1. a) Jehová Diosca ¿imatata ñallapacha ruranga? b) ¿Imashinata Jehová Diospi confiashpa shuyanajushcata ricuchi ushapanchi? (Notata ricupangui).

 JEHOVÁ DIOSCA ñallapachami unguicunata, llaquicunata, huañuitapash tucuchinga (Apoc. 21:3, 4). Jehovapa promesacunapi confiaj gentecunaca Jehovapa ayudahuanmi cai alpataca shuj paraisota ruranga (Sal. 37:9-11). Shinallata ñucanchicunaca Jehová Dioshuanga ashtahuan ali amigocunami cai ushashun. Chaica shuj jatun bendicionmi canga. Pero ¿imamandata Jehová Diospa promesacuna pactarinataca seguro cai ushapanchi? Porque Jehová Diosca paipa nishcacunataca siempremi cumplin. Chaimandami Jehová Diospi confiashpa shuyai ushapanchi * (Sal. 27:14). Pero ¿imashinata Jehová Diospi confiashpa shuyanajushcata ricuchi ushapanchi? Paipa promesacunata pactachinapi pacienciahuan, cushilla shuyashpa (Is. 55:10, 11).

2. Jehová Diosca ¿imatata ña cumplishca?

² Jehová Diosca paipa nishcacunata cumplin cashcataca ñami ricuchishca. Por ejemplo Apocalipsis libropica Jehová Diosca tucui llactacunamanda, tucui pueblocunamanda, tucui idiomacunamanda gentecunami Jehová Diostaca unido adorana cashcata nirca. Y chai shimicunaca ñami pactarishca. Shina unido Jehová Diosta adorajcunataca ‘na cuentai ushanalla ashtaca ashtaca gentecuna’ nishpami cunanbica rijsipanchi (Apoc. 7:9, 10). Y shuj shuj llactamanda, shuj shuj idiomata parlaj cashpa o shuj shuj costumbrecunata charij jari, huarmicuna y huahuacuna cashpapash tucuicunami unido, shuj familiashna can (Sal. 133:1; Juan 10:16). Shinallata gentecuna uyangapaj munajpica, paicuna  charishca esperanzataca cushijushpami predicangapaj listo can (Mat. 28:19, 20; Apoc. 14:6, 7; 22:17). Si quiquin na cuenta ushanalla ashtaca ashtaca gentepuracunamanda cashpaca, Jehová Dios cushca cai juyailla esperanzaguta charimandaca de seguromi cushijushca capangui.

3. Diabloca ñucanchicuna ¿imata crichunda munan?

³ Diabloca ñucanchicuna Jehová Diospi confianata saquichunmi munan. Shinallata paica Jehová Dios ñucanchimanda na preocuparijta, Jehová Dios paipa promesacunata na cumplingapaj munajta crichunmi munan. Diablopa nishcacunata crishpaca ñana shinlli tucushpami Jehová Diosta sirvinatapash saquinchiman. Caipica Job runagu Jehovapi confianata saquishpa, Jehovata adoranatapash saquichun Diablo imata rurashcatami ricupashun.

4. Cai temapica ¿imatata yachajugripanchi? (Job 1:9-12).

⁴ Cai temapica Satanás Diablo Job Jehová Diosta sirvinata saquichun imata rurashcatami yachajugripanchi (Job 1:9-12​ta liipangui). Shinallata Jobpa ejemplomanda imata yachajui ushashcata y Jehová Dios ñucanchita juyashcata, paipa promesacunata siempre pactachijta imamanda yaria cana cashcatapashmi yachajugripanchi.

5, 6. Job runagutaca ¿imata pasarca?

⁵ Job runaguca Jehová Dioshuanga shuj ali amigomi carca. Paica shuj jatun familiatami charirca. Jobca charij charij runami carca (Job 1:1-5). Shinapash shuj punllaca pai charishca tucui cosascuna illami quidarca (Job 1:13-17). Jipaca paipa juyashca churicunapashmi huañurca. Jobpash, paipa huarmigupash paicunapa 10 churicuna huañushcata yachashpaca de seguromi llaquillapacha sintirishcanga. Chaimandami Jobca pai churajushca ropatapash liquishpa, alpapi cungurishpa llaquillapacha sintirirca (Job 1:18-20).

⁶ Jipamanga Satanasca Jobtapachami llaquichirca (Job 2:6-8; 7:5). Jobtaca shuj gentecunaca ninandami respetan carca. Shinallata consejocunata cuchunbashmi Jobtaca mascan carca (Job 31:18). Shinapash jipamanga gentecunaca Jobtaca ñana ricunayachinllu carca. Jobpa huauquicunapash, amigocunapash incluso paipa sirvientecunallatapash paitaca na ricunayachin carca (Job 19:13, 14, 16).

7. a) Llaquicunata ¿imamanda charishcatata Jobca crirca? Pero Jobca ¿imatata na rurarca? b) ¿Ñucanchicunatapash imata pasaita ushan? (Párrafo 7​pa dibujota ricupangui).

⁷ Job runagu imapash nalita rurashcamanda Taita Diospa ñaupapi ñana ali ricurijushcata crichunmi Satanasca munarca. Shuj punllaca Jobpa 10 churicunami paicunapa huasipi micushpa ufianajurca. Shinapimi Diabloca shuj shinlli acapanata cachashpa huasindi, huasi ucupi cajcunandi tucuillata tucuchirca (Job 1:18, 19). Shinallata cielomanda ninata cachamushpami Diabloca Jobpa llamacunata, llamacunata michijcunatapash tucuchirca (Job 1:16). Shina pasashcamandami Jobca Jehovapa ñaupapica imapash nalitami rurashcani, chaimandami Jehová Diosca cashna llaquicunata cachamuhuajun nishpa crirca. Shina llaqui pasajushpapashmi Jobca Jehová Diostaca na maldicirca. Jobca Jehová Diospa bendiciongunata chasquishcashnallata nali cosascunatapash chasquina cashcatami pensarca. Chaimandami paica “Mandaj Diospa shutica, aligumari ni tucushca cachun” nirca (Job 1:20, 21; 2:10). Jobca chai tucui llaquicunata charishpapash Jehovata sirvinataca na saquircachu. Chaita ricushpaca Satanasca nimamanda na cushijurcachu.

8. Diabloca Jobta llaquichingapaca ¿picunatata utilizarca?

⁸ Satanasca Job Jehovata juyanata saquichunmi Jobpa nali quimsa amigocunata  utilizarca. Cai quimsa nali amigocunaca Job imapash nalita rurashcamandami shina sufrijungui nishpami culpanajurca (Job 22:5-9). Shinallata ima nalita na rurashca cashpapash Jobtaca Jehovapa ñaupapi ali ricuritaca na ushanguichu ninajurcami (Job 4:18; 22:2, 3; 25:4). Quimsa amigocunaca Jehová Dios Jobta na juyajta, na cuidaj cashcata y paita sirvinapash imapapash na valin cashcatami crichun munarca. Jobpa amigocuna cashna ninajujta uyashpaca Jobca de seguromi desanimarishca sintirishcanga.

9. Jobca ¿imamandata Jehovapi confiashpa catirca?

⁹ Jobta ima pasashcata pensaripashunchi. Paica llaquillapacha caimandami tucui punllacuna uchufa jahuapi tiajun (Job 2:8) Jobpa amigocunaca Jobta nali sintichingapami shuj shuj cosascunata nin. Jobca ashtaca llaquicunata charishcamanda, paipa churicunapash huañushcamandami llaquillapacha can. Callaripica paipa amigocuna parlajta uyashpaca na imatapash ninllu (Job 2:13–3:1). Jobpa amigocunaca Job imatapash na nijta ricuimandami Jehová Diosta sirvinata saquinga yashpa pensan. Pero Jobca na chaita ruranllu. Ashtahuangarin paipa amigocunata tigrai ricushpami Jobca “huañungacamanmi, ñucaca ima pandatapash na rimasha” nin (Job 27:5). Pero Jobca shina llaquicunahuan cashpapash ¿imamandata Jehovapi confiashpa catirca? Porque Jobca ima llaquicunata charijpipash, Jehová Dios paita siempre ayudanataca seguromi carca. Incluso huañujpipash Jehová Dios paita causachinataca alimi yacharca (Job 14:13-15).

10. Job runagupa ejemploca ¿imatata yachachin?

¹⁰ Job runagupa ejemploca ñucanchicuna Jehovata sirvinata saquichun, Jehovapi confianata saquichunbash Satanás na obligai ushashcatami ricuchin. Jehová Diosca ñucanchicuna ima pasajujtaca alimi yachan. Job runagupa ejemplomandaca tauca cosascunatami yachajui  ushapanchi. Imatalla yachajui ushashcata ricupashunchi.

11. Jehová Diospi siempre confiajpica ¿imata pasanga? (Santiago 4:7)

¹¹ Job runaguca Jehová Diospi siempre confiashpaca, ima llaquicunata charishpapash aguantashpa cati ushashcata, Satanaspa contrapash tucui ushashcatami ricuchirca. Ñucanchicunapash shina rurajpica Bibliapi nishcashnami Diabloca ñucanchicunamanda caruyashpa anchuringa (Santiago 4:7​ta liipangui).

12. Huañushcacuna causarinapi tucui shunguhuan crinaca ¿imashinata Jobtaca ayudarca?

¹² Jehová Dios huañushcacunata causachinapimi tucui shungu confiana capanchi. Chaishuj temapi ricushcashnaca Satanasca huañunata manllaimanda Jehová Diosta sirvinata saquichunmi munan. Por ejemplo Satanasca Job runagu paipa causaita salvangapaj munaimandalla Jehová Diostapash sirvinata saqui ushana cashcatami nirca. Pero Jobca ña huañunalla cashpapashmi Jehová Diosta sirvinataca na saquirca. Jobca ¿imashinata chai tucui llaquicunataca aguantai usharca? Porque Jobca Jehová Diospimi tucui shunguhuan confiarca. Cunan charishca tucui llaquicunata tucuchinatami seguro carca. Y ashtahuanbash chai llaquicunata chai rato na tucuchina cashpapash, jipacunaman tucui ali cachun Jehová Dios ayudanatami crirca. Huañushcacunata Jehová Dios causachinataca Jobca tucui shungumi confiarca. Job runagushnallata ñucanchipash Jehová Diospi confiashpaca incluso huañuchishunmi nishpa amenazajpipash, Jehová Diosta sirvinataca na saquishunllu.

13. Diablopa trampacunamandaca ¿imamandata cuidadota charina capanchi?

¹³ Diabloca Job runaguta llaquichingapaj utilizashca trampacunatallatami ñucanchita llaquichingapapash utilizan. Chaimandami cuidadota charina capanchi. Por ejemplo Satanasca tucui gentecunamanda parlashpami cashna nirca: “Runaca, paipaj causaimandaca tucui imata charishcatami cunman” nishpa (Job 2:4, 5). Satanasca ñucanchicuna Jehová Diosta na ciertopacha juyaimanda imapash llaquicunata charishpaca paimanda caruyanalla cashcatami nin. Shinallata Jehová Dios ñucanchita na juyajta y paita sirvingapaj imata rurajpipash Jehová Diosca na ñucanchihuan cushijujtami nin. Pero Jehová Diospi tucui shunguhuan confiashpaca Satanaspa trampacunapica na urmashunllu. Porque Satanás ima trampacunata utilizajtaca alimi yachanchi.

14. Problemacunata o llaquicunata charishpaca ¿imatata cuenta japi ushapanchi? Shuj ejemplomanda parlapai.

¹⁴ Jobca problemacunata o llaquicunata charimandami ashtahuan humilde cana cashcata cuenta japirca. Problemacunata o llaquicunata charishpaca ñucanchicunallata imapi mejorana cashcatami cuenta japi ushapanchi (Job 42:3). Por ejemplo huauqui Nikolaipashmi * paipa causaipi cambiocunata rurana cashcata cuenta japirca. Paitaca paipa saludhuan nalipacha cajpipashmi carcelman churarca. Paica ninmi: “Carcelpi canaca shuj radiografiata rurajuj cuendami can, porque shinami Jesusta catijcuna imashna cana cashcata cuenta japichun ayudan”. Shinaca ñucanchicuna imapilla cambiocunata rurana cashcata ricushpaca uchalla cambiangapami esforzarishun.

15. Llaquicunahuan cashpaca ¿pitata uyana capanchi?

¹⁵ Llaquicunahuan cashpaca Jehová Dios ñucanchiman imata nijtami uyana capanchi. Jobca Jehová Dios paiman ima nijujtaca alimi uyarca. Por ejemplo Jehová Diosca cashnami Jobmanga nirca: “¿Ñuca rurashca cosascunapi ñuca mashna poderta charishcata ricushcanguichu? Canda ima pasajujtaca tucuitami ricujuni. ¿Ñuca canda na cuidai ushajtachu pensangui?” nircami. Jehová Dios shina nijpica Job runaguca humilde cashcata ricuchishpami  Jehová Diosta ninanda agradicimanda cashna nirca: “Ñucaca, parlajtallami canmandaca uyan carcani. Ashtahuangarin cunanga candaca, ñuca ñavihuambachami ricujuni” nircami (Job 42:5). Jobca uchufa jahuapi tiajushpa, paipa cuerpopash caracha junda cashpa, paipa churicuna huañushcamandapash llaquilla cashpami cai shimicunataca nishcanga. Shinapash shina pasajujpimi Jehová Diosca Jobta juyashcata, paipa ñaupapi Job ali ricurishcatapash seguro cachun ayudarca (Job 42:7, 8).

16. Isaías 49:15, 16​pi nishcashnaca llaquicunata charishpapash ¿imatata yaria cana capanchi?

¹⁶ Cunanbi gentecunaca ñucanchitaca imapapash na valijtashnami tratan. Ñucanchita Jehovapa organizacionda nalipi quidachingapami ‘gentecunaca rimaita, llaquichita y llullashpa nalicunata parlaita’ ushan (Mat. 5:11). Job runagupa causaimanda yachajunaca llaquicunata charishpapash Jehová Diosta sirvishpa cati ushashcatami ricuchin. Y Jehová Diosca chaitaca alimi yachan. Jehová Diosca ñucanchicunataca ninandami juyan. Chaimandami paipi confiajcunataca nunca na saquinga (Isaías 49:15, 16​ta liipangui). Jehová Diosta na sirvij gentecuna nishca llullacunataca ama uyapashunchichu. Turquía llactamanda huauqui James ima nishcata ricupashunchi. Paica paipa familiandimi shuj shuj llaquicunata charishca. Paica ninmi: “Jehovapa organizacionmanda llullacunata nishcata uyashpaca ñucanchillatami desanimarinman carcanchi. Shinapash Jehová Diospa Gobierno prometishca cosascunata pactachinapi confiashpami Jehová Diosta cushilla sirvishpa catircanchi”. Shinaca Job runagushnami ñucanchicunapash Jehová Diosta uyana capanchi. Jehovata na  sirvij gentecuna nishca llullacunataca ama uyapashunchichu. Ashtahuanbash Jehová Diospi confiashpa paita sirvishpa catipashunchi.

17. Hebreos capítulo 11​pi parlashca jari huarmicunamandaca ¿imatata yachajui ushapanchi?

¹⁷ Job runagushnallatami ashtaca Jehovata sirvijcunaca llaquicunata charishpapash shinlli tucushpa, aguantashpa Jehová Diosta sirvishpa catishca. Por ejemplo apóstol Pabloca hebreo huauquipanicunaman shuj cartata escribishpaca Diosta sirvijcunaca “ñucanchi muyundipi caj shuj jatun fuyushnami can” nirca (Heb. 12:1). Cai huauquipanicunaca ashtaca llaquicunata charishpapash Jehová Diostaca tucuipimi sirvishpa catirca (Heb. 11:36-40). Llaquicunata charishpapash aguantashpa Jehová Diosta sirvishpa catinaca ¿imapita paicunataca ayudarca? Aunque paicunapacha Jehovapa promesacuna pactarijta na ricushca cashpapash, Jehovapa promesacuna pactarinapi confiashpa catichunmi ayudarca. Shinallata paicuna Jehová Diospa ñaupapi ali ricurishpa catichun y Jehovapa promesacuna pactarijta ricuna cashcata seguro cachunmi ayudarca (Heb. 11:4, 5). Jehovata sirvijcunapa ejemplopi pensarinaca ñucanchicunapash Jehovapi shuyashpa catingapaj esforzarichunmi ayudan.

18. Ima pasajpipash ¿imata rurashpata catina capanchi? (Hebreos 11:6)

¹⁸ Cunan tiempopi gentecunaca ashtahuan peormi tucunajun (2 Tim. 3:13). Satanaspash Diosta sirvijcunataca ninandami llaquichijun. Jipa punllacunapi ima pasana cajpipash Jehová Diosta tucui shunguhuan sirvishpa catipashunchi. Porque ñucanchica “causajuj Taita Diospimi confiapanchi” (1 Tim. 4:10). Job runaguta imashna Jehová Dios cuidashcata yachajushpami “Jehová Dios ninanda juyaj, llaquij Taita Dios” cashcata ricupanchi (Sant. 5:11). Ñucanchicunapash Job runagushna Jehová Dios ‘paita tucui shunguhuan sirvingapaj munajcunata bendiciajta crishpa’ Jehová Diosta sirvishpa catipashunchi (Hebreos 11:6​ta liipangui).