¿Jesusta catinchi nijcunaca tucuicunachu Jesuspa mandashcacunata pactachishpa causan?
¿Jesusta catinchi nijcunaca tucuicunachu Jesuspa mandashcacunata pactachishpa causan?
¿JESUSTA catinchi o cristianocuna canchi nij gentecunaca mundo enteropi mashnapacha tiajtaca yachapanguichu? Atlas of Global Christianity nishca libropica, 2010 huatapica casi 2 mil trescientos millones yali Jesusta catinchi nijcuna tiashcatami villarca. Pero paicunamandaca shuj shuj iglesiacunapi, shuj shuj crishcacunatami charin. Shuj shuj crishcacunata charijta ricushpami gentecunaca imata crinata na yachashpa “¿picunashi Jesusta ciertopacha catijcuna can?” nishpa pensarishca.
Caipi pensaripashun: Pipash shuj llactaman ringapaj munashpaca aeropuertopica maimanda cashcatami ricuchina can. Shinapash chaipaca cedulata o pasaportetami ricuchina can. Yanga shimilla “ñucaca caimanda o chaimandami cani” nijpica gentecunaca na cringachu. Shina cuendami Jesusta catinchi nij gentecunaca na yanga shimihuanlla “Jesusta catinchimi” nina canllu. Ashtahuangarin Jesusta catijushcataca ruraicunahuanmi ricuchina can.
Cristiano shimitaca huata 44pimi parlai callarirca. Bibliata escribij Lucasca Jesusta catijcunataca por primera vezmi Antioquía llactapi ‘Cristota catijcuna’ o cristianocuna nishpa parlai callarirca ninmi (Hechos 11:26). Shinaca cristiano nishpaca Jesusta catijcuna cashcatami nijun. Pero Jesusta catijcuna cashcata ricuchingapaca ¿imatapachata rurana can? Diccionario Teológico del Nuevo Testamento nishcapica Jesusta catina nishpaca, paipa tucui causaipi Jesuspa mandashcacunata cazushpa causanatami parlajun ninmi. Shinaca ciertopacha Jesusta catijcunaca ima pasajpipash tucui shungumi Jesuspa yachachishcacunata, paipa mandashcacunata cazushpa causan.
Jesusta catinchi nij gentecunamandaca ¿picunata cunanbica Jesuspa mandashcacunata pactachishpa causan? Jesusta ciertopacha catijcunataca ¿imashina rijsi usharishcatata Jesusca nirca? Caimanda Bibliapi imata nijta yachangapaca cai cati 5 temacunatapash ricupangui. Cai 5 yuyaicunapimi Jesusta ciertopacha catijcuna imashina cana cashcata ricuchin. Shinallata punda tiempopi Jesusta ali catijcuna imashina cashcata, cunanbi picuna chaita pactachinajushcatami ricugripanchi.