oportunidadta charinga nircami (Hechos 24:15, liipangui).
3. Taita Dios juzgana punllapica ¿imata ashtahuan pasanga?
Jehová Diosta na rijsishpa huañushca gentecuna causarishpaca Jehová Diosta sirvina oportunidadtami charinga. Causarishca jipa Jehová Diosta cazujcunaca ‘causaitami causanga’. Shinapash Jehová Diosta na cazujcunaca ‘llaquichi tucungami’ (Juan 5:28, 29; Isaías 26:10; 65:20, liipangui).
Taita Dios juzgana punllaca mil huatacunatami paranga. Chai tiempopimi gentecunaca cutin perfecto tucunga (1 Corintios 15:24-28). Chaica alipachami canga. Chai mil huatacuna jipaca gentecuna Jehová Diosta cazujta o na cazujta ricungapami Jehová Diosca Satanasta vichashcashna charijushcamanda cutin cacharinga. Chaipimi Satanasca gentecuna Jehová Diosmanda caruyachunga imacunatapash ruranga. Shinapash Jehová Diosta cazujcunami cai alpapica para siempre causanga (Isaías 25:8; Apocalipsis 20:1, 7-9, liipangui).
4. Bibliapica shuj juzgana punllamandapashmi parlajun. Chai punllaca ¿imashi can?
Chai punllapica cai mundopi tiashca tucui nalicunami tucuringa. Chai punllaca Noepa punllacunapi ninan Jatun Manllanai Tamia tiashcashnami na cuenta japijta chayamunga. Chai punlla chayamujpimi Taita Diosca ‘paita na manllajcunata’ o nalicunataca tucuchinga. Chaipimi Taita Diosta cazujcunaca aligutapacha causanajunga (2 Pedro 3:6, 7, 13, liipangui).
